Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Marsu ya 2018

‘Ovuruwane Malago, Onokala Munoni’

‘Ovuruwane Malago, Onokala Munoni’

“Nyuwo anaga ddivuruwanení; kalaní athu oziwelamo.”​—GANO 8:32, 33.

JIBO: 34, 6

1. Niwodhe dhavi ofwanya ononelamo, vina ononelamowa onanikamihedhe dhavi?

NIPARHA na ononelamo ddi Yehova; iyene ononivaha ononelamo oku, vowi iyene namavaha. Nivuru na Tiago 1:5, nihikaana mazu anengesihu dhahi: “Akala mmodhavo wenyu onotowa ononélamo, amulobe Mulugu: onovahiwa, vowi iyene onowatanala na murima athu etene; kanimuhimedha muthu.” Mukalelo mmodha wa ofanya ononelamo, borumeela malago a Mulugu. Wakela malago aba ononirabeliha merelo otakala, veli-veli ononikamihedha onfiyedha Yehova. (Gano 2:10-12) Vina onela oniwodhiha ofwanya egumi yohimala.​—Juda 21.

2. Ninawodhe dhavi osunza okwela wa olaga wa Mulugu?

2 Masaka mena enonirutxaga orumela malago, eji enodha opadduwa sabwa yawi iyo nili attegi vina oleliwa wehu ohittiyana na wa attu ena. Mbwenye nigadha ozinddiyela yopurelamo ya wakela malago a Mulugu mwigumini mwehu, ninodha ononelamo onikwela waye. Gano 3:11, 12 ononivaha malago awi: “Mwanaga, kukodde osaddeya wa Nabuya.” Vasogorhova ongwadda dhahi: “Vowi Nabuya  onomusaddeya onimukweliye.” Iyo ninoziwa-wene wi Yehova onnifunana ofuru. (Kengesa Ahebreu 12:5-11.) Malago a Yehova anonakwanela vina onnivaha abuwene-wene anfunihu, sabwani iyene onoziwa omuttu wehu wotene. Mutoma obu iyo ninela osunza mikalelo minayi dha olagiwa: (1) ovilagawa muttu yeka, (2) malago anfuniwana amambali wavaha aniwa, (3) malago anakelihu mmulogoni, vina (4) elobo empitta wiwa opa wolagiwa.

NINAKALELE NNI AZIWITXI NIGAVOGOLELA?

3. Txini enamuwodhihe mwana ovyogolela mwinya? Kavaha yotagiha.

3 Akala iyo nihikaana elemelelo ya ovogolela, ninowang’anela dhawira dhehu vina mobuwelo ehu. Iyo kanimbaliwana ekalelo yovogolela, ekalelo eji iyo ninosunza. Ninga yotagiha, akala mwana onosunza weddiha sikaleta, mambali onimusuziha onottiddeela sikaletaya wi iyene anagwena. Mbwenye movira wa mudhidhi, muttuya onimusunziha onomuttiya vang’ono-vang’ono iyene bagadhowa yeka. Mwanammudhiya agaziwa wi mwanaya onowodha weddiha yeka, iyene onomuttiya-wene. N’ekalelo yakakene, ababi agasunzihaga anawa n’okurumuwa vina aswagihaga “na malago animuzivela Nabuya,” enlagiha wi anowakamihedha anawaya wi aziwe ovyogolela anyene vina afwanye ononelamo.​—Éfeso 6:4.

4, 5. (a) Ovyogolela okalele nni merelo a ttima vaddiddi anfuniwana ‘omuttu oswa’? (b) Ninkoddela nni okumuwa masiki akala ninottega?

4 Yakakene enopadduwa na abale animuziwa Yehova bamalile wunuwa. Awene kanakala Akristu owarala, masiki vakanilanivi eziwelo ya ovyogolela. Mbwenye aweneya agaroma ‘ottukula makalelo omuttu oswa’ avilibihedhaga okala ninga Kristu, anela owodha owarala. (Éfeso 4:23, 24) Onivyogolela onowodha ononelamo ‘mahala animusunziha otxinuwa obure wotene, vina dhinthopa maningo ehu, onowodha wedda mwilaboni-mpuno na winanela, omyala murima, wiwananeyana na Mulugu.’​—Tito 2:12.

5 Notene iyo nili attegi. (Kohelét 7:20) Mowi-dhawo, akala iyo ninottega, eji enlagiha wi iyo kanina ewodhelo ya ovyogolela, obe kaninwodha-wene ovyogolela? Kahiye mwenemo. Nivuru na Gano 24:16 ninnilaga dhahi: “Muthu woligana murima masiki agwe, onovenyavi.” Txini enanikamihedhe “wimela wili”? Kahiye guru dhehu, mbwenye guru dha muya wa Mulugu. (Kengesa Filipi 4:13.) Musapo wa muya obu oniwanana na-ovipimelela, ali merelo anligana na ovyogolela.

6. Ninawodhe dhavi okala anamasunza a ntidi a nzu na Mulugu? (Koona foto ali omaromo.)

6 Olobela, omusunza Bibilia, vina otanalela dhinela onikamihedha wunuwiha ewodhelo ya ovyogolela. Onakose nni akala ohikaana owara womusunza Bibilia obe akala kunziveliwa-wene? Kukumuwe. Ogamwaddela Yehova makani aba iyene onela wuvaha guru ‘yooziveliwana’ Nzu naye. (1 Pedro 2:2) Kamulobelele Yehova wi ovahe ewodhelo ya ovisaddeya wamwinya, dhawene onela owodha ofwanya mudhidhi wa omusunza Bibilia. Ngafuna orome omusunzaga mudhidhi mung’onovi. Vang’ono-vang’ono ogela odhowa bugaziveliwa omusunzawa. Weyo onelege oziveliwa mudhidhi wokala weka wi otanaalele dhokoddela dhotedhene dhikosile Yehova.​—1 Timóteo 4:15.

7. Ovyogolela onniwodhiha dhavi ogana omukosela Yehova mabasa?

 7 Ovyogolela ononikamihedha ogana omukosela Yehova mabasa. Ninga motagiha, babi dhahi wahoona wi wahiroma wobanela mabasa a Mulugu, noona wahigana okala namalaleya wa mudhidhi wotene. Ovyogolela omukamihile dhavi? Iyene oromile wengesa mpaddi dhahi waloga dha mabasa a olaleya, mmaleliye balobela. Eji ehimuwodhiha wandanavi na Yehova. Masaka awodhiye, wanlaba ninga pionero wokamihedha. Iyene karumele okumuwa na elobo-elobovi; ohakwanihedha yogana yaye. Muvirele mudhidhi mung’onovi ohiyelela okala pionero wa mudhidhi wotene.

KAMULELE MWANAWO NA MALAGO A YEHOVA

Aima kambaliwa na ewodhelo ya oziwa ottiyaniha opama na obure, noona enofuneya awene oswagihiwa (Koona ddima 8)

8-10. Txini enakamihedhe amambali walela aniwa wi amulabe Yehova? Kaloga Yotagiha.

8 Yehova ohavaha amambali mabasa a walela anawa na malago “animuzivela Nabuya.” (Éfeso 6:4) Mwilaboni ejino elihu, omulela mwana enorutxa vaddiddi. (2 Timóteo 3:1-5) Aima agabaliwa, awene kanziwa ottiyaniha yapama na yabure, yubuwelo yawa enkala ehinatti oswagihiwa. Noona awene anofuna olagiwa wi yubuwelo yawa ekale yoswagiheya. (Roma 2:14, 15) Eskola dhahi munsunziwa Bibilia, muhilogiwa wi mazu aba “malago” na elogelo ya Egrego, kuloga  “owaralihiwa wa mwana,” obe omulela mwana wi onuwe na zelu.

9 Amambali agavahaga anawa malago n’ekalelo yokwela, aniwaya anele oziwa wi ninobareliwa. Awene anele oziwa wi ofuru okana maddile nanda dhokosa dhawa dhikaana dhopurelamo. Noona jofuneya-wene amambali ali Akristu akuluvele ononelamo wa Yehova wi alelena aniwa. Malago a walelana aima anottiyana bari obaliwe mwanaya, vina malago anodhowavi bagasadduwa. Ababi aninvuruwana Mulugu kanaganyedhe atamelaga malago-malagovi aliwo

10 Ndoweni nirome osunza empadduwele Nowé. Yehova vamwaddeliye wi amusasanye pangaya, Nowé kaziwa musasanyedhiwoya. Yafuniwaniye yali ya omukuluvela Yehova, vina iyo nigengesela nipadduwona ninowona wi iyene “ovirihamo dhetene” obe ohikosa-wene dhaddeliwiye na Yehova. (Wita 6:22) Txini epurilemo iyene? Pangaya ole ohivuna egumi ya Nowé vamodha na amudhayeya! Nowé vina wali mambali wa malago. Enlogeliwani dhawene? Sabwani iyene wahikuluvela ononelamo wa Mulugu. Nowé ohasunziha anaye vina aimaya ahoona merelo apama akosiye; merelo aba apama anrutxa vaddiddi okosawa ttabwa-ttabwa Mpulo ohinatti.​—Wita 6:5.

11. Enfuneyela nni amambali okosa guru wi awaralihe anawa?

11 Akala weyo wamambali onawodhe dhavi “ovirihamo dhetene”? Onvuruwane Yehova. Omuttiye wi awukamihedhe omulela mwanawo. Kamulage mwanawo na Mazu aye vina mwari mwa nikuru naye. Musogorhomwa, enkala ninga mwanawo onela wutamalela sabwa ya weyo omwirela yapama! Okalawo mbali olebile dhahi: “Miyo ddinowatamalela vaddiddi amambali aga sabwa ya nlelo niddivahilani. Awene ahikosa guru yawa yotene wi alage murima waga.” Iyene ohiloga wi ba amambali aye omuwodhihile okana wandana na Yehova. Akalawo attu animunyanyala Yehova, masiki akala muhimani mwawa amambali awa ahasunziha magono a Mulugu. Mbwenye mambali onimusunziha mwanaye, kankana muladdu, vina onoziwa wi mwanaye omunyanyale Yehova onela omwiyelela wili.

12, 13. (a) Mwana agattamagihiwa mmulogoni ababe alagihe dhavi omwiwelela Mulugu? (b) Anamudhi dhahi ali dhavi aweddeyana na Yehova?

12 Ottamagiwa wa aima mmulogoni elobo enatotela makattamiho amambali enjene. Murogora wana mwanaye waburutxiwe mmulogoni, ohiloga: “Mwang’anele miyo mmanivuruni mwehu ddihoona wi ekaana vavonyemi, vowi kaddatamela mudhidhi wokala na mwanaga vina na mudhulaga.” Mbwenye mamune n’ofwasa wahiloga na iyene wi amunonihedhemo wi muladdu wa ottamagihiwa mmulogoni wa mwanaye ototile kahiye iyene, wahimooniha vina wi yanfuneya awene weddeyanavi na Yehova.

13 Vyaka dha musogorhomwa, mwanawaya wahidha wiyihedhiwa mmulogoni. Maye ohiloga: “Ovano iyene onoddikuwela na muttitto vina onoddilebela muselu mudhidhi wotene! Iyene onomuriha mamunaga vamodha na miyoya sabwani ohiziwa wi nihiwelela malamulo a Mulugu. Ddabuno nihandana vaddiddi.” Akala mwanawo wa muyana obe wa mulobwana onottamagihiwa mmulogoni, weyo onela “muroromela Yehova na murima wawo wotene”? Merelo awo anela woniha wi weyo “kunkuluvela ononelamo wawo”? (Gano 3:5, 6) Kudduwale, malago a Yehova ononizinddiyeliha onona waye vina  anolagiha wi iyene ononikwela. Nubuweleni wi iyene omperheka Nammodha waye wi avunena attu a malogo otene, kuloga amvunena mwanawo. Mulugu onfuna wi otene attidde egumi yohimala. (Kengesa 2 Pedro 3:9.) Amambali ena anodhowavi bagakuluvela malago vamodha na dila dha Yehova vowi anorumela wi boligana, masiki aziwaga wi enorutxa wiwelelawa. Karumela malago a Mulugu, kupambihe-wene.

MMULOGONI

14. Masunziho a Yehova annivahaga “mwimeleli wororomeleya” annipurhihamo dhavi?

14 Yehova ohikuluveliha okweya, obarela vina osunziha mulogo w’Okristu. Esidha iyene onkosa mottiyana-mwene. Ninga motagiha, iyene ohimutonya mwanaye wi eddihe mutugumano, veli-veli Yezu ohimuttoma “mwimeleli wororomeleya” wi anivahege posso ninwaraliha mpaddi womuyani. (Luka 12:42) “Mwimeleli” oddu ononivaha masunziho obe malago a ttima vaddiddi. Txino poddi wubuwela mani ewaliwe obe engesiliwe mwri mwa manivuru aukamihedhe otxinja mukalelo wa yubuwelo obe merelo awo. Akala yahiroma wupadduwela, bahi-tti ohagalale, sabwani eji enlagiha wi weyo ohikaana murima wa wakelana malago a Yehova.​—Gano 2:1-5.

15, 16. (a) Niwodhe dhavi opurelamo mabasa a anddimuwa a mmulogoni? (b) Ninakose dhavi wi nikamihedhe mabasa a anddimuwa a mmulogoni wi azivelege?

15 Kristu vina onowattomaga anddimuwa okwela mmulogoni wi akweye abali. Bibilia onloga wi anddimuwa ‘mivaho dha attu.’ (Éfeso 4:8, 11-13) Ninawodhe dhavi opurelamo mabasa a anddimuwa a mmulogoni? Nitagiheni merelo awa na nroromelona, nakelegeni malago annivaha awene.andela mBibiliani (Kengesa Ahebreu 13:7, 17.) Anddimuwa a mmulogoni anonikwela vina anfuna wi iyo nikale amarho a Mulugu. Awene agoona wi iyo ninojomba omatugumanoni obe ninokumuwela mabasa a Mulugu, anomaguvela onikamihedha. Awene anonivuruwana anonilibiha na okwela ononelamo anonivaha malago a mBibiliani. Onowona wi nikamihedho na anddimuwa aba ezinddiyelo ya okwela wa Mulugu?

16 Wubuwele wi enorutxa vaddiddi anddimuwa a mmulogoni onilaga. Weyo kunubuwela wi yali yogurumeliha vaddiddi venevo varumiwe namavuhulela Natan wi adhowe aloge vina amulage Mwene David, sabwa ya iyene ovita yottega yaye? (2 Samuwel 12:1-14) Murumiwi Paulo wali dhavi moneliye ofuneya wa omulaga Pedro, odduwene wali mwari mwa nikuru na arumiwi 12, w’attittimiha Akristu a Ayuda opitta Akristu ahali Ayuda? Iyene wanfuna oliba murima. (Galásia 2:11-14) Kito mwa weyo, txini enakosiwe enawodhihe anddimuwa a mmulogoni ohova wulaga? Oviyeviha, otamalela, ofwewa mazu, esuwene dhinofuneya. Ogakamihedhiwa na awene oziwe wi oko okwela wa Mulugu. Weyo onela opurelamo, vina anddimuwa a mmulogoni anela okaanela guru dha ottabela mabasa awa.

17. Anddimuwa a mmulogoni amukamihedhile dhavi murogora dhahi?

17 Okalawo murogora dhahi ologile wi dhimpadduwele mundduni, dhihikumula vaddiddi omukwela waye Yehova; wahidhugudheya vaddiddi. Iyene ohiloga: “Miyo ddanziwa wi ddanfuna ologa na anddimuwa a mmulogoni. Awene kaddilogele mazu odditota manyazo nne kaddikonile, yonilemi jawi awene ahiddilibiha vina ahiddiwaraliha. Omamalelo wa matugumano, masiki eziweyaga wi  awene ahizuzuma na dhokosa dhawa dhinji, mbwenye mmodha wadha baddivuzela. Miyo kaddavyonana ttima ya okweliwa na mulugu sabwa ya esile dhiddipadduwele mundduni. Movira wa mudhidhi, miyo ddanona wi Yehova wela wasukumiha abali a mmulogoni vamodha na anddimuwaya wi onihe oddikwela waye. Miyo ddanlobela na mazu awi, kaddinamunyanyale.”

ELOBO GANI YORUTXA ENPITTA OPA WOLAGIWA?

18, 19. Elobo gani ensegedha vopitta enttiyana na opa wa olagiwa? Kaloga dhotagiha.

18 Txibarene malago kanttabiha, mbwenye ole onkoodda wakela malago a Mulugu, oputtuwa waye onoribiha murima. (Ahebreu 12:11) Ndoweni nirome wona otolo wa Kayini vamodha na wa Mwene Sedesiya. Monele Mulugu wi ohikaana ntxiga n’ofuna ompa mbale, iyene ohittagela omwaddela Kayini: ‘Yusilidhile nni? Weyo ogedda n’opama onila kunarumeliwe vamentoni va Mulugu? Ogera dhovuta, yoddawa enokala vamusuwo vawo, eganuturumela, porhe-porhe! Yoddawa enousirhirha; apo weyo onela owodha opurhanya?’ (Wita 4:6, 7) Kayini ohikoodda malago a Yehova ohifiyedha ompa mbale; otolo oku ohimputtula-wene, okalawo waye wotene wahidhala masoso. (Wita 4:11, 12) Kayini kovuruwana malago a Mulugu, iyene kagonile masoso.

19 Sedesiya wali mwene wadhaleliwe obure. Nsaka nalamuleliye, attu a nlogo na Jeruzalemi anfwanyiwa masoso menji vaddiddi. Namavuhulela Jeremiya wannimwaddela Sedesiya wili-wili, ofuneya wa osaddula merelo aye. Mbwenye mwene oddu ohikoodda malago a Yehova, noona eji yahimutotela-wene ngovi. (Jeremiya 52:8-11) Yehova kanfuna wi iyo nigweliwe ngovi ninga eji yebewene!​—Kengesa Izaiya 48:17, 18.

20. Txini enapadduwele abale anrumeela malago a Mulugu vina abale ankodda?

20 Masaka abano, attu enjeene a mwilaboni anoveyiha malago a Mulugu, nne kantanaala. Attu ninga aba kanetxa mudhidhi mwilaboni, mwari mwa nsaka ning’onovi anela ogweliwa ngovi yottabwaya. (Gano 1:24-31) Mbwenye iyo ndowe ‘nivuruwane malago nikale attu oziwelamo.’ Ndoweni nittidde malago a Gano 4:13 apa mazuya anloga dhahi: “Penddaga-wene malago, kupwaze; virihamo vowi anoukalihawo.”