Skip to content

Skip to table of contents

Anamoona a Yehova

Select language Etxuwabo

Nimutagihe Yehova—Mulugu Onvaha Nipangarhazo

Nimutagihe Yehova—Mulugu Onvaha Nipangarhazo

‘Nimutamele Mulugu . . . iyene onipangarhaza mmakathamihoni mwetene.’​—2 KORINTO 1:3, 4, koona yowenjedhedha.

JIBO: 23, 152

1. Adamu na Eva muttiyelani wiwelela, Yehova ovahile dhavi njedhelo na nipangarhazo?

JEHOVA MULUGU onvaha nipangarhazo. Iyene otonyihedhile ovenyana nsaka nittegile attu. Ndde, Adamu na Eva mmusadduwelani Mulugu, momaguva-mwene iyene ohivaha nivuhulo, nivuhulo ntti kowiweleliwa nigadhana njedhelo na nlogo na attu agadhile obaliwa musogorho. Nivuhulona ninfwanyeya va nivuruni na Wita 3:15 ninloga wi Ddiabo Satana vamodha na adomonyo otene anele otolotxiwa.​—1 Joau 3:8; Ovuhulela 12:9.

YEHOVA WAHAPANGARHAZA EMELELI AYE NSAKA NA WALE

2. Yehova wampangarhadhile dhavi Nowé?

2 Kobuwela mukalelo ompagarhadhile Yehova mwimeleli waye Nowé. Attu akala nsaka naye ali abure vina ankosa dhilobo dhonyakuwa, mbwenye Nowé na murala waye animulabela Yehova. Nowé agahirimeliwa nipangarhazo.  (Wita 6:4, 5, 11; Juda 6) Yehova wahimulibiha Nowé wi adhowe bagamulabela vina akosaga eli yapama. (Wita 6:9) Yehova wahimwaddela Nowé wi agahitolotxa elabo ejile yadhalile obure, wahimutapulelamo Nowé ajile egafwanyelileye okosa wi iyene na amudhanye avuneye. (Wita 6:13-18) Yehova wahimoniha Nowé wi ddi Mulugu waye wa nipangarhazo.

3. Yehova omulibihile dhavi Josuwé? (Koona foto eli omaromo.)

3 Musogoromwa Yehova wahimpagarhaza mwimeleli waye Josuwé, wahinvaha mabasa maddimuwa agakosiliye musogoro. Iyene agaheddiha nlogo na Mulugu wi avolotxe elabo yalibelile Yehova ovaha nlogo naye, vina agahapemberha amwiddani ovadda, awopiha akala mwilabonimwa. Yehova wahiziwa wi Josuwé agahigurumela na muttorhoya noona wahimwaddela Mizé wi: “Omuthiyedhe Josuwé magano anziwiwe, omwaralihe, omulibiye murima vowi ddi iyene onakale musogoreli wa nlogo nthi; ddi iyene onavahe nlogo elabo ejo enoniwe.” (Olibiha 3:28) Yehova mwinyene wahimulibiha Josuwé eraga: ‘Miyo kaddurumile weyo? Maga murima; kuhove, vowi Nabuya Mulugu wawo, onokala na weyo vego pa vego vanadhowege weyo.’ (Josuwé 1:1, 9) Josuwé wewilemo dhavi mazu aba?

4, 5. (a) Yehova olibihile dhavi nlogo naye nsaka na mundduni? (b) Yehova omulibihile dhavi mwanaye?

4 Yehova wahilibiha nikuru naye. Motagiha Yehova wanziwa wi Ayuda anfuna nipangarhazo valani mutxedhiwani o’Babilónia, nanda wahavaha nipangarhazo modhela mavuhulo aloga wi: ‘Kuwove, vowi miyo ddili na weyo, kamugurumele, vowi ddili Mulugu wenyu. Miyo ddinoulibiha, ddinoukamyedha, ddinouttiddela na nlada naga noja nowodha-wodha.’ (Izaiya 41:10) Musogorhomwa, Yehova wahakamihedha Akristu oroma na makalelo ottiyana-ttiyana.​—Kengesa 2 Korinto 1:3, 4.

5 Yehova vina wahimulibiha Mwanaye. Yezu mwamaleliye obatiziwa, wahiwa lizu nadhana wirimu nilogaga wi: “Oddu ddi mwanaga wa vamurimani vaga; mwa iyene pulí oziveliwa waga.” (Mateu 3:17) Txibarene mazu aba ahimuliba vaddiddi Yezu mudhidhi waliye velaboni ya vati.

YEZU WAHALIBIHA ATTU ENA

6. Musibo wa muhaku ologile Yezu onnilibiha dhavi?

6 Yezu wahimmutagiha Babe modheela walibiha attu wi akale ororomeleya. Iyene wahitapule musibo wa muhaku, wahiloga wi muzugu dhahi wahimutamalela namalaba waye eraga: “Eyá ekala mwimeleli wotxenjerha, wawiwananeyana. Mwaha w’ovirihamo dhiñgono, ddinouvaha dhinddimuwadhá. Dhawuno, ojevo vamodha na nabuyawo.” (Mateu 25:21, 23) Mazu aba ahalibiha anamafwara aye omulabela Yehova na nroromelo!

Yezu wahimulibiha Pedro vina wahimuttoma wila apangarhaze ena

7. Yezu walibihile dhavi arumiwi aye, makamaka Pedro?

7 Dila dhinjene anamafwara a Yezu anwanela onddimuwa, mbwenye Yezu wanavilela. Wahalibiha wi akale attu oviyeviha vina aziwege wakosela attu eena dhilobo dhapama, ottiya okanetxa efunelo  yolabiwa. (Luka 22:24-26) Dila dhinjene Pedro wahikosa dhilobo dhohifwanyela dhamusilidha Yezu. (Mateu 16:21-23; 26:31-35, 75) Mbwenye Yezu txipo kamukoddile Pedro. Wahimulibiha Pedro ofiyedha omuttomela mabasa a wasogorhela akwaye.​—Joau 21:16.

NIPANGARHAZO NA MASAKA A MUNDDUNI

8. Ezekiya walibihile dhavi asogorheli anyakoddo vamodha na nlogo na Juda?

8 Yezu ahinadha velaboni ya vati wi akale yotagiha, emeleli a Yehova anziwa wi anfwanyela olibihana muttu na mukwaye. Kamubuwele Ezekiya. Asiriya vafunani obuddugela nlogo na Juda iyene wahalibiha asogorheli anyakoddo vamodha na nlogo naye wi alibe murima, awene ‘ahilibiheya na mazu aba.’​—Kengesa 2 Mapadduwo 32:6-8.

9. Ninsunzavo eni na nipangarhazo na Job?

9 Ninodha osunzavo elobo na nipangarhazo nivahile Job. Masiki iyene afunaga nikamihedho, wahasunziha attu ena ovaha nikamihedho. Job wahawaddela attu abale adhile ompangarhaza wi keliwa wavaha nipangarhazona ddi iyene agawodha ologa mazu awalibihana ottiya olaga mazu agatotele okubanya. (Job 16:1-5) Musongorhomwa wahidha opangarhaziwa na Eliyú, Yehova mwinyene wahinpangarhaza vina.​—Job 33:24, 25; 36:1, 11; 42:7, 10.

10, 11. (a) Yafuneyelani mwana Jefté opagarhaziwa? (b) Masaka abano bani anfanyelihu wapangarhaza?

10 Mwana Jefté wanfuna vina nipangarhazo. Babe Jefté wali namattonga nanda wahidhowa owana koddo n’akadda Amonita. Iyene wahikosa nipikirelo wa Yehova wi komukamihedha opemberha mukoddoni agahinvaha muttu woroma wa vanivaye wi adhowe amulabelege Yehova Mutabernakulu. Izrayel mwapemberiliye mokoddoni muttu woroma wanfarele Jefté wali mwanaye, iyene wana odduwene bahi. Jefté murimaye mahimparuwa. Mbwenye iyene wahakwaniha nlibelo naye modhela omuruma mwanaye olaba mutabernakulu egumaye yotene.​—Anamathonga 11:30-35.

11 Masiki valani elobo yorutxa wa Jefté, ejo vina yali elobo yorutxa wa mwanaye. Masiki dhawene Iyene wahakwanihedha nlibelo na babe. (Anamathonga 11:36, 37) Eji yatapulela wi iyene kagateliwe vina obe kagakanile mwana. Ziza nawa nigagoma. Txibarene iyene wantamela olibihiwa na opangarhaziwa vaddiddi. Bibilia onologa: ‘Pavenevo veteyile mu Izrayel yeddelo eji yanamwali amutaga odhowaga ompangarhaza mwana Jefté Ojiliadi malabo manayi vayakani.’ (Anamathonga 11:39, 40) Mwana Jefté ononubutxedha azombwe ansakula ohiteliwa wi amulabele Yehova mudhidhi mwinjene. Ninofwanyela watamalela vina walibiha.​—1 Korinto 7:32-35.

 ARUMIWI ANALIBIHA ABALAWA

12, 13. Pedro ‘walibihile dhavi abalaye’?

12 Omattiyu obule Yezu ahinatti okwa iyene wahiloga dhahi na murumiwi Pedro: “Simoni, Simoni, kewa! Satana oloba ouvethani ninga munvethiwa tirigo. Miyo ddulogela wi ororomela wawo olibe. Weyo ogamala oddirugunutxela murima walibiye vina abalawo.”​—Luka 22:31, 32.

Makarta a arumiwi ahalibiha Akristu a vyaka zana dhoroma vina anonilibiha iyo masaka abano? (Koona ddima 12-17)

13 Pedro wali mmodhayavo mwa abale asakuliwe wi asogorhele milogo dhoroma Dhokristu. (Galásia 2:9) Nsaka na Pentekoste iyene wahapangarhaza na merelo olibiha, musogorhomwa wahidhowavi bagalibiha. Mulabeliye vyaka dhinjene wahalebela abalaye: ‘Ddinoulebelani mwana-karta eji, wi ddukokomezenina, ddinoddubele wi esi dhulebeleni miyo mahala a Mulugu. Vikomenina.’ (1 Pedro 5:12) Karta ya Pedro yahalibiha Akristu masaka abale. Vina enodhowavi yalibihaga Akristu a masaka abano oku nijedhela ovolowa mwilaboni eswa eli vakuvi.​—2 Pedro 3:13.

14, 15. Manivuru ali mBibiliyani alebile murumiwi Joau annilibiha dhavi?

14 Murumiwi Joau wali mukamihedhi wa Milogo dhoroma Dhokristu. Nanda iyene ohileba muttaka mwenemo munfwanyeya mabasa akosile Yezu valiye velaboni ya vati. Nivuru ntti nahalibiha  abali mwari mwa vyaka dhinjene nanda ninodhowavi banigalibiha abali masaka abano. Motagiha, pumwenemo bahi mmuttakani mwa Joau munfwanyeya mazu a Yezu ali ezinddiyelo ya okwelana wa anamafwara a Yezu.​—Kengesa Joau 13:34, 35.

15 Makarta mararu alebile Joau muhikala ebaribri ya ttima. Nigafwanyiwa dhawobana sabwa yovirigana wehu, ninoluluveya sabwa ya mukutto wa Yezu ‘onwodha okuputta dhottega dhehu.’ (1 Joau 1:7) Nigattiddiwa na mubuwelo wa ovipatta muladdu, ninolibiheya nigengesa wi ‘Mulugu munddimuwa opitta murima wehu.’ (1 Joau 3:20) Tti nivuru na Joau bahi nili mBibiliyani ninloga wi “Mulugu ddi okwela.” (1 Joau 4:8, 16) Karta yanawili vina yaneraru enowakokomeza Akristu wi ‘adhowegevi bagedda mwibaribarini.’​—2 Joau 4; 3 Joau 3, 4.

16, 17. Murumiwi Paulo wakamihedhe dhavi Akristu oroma?

16 Murumiwi Paulo yotagiha yaderetu vaddiddi ya muttu walibihile abalaye. Pavirile mudhidhi mung’novi Yezu bakwile, Arumiwi enjene ali mu Jeruzalemi, wenewale wafwanyeya nikuru nolamulela. (Merelo 8: 4; 15:2) Akristu a Mujudeya analaleya attu sabwa ya Kristu nanda attuya ahiroma orumeela okalawo wa Mulugu. Mbwenye ddi Paulo bahi warumiwe na muya odhowa olaleya o Grésia,  o Roma, na dhipaddi dhiina mwebedhiwa amilugu ottiyana-ttiyana.​—Galásia 2:7-9; 1 Timóteo 2:7.

17 Paulo waheddela mirudda dhinkuweliwa Turquia, Gresia na Italia. Iyene wanalaleya Ayuda amuttambirha vatakulu vawa vina wahita milogo Dhokristu. Okalawo ninga mukristu masaka abale yali elobo yorutxa. Akwaye a nlogo naye aninfwara-fwara, iyene wamtamela-wene nlibiho. (1 Tesalónika 2:14) Mwari mwa vyaka 50, Paulo wahalebela karta y’olibihana mulogo muswa o’Tesalónika. Iyene ohiloga: “Masiku etene anuwubuwelani iyo mmalobeloni mwehu, ninomutamalela Mulugu. Ninowubuwelavi merelo ogalamuwa a nroromelo wenyu, okwela onddimuwa oneddana nyuwo, omujyedha wenyu na ntidi Nabuyehu Yezu Kristu.” (1 Tesalónika 1:2, 3) Iyene vina wahileba wi alibihegena muttu na mukwaye: “Nona libihanina murima, mukamyedhagane ninga mulemelelenyu wira.”​—1 Tesalónika 5:11.

NIKURU NOLAMULALE NINOLIBIHA

18. Nikuru nolamulela na nsaka noroma namukamihedhe dhavi Filipi?

18 Vyaka zana dhoroma, Yehova wahilabihedha nikuru nolamulela wi nalibihe Akristu otene, nabaleya asogorela milogo. Valaleyile Filipi mu Samariya sabwa ya Yezu Kristu, nikuru nolamulela nahimukamihedha. Nikuru nolamulela naharumawo alobwana awa, Pedro na Joau, wi alobelele Akristu aswa aakele muya wokoddela. (Merelo 8:5, 14-17) Filipe na abali aswa vamodha na arogora ahilibiheya vaddiddi sabwa ya nikamihedho nakelilani na nikuru nolamulela.

19. Akristu oroma ewilemo dhavi mwegenselani karta yaperhemgezili nikuru nolamulela?

19 Musogoromwa nikuru nolamulela nahikosa masasanyedho manddimuwa. Akristu ahali Ayuda anfwanyela otxetteliwa ninga yakosa Ayuda afwara malamulo a Mizé? (Merelo 15:1, 2) Mwa makani aba nikuru nolamulela nahikosa malobelo akumbirhaga muya wokoddela wi wakamihedhe ononelamo malebo, venevo ehoneya wi kiyali yofuneya otxetteliwa. Awene ahileba karta yatapulela makaniya nanda aharuma abali eena wi adhowena aperheke kartaya mmilogoni. Muttambirhele Akristu karta ejile nanda engesa, ‘otene attaba sabwani mazu alebiwemo analibiha.’​—Merelo 15:27-32.

20. (a) Nikuru nolamulela ninnikamihedha dhavi? (b) Mavuzo gani anakuliwe mutoma ondawo?

20 Masaka abano, nikuru nolamulela na Anamoona a Yehova ninowalibiha Abetelita, abale anlaba mabasa a mudhidhi wotene, na iyo notene. Moligana na abali abale a vyaka zana dhoroma, iyo ninowagalala venjene sabwa yolibihiwa! Anolibihiwa vina abele attiyile ebaribari nanda beyelela, yaka ya 2015 nikuru nolamulela niburutxa brochura ninloga Retorne a Jeová (Omwiyelele Yehova). Koddi merelo aba a walibiha attu ena anyaya anfwanyela okosa abali ali asogorheli obe attu otene anofwanyela okosa? Mutoma ondawo onele wakula nivuzo ntti.