Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Feverero ya 2017

Mavuzo Ankosa Anamengesa

Mavuzo Ankosa Anamengesa

Murumiwi Paulo ologa wila Yehova “kanarumele wi mufwanyiwe manyengetho ahinwodha nyuwo owanana.” (1 Korinto 10:13) Koddi ejoya enfuna etapulele wila ddi Mulugu onsakula na mutanene dhilobo dhinanipadduwele dhinawodhihu ovilela obe makattamiho anagumanena iyo mwigumini mwehu?

Ejo kahiyo ebaribari. Motagiha, mbali dhahi mwanaye wilovihoga. Babe bakala wokubanyene. Dila dhinjene wannivivuza, akala Yehova wela waweha wila amoone akala iyene na mwadhiye agahiwodha ovilela ngovi ninga eji. Mwilaboni mpuno mulihu, makattamiho ninga abene, anopadduwaga. Koddi eji entapulela ddi Yehova onang’anela dhetene dhimpadduwa mwigumini mwehu?

Nigapepesa nlebo va 1 Korinto 10:13, ninele woona wila Bibilia kanloga wila Yehova ddinsakula na mudhidhiya dhilobo dhinawodhihu ovilela obe makattamiho anagumanena iyo mwigumini mwehu. Ninlogela ani dhawene? Ndowe nitanaalele sabwaya.

Yoroma, Yehova ohavaha attu etene gari ya ofuru wosakula dhinfunani. Muttu-muttu onokosa dhosakula dhaye. (Olibiha 30:19, 20; Josuwé 24:15) nigakosa dhosakula dhinimuzivela Yehova, iyene txibarene onele oneeddiha. (Gano 16:9) Mbwenye nigakosa dhosakula dhabure, nijedhele wila ninele woona dhopurelamodha. (Galásia 6:7) Kowiliwa ddi Yehova onsakula makattamiho anagumanena iyo, nigahikaana ofuru wosakula?

Yanawili, Yehova kannibarela na “gari ya muthu-muthu.” (Kohelét 9:11) Attu enjene anogumanaga na ngovi dhinddimuwa sabwani awene ali mmudhidhini wabure na mburo wabure. Yezu wahiloga ngovi yapadduwile, vakwile attu 18 amotteliwe numba. Iyene wahitonyihedha mowooneya wila kahiyo Yehova watotile ngoviya eji. (Luka 13:1-5) Noona kahiyo ya zelu ologa wila muttu okwile obe oviluwile vangovini wahimala ofuniwana na Mulugu.

Yanoraru, muttu-muttu amuroromele Yehova. Satana onloga wila emeleli etene a Yehova, animwebedha sabwani onowavaha dhilobo gwé. Satana waloga wila nigagumanana makattamiho ottabwa ninele ottiya omuroromela Yehova. (Job 1:9-11; 2:4; Ovuhulela 12:10) Kowiliwa Yehova wela onibarela na dhoweha ninga esuwene, agahinvaha Satana mperhe.

Yanonai, Yehova kansakula wila aziwe dhetene dhinanipadduwele mwigumini mwehu na mudhidhiya. Yehova okaana ewodhelo ya oziwa enapadduwe musogorho iyene agafuna. (Izaiya 46:10) Mbwenye Bibilia onologa wila Yehova txipo kanatamelaga oziwa enanipadduwele musogorho. (Wita 18:20, 21; 22:12) Yehova ddokwela vina ddoligana, masiki dhawene iyene kantamela ofurtuta gari yehu y’ofuru wosakula.​—Olibiha 32:4; 2 Korinto 3:17.

Kito Paulo wafuna aloge eni veliye Yehova “kanarumele wi mufwanyiwe manyengetho ahinwodha nyuwo owanana”? Paulo wafuna aloge n’esile dhinkosa Yehova mudhidhi wa makattamiho, ottiya ahinatti opadduwa. * (Koona yowenjedha.) Nigamukuluvela Yehova, iyene onele onikamihedha owanana manyengetto etene annigwela mwigumini mwehu. (Masalmo 55:22) Ndoweni nitanaalele sabwa bili dhimukosihile Paulo ologa dhahene.

Yoroma, jawila “makattamiho annifanya anowafanya attu eena.” Nigaalivi mwilaboni mpuno mwa Satana, ninele ogumanana makattamiho menjene na ngovidha. Mbwenye nigamuroromela Yehova, onele onilibiha wi nikwaranye dhowehadha oku nimukuluvelaga. (1 Pedro 5:8, 9) Va 1 Korinto kapitulu 10, Paulo oleba  dhilobo dhoweha dhigumanilena ana Izrayel bali mwiddeddereni. (1 Korinto 10:6-11) Abale amuroromela Yehova ahiwodha ovilela manyengettoya. Mbwenye ana Izrayel eena ahimusadduwela Yehova. Awene kawodhile omwiwelela sabwani kamuroromela.

Yanawili jawila ‘Mulugu ddororomeleya.’ Ejiya entapulela eni? Nigang’ana mukalelo onaweeddiha Yehova emeleli aye, ninowoona wila txibarene onowakamihedha abale “animukwela, aneddana malamulo aye.” (Olibiha 7:9) Ninosunza wila Yehova onovirihamo dholibela dhaye. (Josuwé 23:14) Ninokaana ebaribari yawi (1) kahiyo Yehova onttiya wila manyengetto annigwela akale orutxa okwaranyawa obe ovilela vina (2) iyene ononooniha ‘marhe okwaranyana’ makattamihoya.

Yehova babi “onnipangarhaza mudhidhi wotene”

Yehova onavaha dhavi ‘marhe okwaranyana’ makattamiho abale animuroromela iyene? Na mudhidhiya iyene onoburutxavo makattamihoya. Mbwenye kobuwela, Paulo ologa wila “Mulugu onoulibihani, muwodhe obudduwamo, mupemberhe.” Mudhidhi mwina Yehova ononikamihedha wi nilabihedhe guru wi niwodhe owanana makattamihoya. Ndowe noone dila dhinlabihedha Yehova wi anikamihedhe owanana makattamihoya.

  • Yehova babi “onnipangarhaza mudhidhi wotene.” (2 Korinto 1:3, 4) Iyene onowodha opangarhaza murima wehu, na etanaalelo modheela Bibilia, muya wokoddela vamodha na mwimeleli wororomeleya wamalago.​—Mateu 24:45; Joau 14:16, Roma 15:4.

  • Yehova onolabihedha muya wokoddela wi anisogorhelena. (Joau 14:26) Muya wokoddela ononikamihedha wubuwela mapadduwo a Bibilia vamodha na maganoya anfanyeelihu ottiddihedha mabasa nigafunaga okosa dhosakula.

  • Yehova onowalabihedha angelo wi anikamihedhe.​—Ahebreu 1:14.

  • Yehova onowalabihedha abali na arogora wi anikamihedhe. Awene anonipangaraza n’esile dhinlogani vina dhinkosani.​—Kolosi 4:11.

Koddi, ninsunzavo eni na mazu aba alogile murumiwi Paulo va 1 Korinto 10:13? Kahiyo Yehova onsakula makattamiho ananigwele musogorho. Mbwenye nikaane ebaribari yawi nigamukuluvela Yehova, ninele owodha okwaranya manyengetto ali otene. Niziwe wi Yehova onele wavaha marhe obudduwana abale etene animuroromela agafanyiwa makattamiho.

^ par. 7 Mazu a Egregu anloga “manyengetho” antapulela “wehiwa” obe “makattamiho.”