Skip to content

Skip to table of contents

Anamoona a Yehova

Select language Etxuwabo

Wanziwa?

Wanziwa?

Yezu walogelani wila abale aguliha dhinama mumparhani w’o Jeruzalemi ali “ambava”?

VA MUTTAKANI wa Mateu ninowengesa: “Yezu ovolowa mumparhani, oawigaramo anamagula na anamaguliha, obiddula meza a abale akakanya kobiri, vina ddelele dha abale aguliha kangayiwa, alogaga dhahi: ‘Mbíbiliani mulebiwa: Numba yaga ji numba ya malobelo; nyuwo ddabuno musaddula jikala gurugudha ya ambava.’”—Mateu 21:12, 13.

Anamaloga mapadduwo anlagiha wila anamaguliha a mumparhani anaranjula anamagula awa. Motagiha, kangayiwa yali elobo yohirutxa wila ayelegi agule akosena mukutto. Dholeba dha wale dha Ayuda dhinloga wila mvireli vyaka dhoroma, attu enjene ampitxa korowa yakwana denariyu (muttungo munddimuwa) wila agulena kangayiwa bili bahi. Muttengo obo wali kobiri yalaba muttu mwari mwa malabo 25. Kobiri yogulana kangayiwa yahinjiva vaddiddi, mpaka ayelegi ohiwodhaga ogula. (Onamakutha 1:14; 5:7; 12:6-8) Rabbi Simeon waziweya na nzina na Gamaliel, wahisilidhiwa vaddiddi ofiyedha ovugula muttengo wa mukutto warumiwe Ayuda wi avahe. Momaguva-mwene muttengo wa kangayiwa bili wahikita nanda kuwafiyedha denariyu modha.

N’eji ninowoona wila anamaguliha a mumparhani ali amukumbela vawa vina anapura anamagula awa. Noona Yezu walogaga wila anamaguliha abale ali “ambava.”