Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Junyu ya 2017

Yehova Ononipangarhaza Mmakattamihoni Mwetemwene

Yehova Ononipangarhaza Mmakattamihoni Mwetemwene

“Babi onnipangarhaza . . . ononipangarhaza mmakathamihoni mwetemwene.”—2 KORINTO 1:3, 4.

JIBO: 38, 6

1, 2. Yehova onnipangarhaza dhavi mmakattamihoni mwehu, nanda yolibela gani enfwanyihu Mmazuni aye?

MBALI dhahi wa muzombwe watanaalela nlebo va 1 Korinto 7:28, vanloga atelani “anowona makathamiho vamuralani vawa.” Odduya wahiloga na munddimuwa wa mulogo wa muteli nanda wahinvuza: “Makathamiho vamuralani antapulela nni, vina ddinawodhe dhavi owanana ddigatela?” Ahinatti wakula nivuzo ntti, munddimuwaya wahimukumbirha mbali wila obuwele elebile murumiwi Paulo: Yehova “ononipangarhaza mmakathamihoni mwetemwene,” obe mu goyini.—2 Korinto 1:3, 4.

2 Iyo ninoziwa wila Yehova, Babi onnikwela vina onnipangarhaza nigafwanyiwa segedho. Notene kanindduwala dila ngasi dhinikamihedhi Yehova ovilela makattamiho menjene alabihedhaga Nzu naye. Kaninaganyedha yawi iyene onofuna oderetu wehu, ninga mwakoseliye  emeleli a masaka a mundduni.—Kengesa Jeremiya 29:11, 12.

3. Mavuzo gani anfunihu wakula ovanene?

3 Mudhidhi mwina, ninowodha ovilela makattamiho ttabwa-ttabwa nigaziwa ondani. Koddi ninkaanela nni makattamiho vamateloni obe vamuralani? Dhotagiha dha attu a nsaka na Bibilia vina a ovanene dhinnivaha dhavi nipangarhazo? Ndoweni nakule mavuzo aba, wila noone mvilelo onavilelihu makattamiho.

MAKATTAMIHO VAMATELONI

4, 5. Makattamiho gani angumanana atelani?

4 Mmaleli Yehova omuttandda muyana woroma, ohinfiyana vali mulobwana wila akale mwadhiye. Apo Yehova ologa: “Nona mulobwana onere omuthiya babe na maye, akale na mwadhiye; obiliya akale muthu mmodha.” (Wita 2:24) Kavo ohinziwa wila notene nili attegi. (Roma 3:23) Noona sabwa ya ejene, atelani etene anojedhela okaana makattamiho. Motagiha, muyana wa muziye onofuniwana wi awiwelele amambali aye mudhidhi oliye vani-vawa. Mbwenye Nzu na Mulugu ninloga wi attu agatelana, mulobwana ddi munddimuwa wa mwadhye. (1 Korinto 11:3) Voroma mamuni txino onelege orutxiwa onvaha malago mwadhiye. Muyana vina podi orutxiwa omwiwelela mamunaye agafuna wila amusisigule ottiya amambali aye. Mudhidhi mwina txino atelaniya onofwanyaga makattamiho na anamudhi a mamuni obe a mwadhiyeyá.

5 Kobuwela viina magudulano ankaana atelani agakaana mwana. Masiki vanziveliwani, mudhidhi mwina anozuzumaga. Anozuzumela oziwa akala yariyá enele weddeleya deretu obe egumi ya mwanayá. Awene anoziwa vina wila anelege ononga kobiri vopitta. Mwana agabaliwa, atelani anokosa masadduwo meena mwigumini mwawa. Mayi onovira mudhidhi mwinjene amususedhaga mwana. Sabwa ya ejuwene awene anovugula otanalana ninga mwakoselani wale. Babi onokaana mabasa menjene okosa. Onokosa guru wila akwanihe dhofuna dha mwana  vina mwadhiye.

6-8. Atelani anavyone dhavi akala aweneya kambaala?

6 Atelani eena anofwanyiwaga makattamiho ottiyana-ttiyana. Enaya anofuna okaana mwana mbwenye kanwodha. Mudhidhi mwina awene anokubanya muyanaya agahikanege yari. (Gano 13:12) Mmasakani a Bibilia okaana mwana yali ttima ya muyana woteliwa. Rakel mwadhi wa Jakobi, wankubanya vaddiddi mudhidhi wahawodhiye okaana yari ninga mwakaana mbalaye. (Wita 30:1, 2) Dhilabo dhina, attu enjene anloga wila japama okaana aima gwé. Attu enjene anowavuza amisionario ankala mu dhilabodha eso sabwa enkooddelani obala. Masiki amisionario abo vankosani guru wila atapulelemo, mowakwana sabwaya, awene anloga, “Ninele oulobelelani wi mukaane!”

7 Kobuwela nipadduwo ntti niina. Murogora  dhahi w’o Inglaterra, wanfuna vaddiddi okana mwana. Mooneliye wila kabaala, wahikubanya vaddiddi. Nomala iyene na mamunaye ahubuwela omwadotar mwana (omulela mwana wa muttu mwina). Masiki dhawene murogoraya wankubanyavi. Iyene ologa wila: “Ddiziwa wila omwadotar mwana kunligana n’ombala wamwinya.”

8 Bibilia onloga wi muyana “onere ovuneya eddihaga mabasaye omayi.” (1 Timóteo 2:15) Mazu aba kantapulela wi muyanayá onele okaana egumi yamukalakala sabwa yokala mayi. Kito mazuya anfuna atapulele nni? Mayi onokaana mabasa menjene, omususedha mwana vina okoddeliha ntakulu. Okosa ejuwene enomurabeliha ogilatela waba, obe ologa dhilobo dhihinimpatta (1 Timóteo 5:13). Masiki dhawene iyene onokaanavi makattamiho vamuralani vaye.

Yehova okosa dholibedha dhinjene dhinnipangarhaza mudhidhi wa segedho

9. Makattamiho gani meena angumanana atelani enjene?

9 Makattamiho meena anapatta atelani ba okwa wa muttu mmodha vamateloniva. Masiki vanubuwelani wila makattamiho ninga aba kagagweli, awene anofuna ovilela nikattamiho ntti nopa vaddiddi. Akristu anorumeela wila onele okalawo ovenyihiwa mu okwani, nanda muselu obo onowapangarhaza vaddiddi. (Joau 5:28, 29) Mmazuni aye Yehova onivaha malibelo menjene annipangarhaza mmasakani a segedho. Ovano ndowe noone nipangarhazo na nikamihedho navahile Yehova emeleli aye a masaka a mundduni.

Onafwanye wuvi nipangarhazo akala mwadhiyoobe mamunawo onokwa? (Koona ddima 9, 12)

NIPANGARHAZO NINDA NIGAGUMANANA DHOWEHA

10. Txini yampangarhaza Ana? (Koona foto eli omaromo.)

10 Kobuwela yampadduweli Ana mwadhi Elkana. Ana wanfuna obaala mbwenye kawodha. Elkana mwadhiye mwina wakuweliwa Penina, wahikaana aima enjene. (Kengesa 1 Samuwel 1:4-7.) Yottabwaya, Penina, munanddi wa Ana, wanimunyimula “yaka-yaka.” Eji yannimpa vaddiddi Anayá. Iyene ofwanyile dhavi nipangarhazo? Wela olobela wa Yehova. Ana wahidhowa mumparhani mwa Yehova balobela mudhidhi mwinjene. Wamukumbirha Yehova wila anvahe mwana mmodha, nanda wankuluvela wila nikamihedho ntto nigahidha-wene. Mmaleliye olobela wahagalala venjivene nanda “murima waye opangarhazeya, kove yaye edhamo.” (1 Samuwel 1:12, 17, 18) Ana wanziwa wila Yehova agahinvaha mwana obe nipangarhazo nafuniye na marhe ottiyana-ttiyana.

11. Nlobelo ninnipangarhaza dhavi?

11 Nigaalivi mwilaboni ejino ya Satana,  makattamiho anelege okalawovi. (1 Joau 5:19) Masiki dhawene nihikalawo nikamihedho. Nikaana gari y’omuloba Yehova “Babi onnipangarhaza.” Jijene ekosile Ana. Iyene wahimwaddela Yehova dhetene dhamukattamiha, nanda wanjedha nikamihedho naye. Mwakakene, nigafwanyiwa dhorutxa, kanikalele omwaddelavi Yehova makattamihoya. Enofuneya iyo ompigiriyela banigamukumbirha nikamihedho, oku banigamwaddela enfunetxihu.—Filipi 4:6, 7.

12. Txini yampangarhaza Ana masiki na makattamiho menjene?

12 Mudhidhi mwina muttu agahibaalege, obe agakweliwa onowojeya. Mwa dhawene, iyo nikana nipangarhazo. Ninfuna niloge nipadduwo na muyana weliwa Ana okalilewo masaka a Yezu. Mamunaye okwile awene bana vyaka tanu nabili bahi dha matelo. Ottiya eji iyene kaana mwana nne mmodha. Koddi txini emukamihedhile? Iyene “va mparhani kavenyavo.” Masiki vaniye vyaka 84, wandhowa omulaba vina omwebedha Yehova mu mparhani. (Luka 2:37) Okosa ejene yannimpangarhaza masiki vaniye makattamiho menjene.

13. Amarho ebaribari annipangarhaza dhavi akala amudhihu anoninyimula?

13 Ninowodha ofwanya nipangarhazo nigakaana amarho okuluveleya mmulogoni. (Gano 18:24) Paula wana vyaka tanu mudhidhi ottiyile mamayaye omwebedha Yehova. Paula wahinyimuwa vaddiddi, vina dhilobodha kadhamweddela deretu. Murogora dhahi wakuweliwa Ana wali pionera, wahimpangarhaza, owahimoniha wi txibarene onomukwela. Paula bela: “Masiki Ana vahaliye mmudhaga, ddahoona wila wanddikwela, vina wanddikamihedha.” Ohenjedhedha eraga “iyene oddikamihedha ofiyedha omulaba Yehova.” Mwiyeleli mamayaye mwibaribarini, Paula  wahiziveliwa. Ana vina wahagalala sabwa y’omukamihedha Paula omulabela Yehova.

14. Nigapangarhaza attu eena nimpurelamo eeni?

14 Nigakoselaga attu eena dhilobo dhaderetu, ninodduwala makattamiho ehuyá. Motagiha, arogora enjene aziye obe ateliwe, anoziwa wi agalaleya attu eena miselu dhapama dha Omwene, ankosa mabasa a Yehova vina ankosa ofuna waye. Anowakela ohagalala. Iyo notene ninoazuzumela attu venevo vanromihu walaleya miselu dhapama. Nigakosela dhilobo dhapama abali na arogora, ninolibiha mandano ehu na awene. (Filipi 2:4) Jijuwene yakosile murumiwi Paulo. Iyene wannazuzumela  akwaye, ninga ‘munimuzuzumela mai wa supaje mwanaye.’ Paulo vina  wanalibiha vina wapangarhaza akwaye, “n’ekalelo ya mambali na anaye.”—Kengesa 1 Tesalónika 2:7, 11, 12.

NIPANGARHAZO VAMURALANI

15. Bani ottomeliwe wasunziha aima dila dha Yehova?

15 Ninawodhe dhavi opangarhaza mirala dhinjene dhili mmulogoni mwehu? Dila dhina anamasunza a Bibilia podi onikumbirha wila nakamihedhe anawa osunza dila dha Yehova, obe wasunziha Bibilia. Bibilia onloga wila Yehova wattomile amambali wasunziha anawa. (Gano 23:22; Éfeso 6:1-4) Masiki niziwaga wila attu eena podi onikamihedha, enofuneya amambali wasunziha anawa. Amambaliya anfuniwana wila alogege na aniwa mudhidhi wotene.

Enofuneya wi amambali alogege na nawa mudhidhi wotwne

16. Txini enfwanyelihu wubuwela nigakamihedhaga aima?

16 Akala babi ononikumbirha wila nimusunze Bibilia na mwanaye nitanaalele wila musunzihedho wehu kukale ninga wa babe mwanaya. Mudhidhi mwina iyo podi omusunza Bibilia na mwana amambali aye ahili mwibaribarini. Nigamusunzihaga mwana ohili wehu, nidhowe vani va mwanaya, obe nikale vakuvi na mbali mwina, nisunzege vego vowooneya. Esodha ninkosela wi nirabele waganyedhiwa. Onofiya mudhidhi wa ababiya akaana ewodhelo ya wasunziha anawa anya miselu dha Yehova.

17. Aima anapangarhaza dhavi attu eena vamuralani?

17 Aima agasunza omukwela Yehova, amambali awa anopangarhazeya. Dhavi? Sabwa ya wariha vina olaba na guru wila akamihedhe. Elobo yina jowila, mwana agaroma omuroromela Yehova, murala wotene onolibiheya. Mpulo ohinadha, Lamek wannimwebedha Yehova. Noona Lamekiyá wahiloga dhahi na mwanaye Nowé: “Oddu onere onivugulela goyi dhehu, mabasa olemela a mada ehu, dhitoteyile na ntowa nigwihedhe Mulugu mwilaboni.” Nivuhulo ntti ndhile wakwanihedheya nvirele mpulo nanda Yehova batolotxa obure wotene mwilaboni. (Wita 5:29; 8:21) Masaka abano vina, aima animuroromela Yehova, anowapangarhaza amambali awa. Awene anomukamihedha muttu-muttu wa vamuralani owodha owanana makattamiho ovanene, vina musogorho.

18. Txini enanikamihedhe oliba masiki na goyi dhinjene?

18 Masaka abano, attu a nlogo na Mulugu onofwanya nipangarhazo sabwa ya olobela, otanaalela dhotagiha dha Bibilia vina wandana na abali eena. (Kengesa Masalmo 145:18, 19.) Kavali waganyedha wila yofuna ya Yehova jonipangarhaza, vina onikamihedha ovilela makattamiho etene!