Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Junyu ya 2017

Kettekela Murima Mafumo Omuyani

Kettekela Murima Mafumo Omuyani

“Txibarene vali muhaku wenyu, pali murima wenyu.”—LUKA 12:34.

JIBO: 153, 9

1, 2. (a) Mafumo mararu andha wa Yehova bavi? (b) Elobo gani enasunzihu?

YEHOVA ddi muttu woreeletxayámo mwilaboni yotene. Dhetene dhili mwilaboni-mwa, saye. (1 Mapadduwo 29:11, 12) Masiki dhawene, Yehova onowatapulela mada, attu otene. Ninomutamaalela-wene, sabwa y’onivaha mafumo aye omuyani! Mafumoyá abo antapulela nni? Mafumo antaganyiheya na (1) Omwene wa Mulugu, (2) mabasa a olaleya vina (3) ebaribari ya Mazu aye. Nigahang’anege, ninodha odduwala ttima eena mafumoya abo. Nitanaalele ttima ennani vina nunuwihe okwela wehu sabwa Yezu ologa, “vali muhaku wenyu, pali murima wenyu.”—Luka 12:34.

2 Ninfuna nisunze muwodhelo onawodhihu olibiha otamaalela na okwela wehu Omwene, mabasa a olaleya, vina ebaribari ya Mazu aye. Nigasunzaga makani aba,  muttu-muttu atanaalele mukwelelo onakweliye mafumo aba omuyani.

OMWENE WA MULUGU OLI NINGA MYARHA DHA TTIMA

3. Txini yafuna okosa mulobwana wamuloga Yezu, wi agule mwarha wa ttimaya-ttimaya? (Koona foto eli omaromo.)

3 Kengesa Mateu 13:45, 46. Yezu wahiloga musibo obu amwaddagana munyamarhondda wa myarha dhattima. Labo nimodha, iyene wahoona mwarha wa ttimaya-ttimaya opitta esile dharomilegiye woona. Vowi wanfuna vaddiddi mwarhaya, iyene odhowa oguliha dhetene dhaniye vatakulu. Mwarhaya wahimvavutxa murima sabwabi wakihaana ttima enddimuwa!

Akala ninokwela Omwene ninga mwaziveliwa munyamarhondda na myarha dhaye, ninele okosa guru yotene wi nikamihedhe

4. Elobo gani enakoselihu Omwene?

4 Musibo obu waloga Yezu onnisunziha nni? Onnisunziha wi ebaribari ya Omwene wa Mulugu eli ninga myarha dhattima. Akala ninokwela Omwene ninga mwaziveliwa munyamarhondda oddule na myarha dhaye, ninele okosa mabasa menjene wi nikamihedhe, vina niwelele Omweneya. (Kengesa Marko 10:28-30.) Ovano ndowe noone ekosile attu dhahi eeli.

5. Txini yafuna okosa Zakewu sabwa ya Omwene?

5 Zakewu, wali namapitxiha musoko. Wali mureli sabwa ya kobiri dharanjuliye. (Luka 19:1-9) Labo dhahi Zakewu wahimwiwa Yezu bagaloga dha Omwene wa Mulugu. Wahiziveliwa n’esile dhewiye noona wahitamela okosa matxinjo na dhilobo dhakosiye. Iyene wahiloga: “Nabuya, ddinogwadda vari-vari dhorela dhaga, ddinowavaha ahawi. Akala ddimujela muthu, ddinomwiyelihedha dila náyimo.” Zakewu odhowela kobiri ohawiyihedha attu etene, nomala ottiya okala mukumbela vaye.

6. Masadduwo gani akosile muyana dhahi nanda sabwa yani?

6 Vyaka dha mundduni, muyana dhahi watelani na muyana mukwaye, wahiwa dha Omwene wa Mulugu. Muyana oddu wahikala seundda wa mparha wabareha ofuru wa otelana wa attu a vyano dholigana (direitos homossexuais). Mmusunzeliye Bibilia nanda anona efunelo ya Omwene wa Mulugu wahikosa matxinjo menjene. (1 Korinto 6:9, 10) Sabwa ya omukwela Yehova, wahinyanyala okamihedha mparhaya obu, vina wahigwadda matelo akosiliye na muyana mukwaye. Obatiziwa yaka ya 2009, nanda oroma olaba opionero wa mudhidhi wotene. Iyene okosa eji sabwa omukwela waye Yehova wali woliba pwí, opitta dhofuna dhaye.—Marko 12:29, 30.

7. Ninawodhe dhavi olibiha okwela wehu Omwene wa Mulugu?

7 Ena mwa iyo nihinyanyala kakamwe dhakosihu dhabure wila niwelele Omwene.  (Roma 12:2) Masiki dhawene mpaje wehu kunattivi ogoma. Kanittiye okwela wehu Omwene wobana sabwa ya dhofuna dhomaningoni ninga dhorela obe ojabeya. (Gano 4:23; Mateu 5:27-29) Wila nilibihena okwela wehu Omwene wa Mulugu, Yehova onivaha nifumo niina na ttima.

OLALEYA ONOVUNA DHIGUMI

8. (a) Murumiwi Paulo walogela eni wila mabasa a olaleya ali niga nifumo nili mbiyani y’ologo? (b) Paulo olagihile dhavi wila wanziveliwa olaleya?

8 Yezu onittoma walaleya vina wasunziha attu miselu dhapama dha Omwene wa Mulugu. (Mateu 28:19, 20) Murumiwi Paulo ologa dha mabasa abo ninga nifumo nili mbiyani y’ologo. (2 Korinto 4:7; 1 Timóteo 1:12) Sabwa yokala attegi nili ninga biya y’ologo. Mbwenye muselu onlaleya iyo oli ninga mafumu sabwa onodhana egumi yohimala mwa iyo vina abale annivuruwana. Noona Paulo waloga eraga: “Dhetene esi ddinirela muthaka wapama, wi miyo vina ddijevo dhorela dhindhamo.” (1 Korinto 9:23) Paulo olaba vaddiddi wila asunzihe attu Omwene wa Mulugu. (Kengesa Roma 1:14, 15; 2 Timóteo 4:2.) Okwela miselu dhapama, ononikamihedha walaleya attu masiki nifwarafwariwe. (1 Tesalónika 2:2) Ninamutagihe dhavi Paulo wi nikwele mabasa a olaleya?

Muselu onlaleya iyo oli ninga mafumu sabwa onodhana egumi yohimala mwa iyo, vina abale annivuruwana

9. Ninalagihe dhavi wila ninokwela mabasa a olaleya?

9 Sabwa ya okwela ebaribari, Paulo olabihedha gari na mudhidhi waniye wila alaleye miselu dhapama attu ena. Ninga Paulo vina Akristu a vyaka zana dhoroma, ninowalaleya attu miselu dhapama numba-numba, vattaddo vina mwego-mwegovi munawodhe iyo wafwanya. (Merelo 5:42; 20:20) Ninotamela marhe ottiyana-ttiyana wila nalaleye attu enjene miselu dhapama. Nigafuna ninele olaba ninga apionero okamihedha obe a mudhidhi wotene. Obe nigasunza elogelo yina ninele omwalela wego obe mwilaboni munjombeliwa anamalaleya.—Merelo 16:9, 10.

10. Irene opurilemo nni na mabasa aye olaleya miselu dha Omwene?

10 Irene murogora dhahi wa muziye, onkala Wamerika wanfuna walaleya miselu dhapama attu aloga elogelo y’o Rusiya. Yaka ya 1993 wahidhowa bagatugumana na nikuru na elogelo y’o Rusiya nali o kwatti yo Nova Iorque. Mudhidhi obo nikuruna naana anamalaleya 20 bahi. Mmvireli vyaka 20 Irene ologa wila, “Mpaka ovanene kaddinwodha ologa deretu Erusu.” Yehova wahimukamihedha vamodha na anamalaleya abale eena wila afiyedhena attu miselu dhapama na elogelo yawa. Yohagalalihaya jawi ovanene o  kwatti ya Nova Iorque oli milogo mitanu na mmodha dha elogelo ya Erusu. Irene omusunza Bibilia na attu enjene nanda kumi na atanu mwa abaya, amala obatiziwa. Ena ankamihedha o Betel, enaya apionero vina anddimuwa a mulogo. Irene bela, “Ddigobuwela mabasa menjene afunemi okosa kawo anddisazayiha opitta otamela Omwene.” Mohaganyedha, nifumo na Irene, Omwene wa Mulugu!

Onovuwiha muselu wapama nanda onotamela mudhidhi wi okose ejuwene ninga porograma yawo ya sumana? (Koona ddima 11, 12)

11. Masiki nifwarafwariwe, dhopurelamo gani dhinkanihu nigadidela olaleya?

11 Akala nifumo nehu ku Omwene wa Mulugu, ninele omutagiha murumiwi Paulo walaleya miselu dhapama masiki afwarafwariwaga. (Merelo 14:19-22) Motagiha, oromana yaka ya 1930 na 1944, abali o Estados Unidos ahiroma ofwarafwariwa mwabure-mwene. Masiki dhawene akalelavi ntidi mabasa awa olaleya. Alamuleli agaloga wila abali attiye olaleya awene andowana makaniya omuttegoni munddimuwa. Yaka ya 1943, Mbali Knorr wahivuwiha dila yoroma mpemberho wapemberhilani omuttegoni munddimuwa (Suprema Corte) wa U.S. Abali kottiya olaleya kagapemberhile omuttegoni munddimuwa. Iyene wahenjedhedha wila sabwa ya makani aba, abali a dhilabo dhina ahidhowavi alaleyaga. Ofarafariwa kuwattimihile mabasa otene. Sabwa y’omukwela Mulugu, masiki nifwarafwariwe kaninattiye olaleya.

12. Txini eganiliwe okosa?

12 Weka ttima mabasa olaleya, kuntapulela bahi ozuzumela mawora amperheka iyo kadda mweri. Entapulela okosa eli yotene wila nilaleye “Muthaka Wapama.” (Merelo 20:24; 2 Timóteo 4:5) Kito ninasunzihe eni attu ena? Koona nifumo niina nindha wa Mulugu.

 EBARIBARI-EBARIBARIYA ESUNZILEHU

13, 14. Koddi “nifumo” naloga Yezu va Mateu 13:52, nintapulela nni, nanda ninawodhe dhavi ofwanya?

13 Ebaribari ensunza iyo, tti nifumo ninivahile Mulugu. Yehova tti Nipara na ebaribari. (2 Samuwel 7:28; Masalmo 31:5) Ninga Babi wovaha, onofuna-wene onigawela ebaribari ya Nzu naye. Mpaka ovanene, ninosunza dhilobo dhinjene na Nzu naye, mmanivuruni, mmatugumanoni a kadda sumana, sembeleya na kongeresu. Mudhidhi ontamela iyo vaddiddi-vene ebaribari, ninele ofwanya ninga mulogeli Yezu eraga “nifumo” nebaribari “dhorela dhiswa na dhawale.” (Kengesa Mateu 13:52.) Yehova onele onikamihedha ofwanya ‘nifumona nigatamela ebaribari na mukalelo wakakene ontamelana iyo parata obe nifumo niviteyile.’ (Kengesa Gano 2:4-7.) Ninakose dhavi ejoya?

14 Nizuzumele omusunza Bibilia, manivuru meena obe opepesa. Ejo enele onikamihedha ofwanya ebaribari ‘eswa’ yalihu nihinatti oziwa. (Josuwé 1:8, 9; Masalmo 1:2, 3) Revista A Sentinela noroma nilaleyiwe Julho de 1879, nahiladdaniha ebaribari ninga marhuwa ali vari va minga. Wila muttu afwanye marhuwaya onofanyeela otamela na pasope. Muttuya agagumela kanaziveliwe okaana nrhuwa nimodha. Onele otamelavi wila akaane marhuwa menjene. Na mukalelo wakakene, kanin’hagalala nigafwanya ebaribari modha ya Bibilia. Ninodhowavi banigatamela ebaribari yina ya Bibilia.

15. Dhibaribari dhina ninoneyela eni ninga dhawale, oku nikuluvelaga?

15 Muttu agaroma omusunza Bibilia, onofwanya ebaribari yina yohagalaliha. Dhinadha ninelege okuwela ninga “dhorela dhawale” sabwa nisunzile wale. Ebaribariya ejo jivi? Voroma nihisunza wila Yehova ddi muttanddi wehu, nanda okaana dholibela wa nlogo n’attu. Nihisunza vina wila Mulugu wahimuruma mwanaye velaboni ya vati wila akwe ninga mukutto wi anobole muttegani vina mu okwani. Nihisunza wila Omwene wa Mulugu onogomiha makattamiho etene annipatta wi nikalewo namukalakala, velaboni ya vati na murenddele vina osanzaya.—Joau 3:16; Ovuhulela 4:11; 21:3, 4.

16. Akala ebaribari ya Bibilia enosadduleliwa ninavyone dhavi?

16 Mudhidhi mwina enonelo yana iyo ya nivuhulo na mBibiliani ninosadduliwa. Nigona ntapulelo niswa na nivuhulo nivilibihedhe osunza mowakwana vina otanalela. (Merelo 17:11; 1 Timóteo 4:15) Yamakamakaya kahiyo ottiyaniha enonelo ya wale vina eswa, mbwenye ofwaseyela woona dhologadha dhenjedhedhiwe mmalelani osadduleliwa museluya. Osunza oko w’ofwaseyela onele onooniha wila munonelo muswa wa ebaribari ya Bibilia bopureleyamo vina ninele ofuna okoya. Okosa guru ninga ejuwene okalelini elobo yaderetu?

17, 18. Muya wokoddela onnikamihedha dhavi?

17 Yezu wahiloga wila muya wokoddela wa Mulugu ogahinikamihedha wubuwela dhetene dhisunzilehu masaka a mundduni. (Joau 14:25, 26) Onnikamihedha  dhavi nalaleyaga miselu dhapama? Ninfuna niloge yotagiga ya mbali Pedro. Yaka ya 1970 wana vyaka 19, nanda wela oromawene okamihedha mabasa o Betel y’o Grâ-Bretanha. Pedro alaleyaga numba-numba, wahinfwanya mulobwana dhahi wana nddevu gwé. Wahinvuza mulobwana oddule akala agahiziveliwa omusunza Bibilia. Mulobwanaya wali namasunziha wa Ayuda, wahisilidhiwa vaddiddi sabwa ya Pedro ologa akala agahirumeela omusunza Bibilia. Mulobwana oddule wa Muyuda wahinvuza, “Nivuru na Daniyel, nalebiwe na elogelo gani?” Pedro ologa, “Epaddi yina ya nivuru ntti nilebiwe na Eramaiko.” Pedro ologa vina “Mulobwanaya wahitikina vaddiddi mooneliye wila ddahiziwa yowakulaya—mbwenye wattikiniletxe wali miyo! Ddaziwile dhavi yowakulaya? Mfiyelimi vatakulu ddahidhowa opepesa mu A Sentinela vina Despertai! a myeri dha mundduni nanda ddahifwanya mutoma waloga wila nivuru na Daniyel nalebiwe na Eramaiko.” (Daniyel 2:4) Muya wokoddela onele onikamihedha wubuwela dhilobo dhisunzile iyo malabo a mundduni nanda banikoya ninga mafumo awale.—Luka 12:11, 12; 21:13-15.

18 Akala ninokwela esile dhinsunza iyo dha Yehova vina akala ninotamaalela esodha ninele wenjedhedha mmafunoni ehu. Nigakosa ejuwene ninele woona wila nili omala na wale wila naasunzihe attu eena.

BARELÁ NIFUMO NAWO

19. Ekalelini yofuneya obarela nifumo nehu nomuyani?

19 Mutoma obu nihisunza ttima ena mafumo omuyani. Mbwenye japama okala oliba pwí wila Satana anadhe obanihe okwela onnihu na mafumoya aba. Nigahikale pasope ninele okwekwetteya na otamela ganyo ya kobiri gwé, ozuzumela dhorela. Murumiwi Joau ononubutxedha wi elabo ejino vamodha na monlelo aye dhinovira. (1 Joau 2:15-17) Noona nitamalele vina mibarele mafumo aba omuyani anihuna, wi ninadhe wakihiwa.

20. Txini enakosiwe wi obarele nifumo nawo nomuyani?

20 Kanyanyala merelo ali otene agobanihile okwela wawo Omwene wa Mulugu. Kagana olaleya miselu dhapama na ntidi, nanda txipo kuwobanele mabasa olaleya. Kapepesavi ebaribari ya Bibilia. Ogakosa ejuwene onele owugela “wirimu nifumo nihintoda, nihinfwanyeya na ambava, nihinjiwa oyetxe. [Sabwani] vali muhaku wenyu, pali murima wenyu.”—Luka 12:33, 34.