“Omuroromele Nabuya [Yehova] weddegenavi dhapama onokalawo n’osanzaya mwilaboni.”—MASALMO 37:3.

JIBO: 49, 18

1. Yehova wattanddile attu na ewodhelo gani?

YEHOVA ohattandda attu na ewodhelo modha. Onivaha ewodhelo ya wubuwela, ennikamihedha ogomiha makattamiho ehu vina wubuwela dha musogorho. (Gano 2:11) Onivaha guru, noona ninowodhaga okosa dhinubuwelihu vina ofiyedha dhogana dhehu. (Filipi 2:13) Iyene onivaha mirugu, etanaalelo y’oziwa ottiyaniha elobo yabure na yaderetu. Mirugu dhinonikamihedha orabela dhottega vina wogola dhovirigana dhehu.—Roma 2:15.

2. Yehova onjeedhela wila nilabihedhe dhavi ewodhelo yehu?

2 Yehova onfuna wila nilabihedhe ewodhelo ejo na mukalelo wapama. Sabwaya? Sabwani ononikwela, vina oziwa wila ninele wagalala nigalabihedha nvaho obo mowakwana. Motagiha, Mmaleboni a Ebraiko ninowengesa: “Onfuna okosa elobo, agaroma otanaalela pama, enosogorha;  eraga na maruru, kanp’elo,” vina “Ovilibihedhe wira enwodhiwe n’ovivelela.” (Gano 21:5; Kohelét 9:10) Mmaleboni a Egrego, ninowengesa: “Nona mudhidhi wotene onwodhihu, nawirele dhapama athu etene,” vina “muthu-muthu àkamyedhegena akwaye mahalayá akelileye.” (Galásia 6:10; 1 Pedro 4:10) Txibarene Yehova onfuna wila nikose dhilobo dhinapurelemo iyo vamodha na attu eena.

3. Dhilobo gani dhihinwodha attu-okosa?

3 Yehova onfuna wila nilabihedhe ewodhelo yehu, mbwenye vina onoziwa wila dhihikalawo dhilobo dhihinwodhihu okosa. Motagiha, kaninwodha oburutxavo, ekalelo yohiligana, ottega vina okwa. (1 Amwene 8:46) Ottiya ejo vina, kaninwodha wawang’anela attu etene, sabwani muttu-muttu, okaana ofuru w’okosa enfuneye. Masiki nigaana ewodhelo enddimuwa, txipo kaninakaane enonelo ninga ya Yehova.—Izaiya 55:9.

Ogakaana makattamiho, ‘omuroromele Yehova weddegenavi dhapama’

4. Mutoma obu onanisunzihe eni?

4 Nirumeele weddihiwa na Yehova, nikuluvelaga wila onele onikamihedha okosa ejile ehinwodhihu noka. Masiki dhawene, Yehova onfuna wila nubuwele enfunihu okosa wi nigomihe makani, vina nakamihedhena attu eena. (Kengesa Masalmo 37:3.) Ninofuna dhilobo bili ‘omuroromela Yehova vina weddagana dhapama.’ Ninofuna vina “mabasa a nroromelo.” Ninawodhe dhavi okosa esidha? Ndoweni nitanaalele dhotagiha dha  Nowé, David vina emeleli eena a Mulugu amukuluvela Yehova. Ninele woona mukalelo wobuwelani na esile dhahawodhani, nanda bagang’anetxa esile dhawodhani okosa.

NIGARIJIWA NA OBURE

5. Kaloga dhilobo dhampadduwela Nowé.

5 Nowé okalilewo nsaka nadhalile “obure” mwilaboni. (Wita 6:4, 9-13) Masiki aziwaga wila Mulugu agahitolotxa elaboya, Nowé wansilidhiwa vaddiddi na esile dhakosa attuyamo. Masiki dhawene Nowé katameli okosa dhilobo dhahawodhiye, mbwenye esile dhawodhiye okosa.

Ofarafariwa na mabasa ehu a olaleya (Koona ddima 6-9)

6, 7. (a) Txini ehiwodhile Nowé okosa? (b) Nsaka ninkalawo iyo ninligana dhavi na masaka a Nowé?

6 Dhahawodha okosa Nowé: Na nroromelo Nowé olaleya muselu wa nikokomezo na Yehova, mbwenye kattiddile attuya wila arumeele. Ottiya eji, iyene kawodhile waguviha odha wa Mpulo. Nowé wanfanyeela okuluvela wila Yehova agahakwaniha nlibelo naye, mwari mwa mudhidhiya.—Wita 6:17.

7 Iyo ninkalawo masaka adhalile obure, ninoziwa vina wila Yehova onele otolotxa elaboya. (1 Joau 2:17) Mwari mwa mudhidhi obu, iyo kannakokela attu orumeela “miselu dhapama dha Omwene.” Ottiya eji kaninwodha waguviha “goyi enddimuwa”. (Mateu 24:14, 21) Ninga mwakoseli Nowé, nilibihe nroromelo nehu, nikuluvelaga wila Yehova onele ogomiha obure wotene momaguva. (Masalmo 37:10, 11) Nihikaana ebaribari wi Yehova txipo  kanattiye obure wa elabo ejino okwaranya labo nittomiliye otolotxa.—Habakuk 2:3.

Ninga Nowé, iyo nilibihe nroromelo nehu, nikuluvelaga wi Mulugu onele ogomiha obure momaguva

8. Txini yang’anetxa Nowé? (Koona foto eli omaromo.)

8 Dhawodha Nowé okosa: Ottiya wiyelela mundduni sabwa ya dhilobo dhahawodhiye okosa yeka, Nowé wali txenjewa na esile dhawodhiye okosa. Na nroromelo, Nowé wanlaleya miselu dha nikokomezo na Yehova. (2 Pedro 2:5) Mabasa aba ahimukamihedha olibiha nroromelo naye. Mowenjedhedha na mabasa a olaleya, iyene ovirihamo malago a Yehova a omaga pangaya.—Kengesa Ahebreu 11:7.

9. Ninawodhe dhavi omutagiha Noé?

9 Ninga Nowé, nihivihedhiwa na “mabasa a Nabuya”. (1 Korinto 15:58) Motagiha, txino iyo ninodhowa okamihedha omaga obe okoddeliha Numba dha Omwene, munkosiwa Asembeleya na Kongeresu, obe vina okamihedha mabasa o’tapulela. Yamakamaka ja ottidda mabasa a olaleya na guru, sabwani anowenjedhedha nroromelo nehu na musogorho. Murogora dhahi ologa wila agalogaga na attu eena sabwa ya njeedhelo na musogorho, onowawoona attuya wila kana njeedhelo, vina anubuwela wila makattamiho awa txipo kanagome. Ninga murogora ologiwe, iyo nihikaana njeedhelo nanda ninolibihavi nigalogaga na attu eena. Njeedhelo ntto ninonikamihedha okala oliba needdaga mwetemwene muneddihu!—1 Korinto 9:24.

AKALA NINOTTEGA

10. Katapulela makani ana David.

10 Mwene David wali mulobwana wa nroromelo, Yehova vina wannimukwela. (Merelo 13:22) Masiki dhawene, David wahittega sabwa ya oraruwa na Betsabé. Yottabwaya jawi iyene wafuna ninga avite yottegaya, noona wahikosa masasanyedho wi Uriya mamuni wa Betsabé apiwe mukoddoni. David wahinvaha Uriya karta mwali malago a opiwa waye! (2 Samuwel 11:1-21) Movira wa mudhidhi yottega ya David yahivituleya. (Marko 4:22) Moneliye esidha David okosile eni?

Dhottega dha mundduni (Koona ddima 11-14)

11, 12. (a) David muttegeliye txini yahawodhiye okosa? (b) Nigatxinuwa Yehova onneddiha dhavi?

11 Dhahawodha David okosa: David kawodha wiyihedha mundduni dhilobo dhabure dhakosiliye. Txibarene, musogorhomwa iyene otabuwa na dhodhavo dha yottega yaye. (2 Samuwel 12:10-12, 14) Iyene wanfuna nroromelo. Iyene wahikuluvela wila kotxinuwa Yehova agahimulevelela vina agahimukamihedha owanana makattamiho aye.

12 Sabwa yokala attu ohiligana, iyo notene ninottega. Dhovirigana dhina dhinddimuwa, dila dhina iyo kaninwodha  wiyihedha mundduni dhilobo dhirilehu dhabure. Mudhidhi mwina ninotabuwaga ttangwi ya merelo ehu. (Galásia 6:7) Mbwenye ninofanyeela okuluvela yolibela ya Yehova enloga wi nigatxinuwa, onele onikamihedha nigafanyiwa dhorutxa, masiki akala makattamihoya nitotile nanya.—Kengesa Izaiya 1:18, 19; Merelo 3:19.

13. David wawodhile dhavi ovenyihedha mandano aye na Yehova?

13 Dhawodha David okosa: David wahitamela ovenyihedha mandano aye na Yehova. Iyene owodhile dhavi okosa ejiya? David warumeelile nikamihedho na Yehova. Motagiha, iyene wahirumeela osisiguliwa na namavuhulela wa Yehova, Natan. (2 Samuwel 12:13) David wahilobela wa Yehova, wahibweka dhottega dhaye alagihaga wi wanfuna-wene nikamihedho na Yehova. (Masalmo 51:1-17) Ottiya ogilatela ovipwatteliha muladdu, David wahisunza elobo na dhottega dhaye. Iyene txipo keyeleli okosa dhottega dhakene. Musogorhomwa ohikwa ninga muttu wanroromelo, Yehova onimubuwela dhawene.—Ahebreu 11:32-34.

14. Yotagiha ya David ennisunziha eni?

14 Yotagiha ya David ennisunziha eni? Nigakosa yottega enddimuwa, ninofanyeela otxinuwa vina omwaddela Yehova, nikumbiraga nlevelelo naye. (1 Joau 1:9) Ninofanyeela wawaddela anddimuwa a mulogo sabwani bawene ananikamihedhe ovenyihedha mandano ehu na Yehova. (Kengesa Tiago 5:14-16.) Nigarumeela nikamihedho na Yehova, ninolagiha wila ninokuluvela nlibelo naye na onilevelela. Mowenjedhedha ninofanyeela osunzavo elobo na yottega yehu, nanda banigadhowavi vasogorho nimulabaga Yehova mowakwana.—Ahebreu 12:12, 13.

MAKATTAMIHO MEENA

Makattamiho a egumi (Koona ddima 15)

15. Yotagiha ya Ana ennisunziha eni?

15 Txino munowodha omubuwela muttu mwina wororomela olebiwe mBibiliani, wamukuluvela Yehova masiki vaniye makattamiho menjene. Motagiha nsaka dhahi Ana vahaniye mwana. Iyene kawodha osaddula makattamiho aba. Mbwenye wanlibiheya sabwa ya omukuluvela Yehova. Iyene kattiyile omwebedha Yehova mumparhani, olobela n’omwaddela Yehova makattamiho aye. (1 Samuwel 1:9-11) Eji yotagiha yaderetu wa iyo! Nigakaana makattamiho a egumi, obe mazuzumo meena, ninfiyedhena Yehova nanda nikuluvele wila onele onikamihedha. (1 Pedro 5:6, 7) Noona nikose kukuttu wi nipurelemo venjene matugumano O’kristu ankaanihu vamodha na masasanyedho meena a nikuru na Yehova.—Ahebreu 10:24, 25.

Ana omukuluvela Yehova, nona kattiyile webedha mumparhani, olobela n’omwaddela Yehova makattamiho aye

Muzombwe ottiyile omwebedha Yehova (Koona ddima 16)

16. Yotagiha ya Samuwel enasunziha eni amambali?

16 Koddi txini enakose amambali aana aima attiyile omwebedha Yehova?  Namavuhulela Samuwel, kakokela anaye anddimuwene wi amwiyelele Mulugu. (1 Samuwel 8:1-3) Iyene wahittiya wila Yehova eddihe makaniya. Masiki dhawene Samuwel wahikalavi oweddeyana na Mulugu nanda wanfuna omuhagalaliha Babi waye wa wirimu. (Gano 27:11) Masaka abano, amambali enjene ali Akristu anogumana na makattamiho oligana. Awene anokuluvela ninga babi wamulogile Yezu vanladdanihoni na mwana wopaula, wi Yehova onofuna-wene wawakela abale antxinuwa na yottega yawa. (Luka 15:20) Eji egalivi, amambali anofanyeela olibiha omuroromela wawa Yehova, ajeedhaga wi yotagiha yawa enele omukosiha mwanaya wiyela.

Mayelego (Koona ddima 17)

17. Yotagiha ya mamukwela wa muyelegi ennilibiha dhavi?

17 Yotagiha yina yaderetu ja mamukwela wa muyelegi masaka a Yezu. (Kengesa Luka 21:1-4.) Iyene kagakosile elobwene wi agomihe obure mumparhani vina kagasaddulile ekalelo yaye y’oyelega. (Mateu 21:12, 13) Mbwenye omukuluvela waye Yehova wannimukosiha omwebedha n’ebaribari. Iyene wali muttu wotapuwa mada, nona wahikamo “korowa bili bani” dhaniye. N’eji, mamukwela oddu wahilagiha kakamwe omukuluvela waye Yehova. Wahikaana ebaribari yawi ageka mabasa a Yehova vamburoni voroma, iyene agahimukamihedha ofanya dhilobo dhamujombela. Na mukalelo wakakene, akala ninowika vamburoni voroma Omwene wa Mulugu, Yehova onele onivaha dhilobo dhiina dhinnijombela.—Mateu 6:33.

18. Kaloga yotagiha ya mbali wana etanaalelo yapama.

18 Nsaka nttino vina, abali na arogora enjene, anomukuluvela Yehova sabwa yozuzumelaga esile dhinwodhani okosa, ottiya wang’ana dhihinwodhani. Kamubuwele mbali Malcolm, wawodhile olibiha nroromelo naye ofiyedha yaka ekwiliye ya 2015. Mwari mwa vyaka dhinjene iyene na mwadhiye amulabaga Yehova, awene angumanagana masaka apama vina orutxa. Iyene ologa wila “egumi, mudhidhi mwina kinkuluveleya, obe jorutxa. Mbwenye Yehova onowareliha attu otene animuroromela.” Mbali Malcolm ottiyile malago gani? “Olobele okumbirhaga nikamihedho wi okale woliba vina wa mabasa ninga munfuneliwe. Ozuzumele esile dhinwodhiwe, ottiya dhihinwodhiwe okosa.” *—Koona yowenjedha.

19. (a) Mutoma wa yaka okalelini yosakula yaderetu? (b) Onalabihedhe dhavi mutoma obu wa yaka 2017 mwigumini mwawo?

19 Vowi elabo ejino yotabala enodhowavi ‘bigattabwa,’ kanidduwale wila makattamiho anelege winjivavi. (2 Timóteo 3:1, 13) Nona jamakamaka wang’ana dhosogorho ottiya ovipwatteliha muladdu wa makattamiho angumanana iyo. N’eji nilibihe omuroromela wehu Yehova, oku nikalelaga txenjewa esile dhinwodhihu okosa. Noona sabwa ya ejene mutoma wa yaka ya 2017 yosakula yaderetu: ‘Omuroromele Yehova weddegenavi dhapama’!—Masalmo 37:3.

Mutoma wa Yaka 2017: ‘Omuroromele Yehova Weddegenavi Dhapama’—MASALMO 37:3.

^ par. 18 A Sentinela, 15 Outubro, 2013, nikuku 17 mpaka 20.