Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Julyu ya 2017

Mavuzo Ankosa Anamengesa

Mavuzo Ankosa Anamengesa

Jorumeliwa Mukristu Okaana Futti wi Avibarelena?

Akristu anofara magano a Bibilia agakosaga dhosakula dha mukalelo w’ovirabeliha vina ovibarela obuddugeliwa. Magano abo anologa wila jawopiha Mukristu olabihedha futti, mwalago, mbeni obe epano yina wila avibarele obe arabele obuddugeliwa na attu eena. Katanaalela malago aba:

Egumi ja ttima vamentoni va Yehova. Munasalmo David ologa dhahi amwaddagana Yehova: “Mwa nyuwo puli fukuwa enkaliha egumi.” (Masalmo 36:10) N’eji, Mukristu asakulaga marhe ovibarelana onoroma otanaalela anfwanyela wila anadhe akaane muladdu wa okuttula nikami, obe muladdu w’ompa muttu.—Olibiha 22:8; Masalmo 51:16.

Ebaribari jowila epano ji epano enalabihedhe muttuya wila avibarelena podi omuraviha muladdu wa nikami. Mbwenye dhipano ninga futti, dhinompa muttu masiki akala namapayá okosile s’ohifuna obe mwa pudha. * (Koona yowenjedha.) Ottiya eji, muttu onimbuddugela mukwaye txino ekana emusilidhile, nona, akala onoziwa wila weyo ohikana epano yovibarelana, iyene onottabwa onyaguleya bagobuwela wila ddigahimwirele kukuttu, onoddipa.

Valogile Yezu wila arumiwi aye attukule masupadda omattiyu ahinatti okwa kiyatapulela wila afuna avibarelena. (Luka 22:36, 38) Yezu werele asunzihe elobo yapama arumiwi aye: Arumiwi aye kattamagele olupela n’owali, masiki akala ambuddugeliwa n’attu enjene anna futti. (Luka 22:52) Muttukuleli Pedro supadda nanda agwadda niyaru na mwimeleli wa namakutta, Yezu wahimusisigula Pedro: “Keka supadda nawo mbuddunimwá.” Ekosile Yezu yali magano agafwarile Akristu nsaka nttino n’ovanene: “Vowi ompa na supadda, onopiwana.”—Mateu 26:51, 52.

Ninga mulogiwani va nivuhuloni na Mikeya 4:3, attu a nlogo na Mulugu “aner’osaddula masupadda akale iba, myalago dhikale akarhonga.” Akristu ebaribari anoziwiwa sabwa y’okala attu a murenddele. Awene anofwara kakamwe malamulo a Mulugu avahiwe murumiwi Paulo eraga “onuthegelani, kammwirele yabure yakene” vina “egawodheya, mwandane na athu otene bari munwodhela nyuwo.” (Roma 12:17, 18) Masiki Paulo vagumaniye makattamiho menjene, ninga ‘obuddugeliwa na ambava,’ iyene txipo kakosile elobo yagudulana na magano a Bibilia na efunelo y’ovibarela. (2 Korinto 11:26) Ottiya eji wamukuluvela Mulugu nanda wanziwa wila magano a eziwelo ya Bibilia anodhana “ononelamo [onpitha] vipano dhorabana koddo.”—Kohelét 9:18.

Wa Akristu egumi ekaana ttima opitta dhorela. Ninoziwa wi “okalawo wa muthu kunthiddeleya na winjiva wa dhorela, masiki dhinjivevi.” (Luka 12:15) Noona akala ninologa na mbava oona futti na mukalelo wofwasa nanda nihiwodha omukurumutxa, japama ovirihamo malago a Yezu: “Muhiwane-wene na ole onuwirelani dhopuja.” Eji txino podi otapulela omuttiya muttuya wila attukule enfuneye. (Mateu 5:39, 40; Luka 6:29) * (Koona yowenjedha.) Masiki dhawene kintapulela wila nivittiyege wandeliwa atimbwini. Ninele orabela  obuddugeliwa nigafwara malago a Bibilia anloga rabelaní “ojiwa murima na dhetene dhinona mento.” (1 Joau 2:16) Elobo yina enanirabelihe ku oziwiwa na anamwanddamani ehu ninga Anamoona a Yehova.—Gano 18:10.

Akristu anoriha etanaalelo ya muttu mwina. (Roma 14:21) Abali agahinyimuwa obe orimeliwa nroromelo nawa koziwa wila okala mbali onna futti vanive enlabihedhiye wila avibarelena agafwanyiwa atimbwini. Txino mbali podi orumeliwa na alamuleli okaana futti vina olabihedha, mbwenye sabwa y’owakwela abali a mmulogoni, txipo kanigakosile elobo enoonihu wila enele wapupurutxa abaliya.—1 Korinto 10:32, 33; 13:4, 5.

Akristu anotamela okala tagiha wa attu eena. (2 Korinto 4:2; 1 Pedro 5:2, 3) Akala Mukristu onokaana futti enlabihedhiye wila avibarelena, iyene onowakela nikamihedho nomuyani nindela Mbibiliani na anddimuwa a mulogo. Akala iyene onosakula okanavi futti, bahito kanvaha yotagiha yaderetu. Yodhavoya jawila mbaliya oddo kanfwanyeela ottomeliwa mabasa a mmulogoni. Yakakene enopadduwa na Mukristu onlaba na futti malabo etene omabasani waye. Egahikala yaderetu Mukristuya otamela ganyo yiina, ehili weedda obe olaba na futti. *—Koona yowenjedha.

Mukristu onokosa dhosakula dhaye afunaga osunzela marhe owabarelana amudhaye vina iyene munya, mabasa analabiye. Akosaga dhosakula esi onolabihedha kakamwe magano a Bibilia. Mulugu wehu wokwela onivaha malago abo n’okwela. Noona mukristu onna mandano ofiyedhana na Yehova kanrumeela okaana futti vanive wila avibarele agabuddugeliwa na attinbwini. Awene anoziwa wila agamuroromela Yehova vina agavirihamo magano aye anele obareleya-wene.—Masalmo 97:10; Gano 1:33; 2:6, 7.

Goyi enddimuwa egafiya, Akristu anele omukuluvela Yehova, vina kanakose elobwene wila avibarele

^ par. 3 Mukristu podi osakula okaana dhipano (ninga futti, mwalago, nyambusa) wila asayena dhinama dh’oja, obe ovibarelana anenama a wopiya. Mbwenye akala iyene kanlabihedha futtiya, japama obulutxamo baladha vina attiye vego vohiviriwetxa. Mwilaboni munkoddihiwa okaana futti, obe akala alamuleli kanrumeela wila muttu-muttuvi akaane futti, Mukristu onowiwelela vina ovirihamo nlamulo ntto.—Roma 13:1.

^ par. 6 Wila oziwe ttarho dhina dhovirabeliha obuddugeliwa koona mutoma ologa Como evitar o estuprooli va Despertai! 8 de Março, 1993.

^ par. 2 Wila oziwe dhilobo dhina dhinloga mabasa anlabiwa na futti, koona mitoma dhili mu A Sentinela, 1 de Novembro de 2005, nikuku 31; vina 15 de janeiro de 1984, makuku 25-26.