Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Janero ya 2018

Okwela Webaribari Ondana Wagalala Gani?

Okwela Webaribari Ondana Wagalala Gani?

“Thagari nlogo ninimwakela Nabuya [Yehova], akalá Mulugu wawa!”—MASALMO 144:15.

JIBO: 28, 25

1. Nsaka ninkalihuwo nittiyanile dhavi na nsaka na mundduni?

NSAKA ninkalawo iyo nittiyana vaddiddi na nsaka na mundduni attu apaddutxiwaga-wene. Ninga mwattagile ologa Bibilia, Yehova onotugumaniha “muthithi munddimuwa wa athu ohelegeya, àli a vilabo dhetene, mahimo etene, malogo otene a vilogelo dhetene.” Awene ddabuno “ziza” ninddimuwene na muttengo wa amiliyawu atanu na araru, abuwene ankala “osogorho wa mpaddo wa Mulugu, amwimelelaga iyene mathiyu na mutana” nosanzaya. (Ovuhulela 7:9, 15; Izaiya 60:22) Kunakalagawo muttengo wa attu ninga abene alagihilege omukwela Mulugu vamodha na attu akwawa.

2. Ekalelo gani ya okwela enawonihuna attu ahili amarho a Mulugu? (Koona foto eli omaromo.)

2 Masiki dhawene, Bibilia wamala ologa wila mmasakani mwehu, abale ahili amarho a Mulugu agahilagiha mukalelo wottiyana wokwela. Okwelawa oko, ogali worhalapitta. Murumiwi Paulo wahiloga wi masaka omariha “athu anere okala anamakumbela vawa, anamajiwa murima na kobiri,” vina “amageyile n’ojavo elabo opitha omukurumuwela  Mulugu.” (2 Timóteo 3:1-4) Okwela ninga oko, kuniwanana na omukwela Mulugu. Omukumbela vaye kundana wagalala masiki muttuya obuwelaga wi onele ohagalala. Ottiya eji okwela oko, ontota ovittukulela oku ekaga mmakattamihoni dhigumi dha attu eena.

3. Txini enasunze iyo mmutomani obu? Nanda sabwa yani?

3 Murumiwi Paulo wanziwa yawi attu enjene agahilagiha okwela ninga oku wabure, nanda ejoya egali yawopiha mwa Akristu. Noona iyene wahenjedhedha eraga “tamelà warabelaga” otene abale anna mukwelelo ninga obuwene wotakala. (2 Timóteo 3:5) Eji kintapulela wila kanilogege na attu ali etene. Kito ninakose nni yawi nivirabelihe attu ahina okwela webaribari oku nibarelaga omukwela wehu Mulugu wokwela? Ndowe noone ottiyana olivo wa okwela onnifunana Mulugu na ekalelo yokwela elebiwe va 2 Timóteo 3:2-4. Nigamala nivitanaalele wi nizinddiyele okwela gani onfanyelihu olagiha wi nikaane osanzaya webaribari.

OMUKWELA YEHOVA OBE OVIKWELA WAMUNYA?

4. Sabwaya jani ovikwela nanya kayotxe elobo yabure?

4 Paulo oleba: ‘Attu anere ovikwelaga anya.’ Koddi eji enfuna etapulele wi muttu kavikwelege? Nne, ovikwela wamwinya onofuneya vina kayo yabure. Yehova onittanddile dhawene. Yezu ologa wi: “Omukwele muthu mukwawo n’ekalelo envikwelewe wamwinya.” (Marko 12:31) Txibarene, akala kaninwodha ovikwela nanya, kaninawodhe vina wakwela attu akwehu. Bibilia wakakene ononaddela: “Amamuni vina anofuniwana wakwela awadhawa, n’ekalelo envikwelanina anya. Onimukwela mwadhye, onivikwela mwinyene, kawo muthu ompwaza maningo aye, onosapela, onokoya.” (Éfeso 5:28, 29) Ndde, ovikwela nanya vang’onovi elobo yapama.

5. Ogamutalihile dhavi muttu onvikweletxa?

5 Okumbela vawo, obe ovikwela womwinya wengesile iyo va 2 Timóteo 3:2, kayo waderetuya. Oku okwela wosalapitta. Muttu agavikweletxega onovyionana onddimuwa opitha eliye. (Kengesa Roma 12:3.) Iyene onvizuzumela mwiya opitta wazuzumela attu eena. Akala dhilobodha kadhinimweddela deretu onoroma wapwatteliha attu eena muladduya ovittiyaga wamwinyane. Namaloga dhahi wa Bibilia, onomuladdaniha muttu dhawene ninga kafiyafiya oli vamwirini ongayela nttitti naye nofiya apo ttebe yaye kayo elobwene. Attu ninga abuwene, txipo kanagalala.

Okwelawa-okwelawa onnifunana Mulugu wi nunuwiye kwa mikalelo dhapama

6. Yopurelamo gani enakanihu nigamukwela Mulugu?

6 Aziwetxi enjene a Bibilia, anorumela mazu aba alogile Paulo, sabwani ovikwela ninga oko onotota makattamiho ninga munlogela musogorho mwa nlebo ntti. Mottiyana n’eji, okwela onnifunana Mulugu kwa mikalelo dhapama. Okwela oko oniwanana na ottaba, murenddele, ovilela murima  wapama vina wovipimelela. (Galásia 5:22, 23) Munasalmo oleba: “Thagari nlogo ninimwakela Nabuya [Yehova], akalá Mulugu wawa!” (Masalmo 144:15) Yehova, Mulugu wosanzaya, attu a nlogo naye vina bosanzaya. Mottiyana na abale anvikweletxa anya, obe anzuzumela dhokaana dhawa, emeleli a Yehova bowagalala sabwani awene attu anvaha na murima wotene.—Merelo 20:35.

Ninawodhe dhavi orabela ovikwela nanya? (Koona ddima 7)

7. Mavuzo gani anokamihedhe otanaalela omukwela wawo Yehova?

7 Ninaziwe dhavi wila ovikwela wehu nanya bovadda opitta omukwela wehu Yehova? Katanaalela malago aba: “Muhire elo-ene na murima wa mavurhano, wovithithimiha; muthu-muthu na ovyeviha onddimuwa awonegena akwaye thima enpitha yaye; ahizuzumelege yayeví, atabuwelege vina dha akwaye.” (Filipi 2:3, 4) Nivivuze nanya: ‘Ddinowiwelela malago aba? Ddinovilibihedha okosa enddifunana Mulugu wi ddikose? Ddinotamelaga marhe a wakamihedhana attu mmulogoni, obe mmabasani a olaleya?’ Kahiye yovevuwa ovaha mudhidhi, na guru dhehu. Dila dhina ejo entapulela olaba na nttokoso obe oyelela dhilobo dhafuniho okaana. Mbwenye kavali elobo enwodha onihagalaliha opitta oziwa wi Muttanddi wa erimu onoziveliwa na mabasa ankosihu!

8. Txini ekosile Akristu eena sabwa yomukwela Yehova?

8 Sabwa y’omukwela wawa Yehova, Akristu enjene anyanyala mabasa agattukuleli okala areli, wi amulabele Mulugu n’ofwasa. Erika, oli ng’anga wosipitale, osakula olaba ninga pionero ottiya ogilatela dh’omabasani wayevi. Iyene na mamunaye, alaba dhilabo dhinjene. Iyeneya ologa: “Dhotagiha dhinjene dhinnehu, dha  wakamihedha attu a dhilogelo dha elabo yina, vamodha na mandanoya, esi dhinowodha onisanzayiha-wene.” Erika, belaga onolabavi ninga ng’anaga wosipitale, mbwenye masiki dhawene onolabihedha mudhidhi mwinjene na gurudha wi asunzihe attu nzina na Yehova vina wakamihedha arogora a mmulogoni. Iyene ohiloga wi okosa ejuwene “enonvaha wagalala na ottugareya.”

DHORELA WIRIMU OBE VELABONI YA VATI?

9. Sabwaya jani muttu onkwela kobiri kanagalala?

9 Paulo oleba yawi attuya anere okala “anamajiwa murima na kobiri.” Vyaka dhing’onovi mundduni, pionero dhahi w’Irlanda wahiloga na mulobwana dhahi muselu wa Mulugu. Mulobwana oddo wahiburutxa mbudduni mwaye kobiri nanda baloga: “Eji jili mulugu waga!” Masiki attuya abo ahirumelaga vaddiddi esodha, mbwenye anonamo dhawene. Awene ankwela kobiri na dhilobo dhingulani. Mbwenye Bibilia ononaddela: “Onunlela muhaku, txipo kankoliwa; onfuna orela kanwodha-wene othidda dhetene dhinunleliye.” (Kohelét 5:10) Muttu onkwela kobiri, txipo kanrumela wila okaana enakwanela. Onofunavi nona onononga egumi yaye atamelaga kobirivi. Ejo egamala enomutotela “goyi dhinddimuwa.”—1 Timóteo 6:9, 10.

10. Txini enloga Bibilia sabwa ya orela vina oyelega?

10 Iyo notene ninofuna okaana kobiri. Ejo enodhana nibarelo. (Kohelét 7:12) Koddi enowodheya wagalala na kobiri eng’onovi engulihuna dhilobo dhamakamakavi? Ndde enowodheya! (Kengesa Kohelét 5:12.) Agur mwana Jaké wahiloga “Erani wi ddeddege na murima mmodha, ddihisalapithege; ddihikale mureli. Ddivaheni dhinddakwanela bahi.” Kinrutxa ononelamo sabwa yahafunela mulobwana oddu okala muyelegi. Iyene belaga kafuna okwekwetteleya wiya, sabwani okosa ejuwene egamunyimula Mulugu. Kito wakoddela nni okala mureli? Iyene oleba: “Ddigarela, txino ddinowodha owekani ekothi ofiyedha ologa: ‘Nabuya [Yehova] kaddimwidhi.’” (Gano 30:8, 9) Mohaganyedha waromaga wawona attu ankuluvela dhorela dhawa opitta omukwela Mulugu.

11. Txini elogile Yezu mwaha wa kobiri?

11 Muttu onkweletxa kobiri kanwodha omutamaalela Mulugu. Yezu waloga eraga: “Kawo onwodha walaba anya eli; agamukwela mmodha, onomwidda mwina; agamulaba mmodha, onompwaza mwina. Nona kamunwodha ovilevela Mulugu, ovilevela muhaku.” Vina wahenjedhedha: “Muhipigele dhorela mwilaboni-mpuno, muli anamathubwa, mukwiti, dhinnonga dhetene; muli ambava andhela othuthamo. Nyuwo ugelaní dhorela odhulu; wenewo ohinfiya anamathubwa, mukwiti dhinnonga, nne ambava anthuthawo.”—Mateu 6:19, 20, 24.

12. Ovevutxa mikalelo dha egumi, onnikamihedha dhavi omulabela Yehova? Kavaha yotagiha.

12 Emeleli enjene a Yehova onovilibihedha ovevutxa egumi yawa. Awene aloga wila okosa dhawene onowavaha mudhidhi womulabela Yehova n’ofwasa vina onowavaha wagalala. Jack, onkala o Estados Unido, oguliha numba yaye enddimuwa vamodha na marhondda akosiye wila akale pionero vamodha na mwadhiye. Otapulela  eraga: “Yali yorutxa ottiya numba yehu enddimuwa.” Dila dhinjene ddaniyelela vatakulu sabwa yosilidhiwa omabasani. Belaga vina: “Mwadhaga pionera wa mudhidhi wotene nanda onowagalala vaddiddi. Mwadhiyeya belaga: ‘Ovano ddikaana musogorheli wa masaka otene!’ Ovano elihu apionero noheli ninimulabela Muttu mmodha bahi, Yehova.”

‘Yeddelo yaga na muhaku enotonyihedha wi ddinorumela enloga Bibilia mwaha wa kobiri?’

Ninawodhe dhavi orabela okwela kobiri? (Koona ddima 13)

13. Txini enanikamihedhe otanaalela mweddelo wehu na kobiri?

13 Nigatanaalela mikalelo dhehu na kobiri, japama ovivuza: ‘Yeddelo yaga na muhaku enotonyihedha wi ddinorumela enloga Bibilia mwaha wa kobiri? Kobiriya ji elobo yamakamaka mwigumini mwaga? Ddinozuzumela vopitta dhilobo dhomaningoni opitta mandano aga na Yehova vina attu eena? Ddinorumeela wila Yehova onele oddivaha dhinddijombela?’ Nikaane ebaribari yawi iyene txipo kananyapwariha abale animuroromela!—Mateu 6:33.

NINIMUKWELA YEHOVA OBE ESILE DHINNIZIVELA?

14. Opimelela dhinnizivela ontapulela nni?

14 Bibilia wahibaza ologa wi attuya anere omageya “n’ojavo elabo opitha omukurumuwela Mulugu.” Ninga munziwela iyo, kayo yabure otamela okaana kobiri, yakakene vina kahiyo yabure oziveliwa dhilobo mbwenye na mukalelo wapamaya. Attu enjene anloga wila kanfuna oziveliwa n’elobwene, mbwenye kahiyo ejuwene ennifunana Yehova. Bibilia onowalibiha emeleli otene a Mulugu eraga: “Dhowá waje n’ofwasa, wamwe vinyu yawo n’othaba, vowi Mulugu omala oziveliwa na mabasa awo.”—Kohelét 9:7.

15. Okwela dha mwilaboni entapulela nni?

15 Va 2 Timóteo 3:4 vanologiwa abale anziveliwetxa ojavo elabo opitta omukurumuwela Mulugu. Kobuwela wila nlebo ntti kanilogile wi attu agahiziveliwa ojavo elabo opitta omukurumuwela Mulugu. Ejo entapulela yawi agamukwelile vang’onovi Mulugu. Ottiya eji nlebo ninloga “opitha omukurumuwela” Mulugu. Muziwetxi dhahi ologa wila nlebo ntti “kanintapulela wila attuya abo, agahiroma omukwela Mulugu na mudhidhiya. Ejo entapulela kanimukwela-wene Mulugu.” Obu mpaganyo munddimuwa wa abale anziveliwa ojetxavo dh’elabo. Bibilia onowaloga attuya abo ninga attiddiwe na “edhivi-dhivi ya maningo.”—Luka 8:14.

16, 17. Yotagiya gani enivahile Yezu sabwa ya moonelo wojetxavo elabo?

16 Yezu onisunziha entapulela ovipimelela na dhilobo dhinnizivela. Iyene wahidhowa woona mittupo minli, mmodha wa “matelo” mwinaya wasasanyedheliwe iyenene. (Joau 2:1-10; Luka 5:29) Vamuttuponi va matelo kavali vinyu, nanda Yezu wahikosa matikiniho basaddula manje bakala vinyu. Mudhidhi mwina wakala attu amusaddeya Yezu sabwa y’oja vina omwa, nanda iyene wahawoniha aboya wila monelo wawa wali wovirigana.—Luka 7:33-36.

 17 Masiki dhawene, Yezu katweyile mento nojetxavo dhelabo. Iyene wamwika Yehova vamburoni woroma, nanda okosa dhetene dhawodhiye wila akamihedhena attu. Wali womala na wale wi atabuwe vina apiwe na goyi enddimuwa vapingirizini wi avune nlogo na attu. Yezu wahawaddela anamafwara aye: “Murelihiwa ddi nyuwo mugaruwaniwa, mugasosihiwa, mugamagedhiwa dhotakala dhotene thangwi yaga. Hagalalaní, thabaní vowi othuveliwa wenyu wirimu kunddimuwa-wene; Anamavuhulela vina asosihiwa nyuwo muhinathi.”—Mateu 5:11, 12.

Ninawodhe dhavi orabela ojetxavo dh’elabo? (Koona ddima 18)

18. Mavuzo gani ananikamihedhe otanalela mukalelo onjavo iyo elabo?

18 Txini enanikamihedhe okaana monelo woligana na dha mwilaboni? Ninofwanyeela ovivuza nanya: ‘Mavego bamakamaka mwa miyo opitta woona matugumano na olaleya? Ddinowodha onyanyala dhilobo dhinddizivela sabwa y’omukwela waga Yehova? Ddigasakulaga mavego ddinoromaga wubuwela moonelo wa Mulugu na mavegoya?’ Vowi ninomukwela Mulugu, vina ninofuna omuhagalaliha, ninorabela ottiya dhilobovi dhinziwehu yawi sabure, mbwenye n’esilene dhinubuwelihu wila dhinomusilidha.—Kengesa Mateu 22:37, 38.

NINAWODHE DHAVI WAGALALA

19. Bani txibarene ohinwodha wagalala webaribari?

19 Mwari mwa vyaka 6.000, Satana vamodha na elabo yaye onowatabutxaga attu. Ovanene, ninga masaka omariha, elabo edhaleliwa attu ovikwela anya, ankwela kobiri vina ojetxavo dhelabo. Awene anubuwela yawi japama ozuzumela dhegumi dhawa. Attu ninga abuwene txipo kanagalala! Mottiyana naba, Bibilia onloga: “Wagari ddule onimusamela Mulugu wa Jakobi, onimukuluvela Nabuya Mulugu waye.”—Masalmo 146:5.

20. Omukwela wawo Yehova onuvaha dhavi osanzaya?

20 Emeleli a Yehova anomukwela-wene vopitta. Mwa vyaka dhetene attu awinjiva anomuziwa Yehova vina anoroma omukwela. Ejo entapulela wi Omwene wa Mulugu onolamulela nanda ovanene onele odhana mareliho menjene ohelegeya! Nigakosa dhetene dhinniruma Yehova, ninomuhagalaliha vina enodhana osanzaya wa iyo. Abale animukwela Yehova, anele osanzaya na mukalakala! Mutoma ondawo, ninele woona mikalelo dhottiyana-ttiyana dhindhana okwela wosalapitta. Ninele woona mukalelo ottiyanilani n’okwela wa nlogo na Yehova.