“Awirele dhetene dhinunlela murima wawo, akwanihe dhetene dhitadilewe.”—MASALMO 20:5.

JIBO: 11, 140

1. Txini enagane azombwe okosa musogorho mwawa? Nanda txini enakamihedhe ohikaletxa wozuzumene? (Koona foto eli omaromo.)

AKALA wa muzombwe onorumeela wila ohinatti okosa oleddo, japama oroma ovisasanyedha wi oziwe ondhowiwe. Egumi na okalawo oli ninga okosa oleddo, nanda mudhidhi wovisasanyedha bu obwene buli muzombwe. Mbwenye, enjene kanziveliwa okosa masasanyedho. Namwali dhahi ontxemerhiwa Helena ologa: “Jawopiya. Jorutxa vina okosa masasanyedho a esile dhinakose weyo mwigumini mwawo.” Akala weyo ononamo dhawene kobuwela wi Yehova onologa: “Kugurumele vowi miyo ddili Mulugu wawo. Miyo ddinoulibiha, ddinoukamyedha.”—Izaiya 41:10.

2. Onziwa dhavi wila Yehova onfuna wi ovisasanyedhele deretu dha musogorho?

2 Yehova onofuna wila okose masasanyedho awo a musogorho na eziwelo. (Kohelét 12:1; Mateu 6:20) Yofuna yaye jawi ohagalale. Ejo enopadduwa ogaroma woona, wiwa vina otanaalela dhottandda dhaye. Yehova ononikamihedha na  mikalelo dhina. Ononivaha malago vina onisunziha mukalelo wokalawo waderetu. Noona attu agapwaza malago aye a eziwelo, iyene txipo kanagalala. Iyene onowawaddela abale ahinfuna ofwara malago aye: “Musakulile ehinddizivela. . . . [Kewani!] Emeleli aga anere oja, oku nyuwo mukwaga dala. [Moone!] Emeleli aga anere wiba n’ohagalala wetene, oku nyuwo mukuwaga na wiw’opa, mubudhaga na marimaddí mmurimani.” (Izaiya 65:12-14) Nigakosa dhosakula dh’eziwelo mwigumini mwehu, ninele odhana ntamaalo wa Yehova.—Gano 27:11.

KOSÁ MASASANYEDHO ANOHAGALALIHE

3. Yehova onupaganyela okosa nni?

3 Yehova onufunana masakulo gani? Voroma, wila ohagalale vanofuneya omuziwa Yehova vina omulabela. Eji ji sabwa yattanddele attu Yehova. (Masalmo 128:1; Mateu 5:3) Dhinama dha muddebe dhinoja, omwa vina dhinobalana. Mbwenye Yehova onfuna wila okose dhosakula vina dhogana dhapama mwigumini mwawo na mukalelo onovahe ohagalala vina osanzaya. Muttanddi wawo ddi “Mulugu onvaha okwela” “Mulugu wotamaleleya” omuttanddile muttu “woladdana na iyene.” (2 Korinto 13:11; 1 Timóteo 1:11; Wita 1:27) Onele ohagalala ogamutagiha Mulugu wawo wokwela. Bibilia onloga: “Ovaha onothabiha opitha ovahiwa.” (Merelo 20:35) Waromaga ovubuwela dhahene weka? Eji ji ebaribari yoroma sabwa ya okalawo. Noona Yehova onfuna okose masasanyedho ohagalaliha a musogorho mowiwanana na omukwela wawo iyene vamodha na attu eena.—Kengesa Mateu 22:36-39.

Onele ohagalala ogalagiha wakwela attu eena

4, 5. Txini yamuhagalaliha Yezu?

4 Yezu Kristu, yotagiha yaderetu wa azombwe. Valiye mima, wanziveliwa ovega na waredha. Mazu a Mulugu anologa wi okalawo “mudhidhi wa wunla, mudhidhi w’oteya.” (Kohelét 3:4) Yezu wahimetxa mandano na Yehova odheela osunza malebo. Vaniye vyaka 12, anamasunziha magano mu mparhani animutikina “mwaha w’ononelamo waye, na dhawakula dhaye.”—Luka 2:42, 46, 47.

5 Vonuweliye, wahikosa ejile yanfunana Mulugu wi ahagalale. Motagiha Mulugu wanfunana wi afiyedhena “atabuwi mpaganyo onathabiha” vina “aliba ohona wiyelela wawa wona.” (Luka 4:18) Masalmo 40:8 anomuloga Yezu eraga: “Ejene jinunlelimi, Mulugu waga; malamulo enyu alí mmurimani mwaga.” Yezu wanziveliwa wasunziha attu miselu dha Babe. (Kengesa Luka 10:21.) Labo dhahi alogaga na muyana sabwa ya webedha webaribari, Yezu wahawaddela namafwara aye: “Oja waga kuvirihamo enddifunana Mulugu oddirumile, kupuliha mabasaye addivahileye.” (Joau 4:31-34) Yezu wanagalala sabwa wanakwela attu etene vamodha na Mulugu. Weyo ogakosa dhawene onela ohagalala vina.

6. Ekalelini yaderetu wawaddela attu eena dhogana dhawo dha musogorho?

 6 Akristu enjene anoroma mabasa a opionero balivi azombwe, nanda eji enowahagalaliha. Ogahiziveliwa oziwa vang’onovi dha masasanyedho awa? “Ohinvuza, dhintadiye kadhinedda; osogorha wa mabasa oli na ovuza zelu.” (Gano 15:22) Abali na arogora abo, anele owaddela wila mabasa opionero anele ouvaha nlelo ninawukamihedhe ohagalala mwigumini mwawo. Yezu wahisunza dhilobo dhinjene na Babe wirimu. Masiki valiye velaboni ya vati bagalaleya, wansunzavi. Wanziveliwa wafiyedhana miselu dhapama attu eena, nanda wanlibiha nroromelo naye masiki na makattamiho menjene. (Kengesa Izaiya 50:4; Ahebreu 5:8; 12:2) Ovano ndowe noone ohagalala ondha mmabasani a mudhidhi wotene.

WASUNZIHA ATTU MABASA AMAKAMAKA

7. Azombwe enjene ampuramo nni na mabasa a wasunziha attu?

7 Yezu onaddela wi “dhowani mwasunzihe athu” akale anamasunza aga. (Mateu 28:19, 20) Akala mabasa aba anokosa mpaddi wa dhogana dhawo, onele osanzaya mwigumini mwawo vina onele omuriha Mulugu. Dhahene ninga mabasa-mabasavi, japama okaana mudhidhi wila wunuwe omuyani wi orumelihiwe mabasaya. Mbali onromoliwa Timóteo oromile opionero bali muzombwe ologa: “Ddinoziveliwa omulaba Yehova mmabasani a mudhidhi wotene, sabwa dhawene ddinolagiha omukwela waga. Omaromo kaddana anamasunza a Bibilia, nomala ddimwalela mburo mwina, nanda na meri dhing’onovi ddikana anamasunza enjene. Namasunza mmodha onodhaga woona matugumano. Mmaleli Eskola ya Bibilia ya Abali a Aziye, ddahittomeliwa wego wina, ddina anamasunza anai. Ddinoziveliwa wasunziha attu, ddinowoona muya wokoddela, osaddulaga mirima dhawa.” * (Koona yowenjedha.) —1 Tesalónika 2:19.

8. Txini ekosile azombwe enjene mowiwanana na nlamulo na walaleya attu owinjiva?

8 Azombwe enjene anosunza dhilogelo dhottiyana. Motagiha, Jakobi onkala wa Amerika oleba: “Vanimi vyaka tanu na bili, akwaga enjene a oskola aali o Vietname. Ddanfuna vaddiddi wasunziha dila dha Yehova, noona ddahigana osunza elogelo yina. Mudhidhi mwinjene ddasunza na oladdaniha mitoma dha Revista Mwang’aneli wa elogelo ya Engelezi na Evietinamita. Nomala ddahiroma okosa mandano na abali a mulogo wa evietiname. Vanimi vyaka 18 ddahiroma mabasa a opionero. Musogorhomwa, ddahikuweliwa wi ddoone Eskola ya Abali a Aziye. Eji yahiddikamihedha na mabasa attomeliwe miyo ninga munddimuwa wa mulogo o nikuruni na elogelo ya Vietiname. Attu enjene a Vietiname ahitikina vaddiddi monelani wila ddahiziwa elogelo yawa. Enjiya anddikuwela wila ddivolowe mmawani mwawa. Anamasunza enjene arumeela obatiziwa.”—Kaladdaniha na Merelo 2:7, 8.

9. Mabasa a wakosa wasunziha attu annikamihedha okosa nni?

9 Mabasa a wakosa anamafwara anouzuziha  elemelelo ya mabasa aderetu, malogelo apama, weddeyana vina nroromelo. (Gano 21:5; 2 Timóteo 2:24) Mbwenye mabasa aba ba ttima vaddiddi sabwa anowusunziha orumeela vina okuluvela Malebo. Anonikamihedha vina onfiyedha kakamwe Yehova.—1 Korinto 3:9.

10. Onawodhe dhavi osanzaya na mabasa a wasunziha attu masiki egali yorutxa mmuruddani mwawo?

10 Weyo onele ohagalala na mabasa a wasunziha attu, akala attuya mmuruddani mwawo anoziveliwa omusunza Bibilia. Wasunziha attu na mulogo wotene anokamihedha olaba vamodha ninga nikuru. Masiki niziwaga wila onanfwanye muttu onrumeela oli mmodha bahi, ninosanzaya oziwa wi ninlaba vamodha mmabasani mpo. Motagiha Brandon, oli pionero mwa vyaka tanu na nayi, onlaba murudda oli attu ang’onovi anrumeela omusunza Bibilia ologa: “Ddinoziveliwa wasunziha attu miselu dha pama sabwa jijene enirumile Yehova wila nikose. Mabasa opionero ddiromile vagomihile miyo masunzo. Ddiziveliwa walibiha abali enjene a mmulogoni mwaga wila azuzumele wunuwa wawa omuyani. Mmalelimi okosa Eskola ya Abali a Aziye, ddahittomeliwa mabasa meena opionero. Ddiziwa wila mmuruddani onlaba miyo kaddinanfwanyaga muttu odhowile vasogorho ofiyedha obatiziwa, ninga eena. Ddihagalala oziwa wila ddisakulile okamihedha mabasa a wasunziha attu ebaribari ya Mulugu.”—Kohelét 11:6.

KAKOSA DHOGANA DHAPAMA

11. Marhe gani omulaba Yehova anjavo azombwe enjene?

11 Dhihikalawo gari dhinjene dha omulabela Yehova. Motagiha azombwe enjene anokamihedha mabasa a omaga. Dhinofuneya Numba dha Omwene dhinjene. Mmimburoni eso munowebedhiwa Yehova, noona okamihedha omagawa onele wuhagalaliha. Onele ohagalala sabwa y’olaba vamodha na arogora vina abali okweleya. Onele osunza dhilobo dhinjene, ninga okosa mabasa aderetu, oliba vina wiwanana na asogorheli awo a mabasa.

Abale anlaba mabasa a mudhidhi wotene anowakela mareliho menjene (Koona ddima 11-13)

12. Mabasa opionero anvaha gari gani?

12 Mbali mwina ontxemerhiwa Kevin ologa: “Oromana baddili mima, ddanfuna olaba mabasa a mudhidhi wotene labo-labovi. Nomala ddihiroma mabasa opionero baddina vyaka 19. Ddiromile olaba mudhidhi mung’onovi, okamihedha mabasa omaga. Ddihisunza opibela numba, wika majanela na misuwo. Nomala ddimala vyaka bili ddilabaga na abali a nikamihedho sabwa ya ngovi, nimagaga Numba dha Omwene vina ovenyihedha numba dha abali. Vafuniwani wenjedhedhiwa katti y’o Afrika do sul, ddahiwobiwa nanda baddidhowa. Baddilivi wenewo ddahidhowa wego wina wafuniwa Numba ya Omwene, nilabawo sumana vang’onovi. Nikuru naga na omaga, ninokwelana ninga anamudhi. Ninkala vamodha, omusunza  Bibilia vina ninlaba notene. Ninopura vina odhowa mmalaleyoni sumana dhotene na abali a vamuruddaniva. Dhogana dhakosile miyo baddili mima, dhiddivaha ohagalala opitta mwajeedhela miyo.”

“Dhogana dhakosile miyo baddili mima, dhiddivaha ohagalala opitta mwajeedhela miyo”

13. Azombwe enjene ansanzayela nni omulaba Yehova akamihedhaga mabasa o Betel?

13 Enjiya aali apionero, ddabuno ankamihedha o Betel. Mabasa o Betel, anohagalaliha sabwa dhetene dhinkosa weyo, onimukosela kakamwe Yehova. Anamudhi o Betel, anokamihedha opakiwa manivuru menjene anakamihedha attu osunza ebaribari ya Yehova. Mbali onkamihedha o Betel onziwiwa na Dustin ologa: “Ddihikosa mabasa a mudhidhi wotene ninga yogana yaga, vaana miyo vyaka tanu na nayi nanda ddihiroma opionero mmalelimi osunza. Yaka modha musogorhomwa ddikuweliwa wi ddikamihedhe mabasa o Betel, osunzile miyo olabihedha dhipano dhopidana, vina olaba na komputadori. Enddizivela o Betel, ku wiwa voroma-vene wunuwa wa muttengo wa anamasunza a Yezu orugunuwa elabo yotene. Ddinoziveliwa olaba o Betel, sabwa ninowakamihedha attu onfiyedha Yehova.”

ONAGANE OKOSA ENI YA MUSOGORHO MWAWO?

14. Onubuwela dhavi ogana okosa mabasa a mudhidhi wotene?

14 Onawodhe dhavi ovisasanyedha wi okose mabasa a mudhidhi wotene? Wi  omulabele Yehova na mukalelo wapama onofwanyela okaana yimelelo ya Okristu. Osunze Mazu a Mulugu malabo etene, otanaalele dhinengesa weyo vina olagihe nroromelo nawo modheela ovaha dhowakula dhapama mmatugumanoni. Mudhidhi oliwe mmasunzoni, kapura gari ya ologa na attu eena miselu dhapama. Kalagiha na nriho wila onowakwela attuya, wavuze dhinubuwelani vina wavuruwane avahaga monelo wawa. Ottiya eji, weyo poddi okamihedha mabasa a mmulogoni ninga okuputta Numba ya Omwene. Yehova oli womala na wale wi alabihedhe abale aniviyeviha, vina anfuna okamihedha mabasaya. (Kengesa Masalmo 110:3; Merelo 6:1-3) Murumiwi Paulo wahimuwobela Timóteo olaba na iyene mabasa omisionario sabwa “Akristu a o Lístra vina Ikónio, animuriha vaddiddi.”—Merelo 16:1-5.

Mudhidhi oliwe mmasunzoni, kapura gari ya ologa na attu eena miselu dhapama

15. Txini egakosile weyo wila ofwanye ganyo enokamihedhe okala pionero?

15 Enjiya anttidda mabasa a mudhidhi wotene, anofuna okaana ganyo. (Merelo 18:2, 3) Txino weyo podi okosa kursu eng’onovi wila yukamihedhe ogumela ganyo mmuruddani mwawo. Kaloga na nameddelela wa mulogo wawo, vina apionero eena wi okamihedhe obe ovahe zelu na dhogana dhawo. Noona Bibilia onologa: “kathiya mmadani mwa Nabuya mabasa awo; dhahene dhobuwele weyo dhinowireya.”—Gano 16:3; 20:18.

16. Mabasa a mudhidhi wotene anoshagiha dhavi wi ottomeliwe dhilobo dhina musogorho?

16 Kakaana ebaribari yawi Yehova onfuna wi ‘okale woliba’ vina wohagalala musogorho mwawo. (Kengesa 1 Timóteo 6:18, 19.) Mabasa a mudhidhi wotene anele wukamihedha okala Mukristu woliba omuyani sabwa y’olaba na akamihedhi eena a mabasa abo. Enaya ahoona wila ottidda mabasa a mudhidhi wotene bali azombwe, musogorho-mwa adha okamihedheya mmateloni mwawa. Enjiya abale aali apionero ahinatti otela, enaya ahiyelela mabasa opionero ninga atelani.—Roma 16:3, 4.

17, 18. Okosa dhogana dhapama enfunelani wekamo murima?

17 Masalmo 20:5 anologa dhahi sabwa ya Yehova: “Awirele dhetene dhinunlela murima wawo, akwanihe dhetene dhitadilewe.” Ogakosaga dhogana dhawo dha musogorho, kobuwela makamaka enakose weyo mwigumini mwawo. Kobuwela enkosa Yehova mmasikuni ehu nanda kewananiha n’ejile enakose weyo mmabasani-mwa. Ogamala kagana okosa enamuhagalalihe iyene.

18 Ogalabihedha egumi yawo wila omulabele Yehova, weyo onele ohagalala. Txibarene, vowi “Nabuya ddinuthabiha, onouvaha enthopa murima wawo.”—Masalmo 37:4.

^ par. 7 Eskola eji ddabuno entxemerhiwa Eskola ya Anamalaleya a Omwene.