Skip to content

Skip to table of contents

Anamoona a Yehova

Select language Etxuwabo

Kapemberha Koddo ya Dhubuwelo

Kapemberha Koddo ya Dhubuwelo

WEYO okaanavi koddo! Mwiddaniya ddi Satana, nanda iyene onolabihedha futti yaguru. Futtiya enna Satana, ja obeddegelana yubuwelo yehu, ottiya maningo. Futti gani? Poropaganda!

Murumiwi Paulo wanziwa wi poropaganda dha Satana sa wopiya vaddiddi. Mbwenye kayo wila Akristu otene anononelamo wopihawa oko. Motagiha, Akristu enjene o Korinto, avyona ninga alibile vaddiddi mwibaribarini, ofiyedhaga woona wila kagattiddiwe na Satana. (1 Korinto 10:12) N’eji Paulo wahavaha muselu dhahi: “Apa ddinowova munasadduwe, [yubuwelo yenyu] mudhé omwalana na Kristu, murimeliwe ofwaseya na okoddela wenyu murima, ninga yirile Eva onyengethiwe na mazu opyaga a nowa.”—2 Korinto 11:3.

Mazu a Paulo anlagiha wi kahiyo yaderetu okala muttu wovikuluvela bure. Wila niwodhe opemberha koddo eji, ninofuna otanalela mopiheloya, nigamala banitamela marhe a ovibarelana.

POROPAGANDA SAWOPIHA-WENE?

Poropaganda, anaddiwana mazu oziva vina onyengetta, anlogiwa wila akwekwette dhubuwelo dha attu wi ezinddiyeliwe enubuwelani. Mowiwanana na nivuru Propaganda and Persuasion, poropaganda mazu antota “opuja, widdana, vina obure.” Attu anokosa poropaganda alabihedhaga mazu “ozivala, opipiriha, onyengetta, okwekwetta, vina orheza dhubuwelo dh’attu.”

Poropaganda elobo yawopiya, sabwani enowodha okwekwetta yubuwelo yehu, iyo nanya s’ohonawo. Iyo podi oladdaniha poropaganda ninga pevo endana oyele ehinwodhihu woona. Vance Packard, oddu namasunza dhubuwelo dha attu, ologa wi poropaganda enopatta mukalelo onkosihu dhilobo “okwaranya  munubuwelelihu.” Muziwetxi mwina belaga poropaganda enowakosiha attu enjene okosa dhilobo dhabure vina dhawopiha ninga otota koddo, ofwarafwarana sabwa ya ottiyana wa marelijiau vina ttebe.—Easily Led—A History of Propaganda (Mapadduwo a Propaganda).

Akala attu anowodha onyengetta na poropaganda, Satana ddittabwile! Satana osunza yubuwelo ya muttu oromana nsaka nittanddiwe muttuya. Vina iyene onowodha wang’anela “elabo yotene,” noona onolabihedha elaboya wila apake ottambi waye. (1 Joau 5:19; Joau 8:44) Satana ‘onopiba dhubuwelo’ dha attu enjene na poropaganda dhaye, noona ‘onowakwekwettela attu otene mubureni.’ (2 Korinto 4:4; Ovuhulela 12:9) Koddi ninawodhe dhavi opemberha poropaganda esi?

LIBIHÁ NROROMELO NAWO

Yezu ologa wila ohikala marhe apama owodhana opemberha poropaganda dha Satana: “Munonona ebaribari; ebaribariyá jinaufuruleni.” (Joau 8:31, 32) Mu koddoni, munyakoddo onofuna otamela wodhana miselu dhebaribari, sabwa amwiddani aye anopaka ottambi wila amugumele. Kito weyo onadhena wuvi miselu dhokuluveleya? Yehova onnivaha miselu eso odheela Nzu naye, Bibilia. Mwenemo mukala marhe opemberhana poropaganda dhetene dha Satana.—2 Timóteo 3:16, 17.

Satana onoziwa ejiya. Noona iyene onolabihedha elabo wila anipupurutxe, vina obanihe efunelo yehu y’omusunza Bibilia. N’eji, kanirumele onyengettiwa na “opyaga wa Satana”! (Éfeso 6:11) Eji kintapulela wila nikaane eziwelovi ya ebaribari bahi. Japama okosa kukuttu wila nikaane matibelo a eziwelo yehu ya ebaribari. (Éfeso 3:18) Ninga mulogeli namaleba dhahi oniliwa, Noam Chomsky, “Kawo muttu onadhe wika ebaribari mu ogogoni mwawo. Ebaribari, elobo enfwanyela muttu-muttu otamela mwinyene wila anonelemo.” Noona “katamela wila ofwanye wamwinya” odheela ‘opepesa Malebo okoddela malabo otene.’—Merelo 17:11.

Wila niwodhe opemberha koddo eji, ninofuna otanalela mopiheloya, nigamala banitamela marhe a ovibarelana

Satana kanfuna wila ononelemo deretu ebaribari enaddeliwa weyo. Sabwaya? Sabwani poropaganda ‘ononeya wi ohilaba’ akala onowodha wapupurutxa attu enjene.’ (Media and Society in the Twentieth Century) Onarumelele dhetene dhiniwa weyo, s’oroma otanaalela. (Gano 14:15) Mulugu onivaha ewodhelo ya “oziwa opimelela” vina “ononelamo” wila nilibihena  nroromelo nehu.—Gano 2:10-15; Roma 12:1, 2.

KALÁVI MUMMODHANI

Anyakoddo anivittiya okwekwettiwa na poropaganda, anoroma wova vina wundeya guru dhorabana koddo. Poropaganda onowodha wakosiha anyakoddo owana anya-nyavi, obe obudduwa munikuruni na anyakoddo ena. Mowiwanana na seundda wa anyakoddo o Alemanha, anyakoddo aye apemberhiwa mu Koddo Yoroma ya Mulimau sabwa ya poropaganda dhakosa amwiddani awa. Iyene belaga attu otene ahijeriheya na poropaganda okalaga ninga onddeyeli guru guru. Satana onolabihedha masalapitto akene wila atolotxe wiwanana wa Akristu nsaka nttino. Motagiha iyene onotota ohiwanana vari va abali. Obe onowakosiha wubuwela onyanyala nikuru na Yehova awoniga ninga attu ohifanyelela obe sabwa y’okosa elobo yabure.

Kurumeele onyengettiwa! Fwaraní malago ali mu Nzuni na Mulugu vina kalanivi mumodhani na abali. Bibilia ononilibiha eraga “mulevelelagane dhetene dhinthegelana nyuwo” vina momaguva gomihaní magudulano anneyu. (Kolosi 3:13, 14; Mateu 5:23, 24) Eji enonirabeliha ovisugula mmulogoni. (Gano 18:1) Kakala womala na wale wila opemberhe masalapitto a Satana. Kavivuze, ‘Labo nttile naddinyimulile mbali, mwakulelo wamwakulimi waziveliwena ddi Mulugu obe Satana?’—Galásia 5:16-26; Éfeso 2:2, 3.

KUWOBANIHE OKULUVELA WAWO

Munyakoddo onkodda wiwelela malago a seundda waye, kampemberha. Amwiddani anolabihedha poropaganda wila anonge wiwanana wa anyakoddo na mwimeleli wawa. Akala aseundda anovonya elobo, amwiddani anologa eraga “Kamwakuluvele dhinkosani!” obe “Kammuttiye ougwihedhani ntowa!” Satana oli dhawene. Iyene onolabihedha ozivala-wene oko wila agwadde ekuluvelo ena iyo sabwa ya attu anattoma Yehova wi anisogorhele.

Onawodhe dhavi ovibarela? Kagana okalavi munikuruni na Yehova. Kakalavi woweddeyana vina wawiwelele abale attomiwe na Mulugu wi asogorhele nlogo naye masiki valani attu ohiligana. (1 Tesalónika 5:12, 13) Dila dhina asadduweli anokosa guru wila agomihe nikuru nehu. (Titu 1:10) Masiki awene akalaga ninga anloga dhebaribari “Kamurumele onyengetheya.”  (2 Tesalónika 2:3) Kafwarani malago a Paulo anvahiliye Timóteo: “Weyo othiddelavi ejile esunzilewe,” vina “omubuwelaga omuravilewe.” (2 Timóteo 3:14, 15) Katanaalela sabwa eli yotene enlagiha wila weyo onowodha omukuluvela mwimeleli wororomeleya na wa malago onimulabihedha Yehova mwari mwa vyaka dhinjene wila asunzihe ebaribari nlogo naye.—Mateu 24:45-47; Ahebreu 13:7, 17.

KUWOVE

Satana onotamela wubeddegela na marhe ottiyana-ttiyana. Dila dhina iyene onotamela outxutxa wila orome wova. Otxutxa, ‘marhe aromile wale ananyapwariha attu sabwa ya poropaganda.’ (Easily Led—A History of Propaganda) Philip M. Taylor, oli purusori o Grã-Bretanha oleba wila akadda Asiriya alabihedha otxutxa na poropaganda dha wopiya wila apemberhe amwiddani awa. Satana onolabihedha wova, ninga wawova attu, ofwarafwariwa, vina wova okwa wila anittiyihe omulaba Yehova.—Izaiya 8:12; Jeremiya 42:11; Ahebreu 2:15.

Kumuttiye Satana oupemberha! Yezu ologa: “Kamwawovege abale anupani, ahinwodha owirelani yina osogorho.” (Luka 12:4) Kakaana ebaribari yawi Yehova onele oukoya vina owoniha wila “owodha oku onddimuwa kundha mwa iyo, ondha mwa Mulugu,” vina onele oukamihedha opemberha manyengetto a Satana.—2 Korinto 4:7-9; 1 Pedro 3:14.

Joziweya wi mudhidhi mwina ninottiddiwa wova na wobana. Mbwenye kobuwela mazu a Yehova ampangarhazile Josuwé: ‘Magá murima.’ “Kuwove, vowi Nabuya Mulugu wawo, onokala na weyo, vego pa vego vanadhowege weyo.” (Josuwé 1:9) Akala onokumuwa, momaguva kalobela wa Yehova. Kaaná ebaribari yawi “Murenddele wa Mulugu, ompitta thontho ya muthu, onere okoya mirima na mobuwelo enyu.” Ogamala onele owodha opemberha manyengetto otene ampaka Satana.—Filipi 4:6, 7, 13.

Onowodha wubuwela poropaganda yalogile Rabusaken, kazembe wa anyakoddo a Asíria wila atxutxe nlogo na Yehova? Iyene wafuna arumeelihe nlogo wi kawo muttu onawodhe ovuna nlogona mmadani mwa akadda Asíria, nne vina Yehova kanawodhe. Iyene wankuwa eraga ddi Yehova wamurumile akadda Asiriya otolotxa nlogona notene o Jeruzalemi. Yehova wakulile dhavi? “Kuhove mazu ewaliwe, addisuthilena emeleli a mwene w’o Asíria.” (2 Amwene 18:22-25; 19:6) Yehova wahimuruma mumgelo batolotxa anyakoddo 185.000 a akadda Asíria!—2 Amwene 19:35.

KALÁ WEZIWELO—OMVURUWANE YEHOVA

Waromaga omoona muttu anyengettiwaga? Ogamoona onokala ninga okuwe wila: Onarumele, iyeneya onounyengetta! Dhinloga oddoya ottambi!’ Ovano katanalele angelo owonaga buganyengettiwa, nanda akuwaga: “Kurumele dhinloga Satana, iyene onounyengetta!”

Kuvuruwane-wene poropaganda dha Satana. (Gano 26:24, 25) Onvuruwane Yehova nanda omuroromele na dhetene dhinfuniwe okosa. (Gano 3:5-7) Iyene onoukwela vina onoukokomeza eraga: “Mwanaga, kalá wowarala, oddipangarhazena.” (Gano 27:11) Ogakosa dhahene onele opemberha koddo dha muyubuweloni mwawo!