Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Janero ya 2018

Okwa wa Yezu Onolibiha Wiwanana Wehu

Okwa wa Yezu Onolibiha Wiwanana Wehu

“Mone oziva onjavo anamudhi, . . . anedda mumodhani!”—MASALMO 133:1.

JIBO: 149, 30

1, 2. Yaka ejino ya 2018, muttupo gani onanitugumanihe mumodhani, nanda sabwa yani? (Koona foto eli omaromo.)

LABO 31 na Marsu 2018, attu matxikwi menjene orugunuwa elabo ya vati anele woona muttupo obu onkosiwa dila modha vayakani. Nzuwa nigaddowela, Anamoona a Yehova vamodha na attu enjene anawobani anele otugumana mumodhani wila obuwele mukutto onikoseli Yezu. Vyaka dhotene, muttupo wa Wubuwela Okwa wa Yezu, onowatugumaniha attu enjene, opitta muttupo-muttupovi onkosiwa mwilaboni.

2 Yehova na Yezu anosanzaya vaddiddi wawona attu matxikwi menjene orugunuwa elabo yotene adhowaga woona muttupo obo. Bibilia onologa wi “muthithi munddimuwa wa athu ohelegeya, àli a vilabo dhetene, mahimo etene, malogo etene, a vilogelo dhetene” akuwaga eraga: “Mperhe bwa Mulugu wehu, ogilatile vampaddoni, vina bwa Mwana-Nibila.” (Ovuhulela 7:9, 10) Johagalaliha woona wila vyaka dhotene attu  matxikwi menjene anomuttittimiha Yehova na Yezu sabwa ya mukutto okosilani!

3. Mavuzo gani anfunihu wakula mmutomani obu?

3 Mmutomani obu, munele ofwanya dhowakula dha mavuzo manayi: (1) Ddivisasanyedhe dhavi wila ddipurelemo muttupoya obu? (2) Wubuwela okwa wa Yezu onwodha dhavi watugumaniha mumodhani attu a nlogo na Mulugu? (3) Txini enakose miyo wila ddidhena wiwanana mmulogoni mwa Mulugu? (4) Na labona onele okalawo muttupo womariha wa wubuwela okwa wa Yezu? Akala jijuwene, onakale nsaka gani?

NINAVISASANYEDHE VINA NINAPURELEMO DHAVI MUTTUPOYA?

4. Ekalele nni yaderetu woona muttupo wa Wubuwela Okwa wa Yezu?

Yehova na Yezu anowatamaalela abale ankosa kukuttu wila oone muttupo obu wa yaka-yaka

4 Ekalele nni yaderetu iyo woona muttupoya obu, wa wubuwela okwa wa Yezu? Elobo modha jawi muttupo obu onokosa epaddi y’omwebedha Yehova. Nikaane ebaribari yawi Yehova na Yezu anowatamalela abale ankosa kukuttu wila oone muttupo obu wa yaka-yaka. Noona ninfuna wila Yehova na Yezu aziwe yawi ninele okala vamuttuponiva dhilobodha dhigahirutxe. Merelo ehu agazinddiyeleya wila ninowika ttima matugumano ehu, venevo ninonvaha Yehova gari ya wika nzina nehu munivuruni “muli dhapama.” Nivuruna ntto ttinttuwene niniliwa “munivuruni munlebeliwa agumi.” Mazina abo ba abale anavahiwe egumi yohimala na Yehova.—Malakiya 3:16; Ovuhulela 20:15.

5. Labo na wubuwela okwa wa Yezu nihinafiya, txini enakose weyo wi wone akala olivi muroromelani?

5 Sumana dha mundduni labona ntto nihinafiya, ninovira mudhidhi mwinjene nilobelaga noka-noka vina nitanaalelaga mandano ehu na Yehova. (Kengesa 2 Korinto 13:5.) Murumiwi Paulo wahawaddela Akristu eraga: “Muvipime mwanya, mone akala munowedda muroromelani.” Ejoya enkosiwa dhavi? Japama ovivuza nanya-nanya: “Koddi ddinorumeela wila ntti tti nikuru nsakulile Yehova wila nikose ofuna waye? Ddinovilibihedha olaleya vina osunziha miselu dhapama? Mweddelo waga onolagiha wila ddinoziwa wi ninkalawo masaka omariha vina wi olamulela wa Satana oli omagomo? Omuroromela waga Yehova na Yezu koliba-wene, dhahene ninga mwalani omaromo? (Mateu 24:14; 2 Timóteo 3:1; Ahebreu 3:14) Wubuwela dhowakula dha mavuzo aba, onele onikamihedha ‘ovipima nanya’ wi noone elihuya.

6. (a) Dila enfuna onifanyiha egumi yohimala jivi? (b) Munddimuwa dhahi wa mulogo onvisasanyedha dhavi malabo a wubuwela okwa wa Yezu, nanda weyo onawodhe dhavi okosa yakakene?

6 Ttarho yina enokamihedhe ovisasanyedhela labo ntto, ku wengesa vina otanaalela mitoma dhintapulela deretu ttima ya muttupo obo. (Kengesa Joau 3:16; 17:3.) Elobo modha bahi enanittukulele wakela egumi yohimala, ku omuziwa Yehova vina  omuroromela Mwanaye, Yezu. Wila nivisasanyedhe deretu, vanofuneya osakula osunza mitoma dhiniwanana na muttupoya wila dhinikamihedhe onfiyedha kakamwe Yehova. Jijuwene ekosile mbali dhahi oli munddimuwa wa mulogo. Mwa vyaka dhinjene, iyene onosakulaga mitoma dha Mwang’aneli dhinloga Wubuwela okwa wa Yezu vamodha na mukalelo onnikwela Yehova na Mwanaye. Sumana dha munddunimwa iyene onowengesa mitoma eso, agamala otanaalela, woonamo ttima ya muttupo obu. Dila dhinjene iyene onowenjedhedhaga mitoma dhina dhinfwanyiye. Agamala onovirihamo wengesa mapadduwo anloga Okwa wa Yezu. Munddimuwa ole belaga agakosaga esuwene onkala ninga onengesa dhilobo dhiswa wa kadda yaka. Yattimaya jawi osunza waye onomukosiha omukwela vaddiddivene Yehova na Yezu. Weyo vina ogakosa masunzo ninga abuwene, omukwela wawo Yehova na Yezu onele oliba. Mwa venevo ogahitamaalela vopitta mukutto obu okoseliwe weyo nanda ogahipurelamo woona muttupoya.

MUTTUPO OBU ONONIKAMIHEDHA OKALA MUMODHANI

7. (a) Yezu walobelele elobo gani mumattiyuni woroma wa Siyari ya Nabuya? (b) Txini enlagiha wila Yehova wahakula nlobelo na Yezu?

7 Omattiyu woroma, okosiwe Siyarhi ya Nabuya, Yezu wahikosa nlobelo namakamaka. Iyene wahiloga makamaka wiwanana onna iyene na Babe. Yezu wahalobelela arumiwi aye wila akale owiwanana mumodhani ninga iyene. (Kengesa Joau 17:20, 21.) Yehova mohaganyedha wahakula nlobelo ntti na mwanaye. Mottiyana na muttupo mwina, wubuwela okwa wa Yezu onolagiha yawi Anamoona a Yehova ali mumodhani. Masaka abano, matxikwi menjene a attu, a vilabo vina ttebe dhottiyana, orugunuwa elabo yotene, anotugumana vamodha vina anolagiha wila anorumela wila Yehova omuruma Mwanaye. Mu dhilabo dhina enorutxa attu a ttebe yottiyana otugumana vamodha wila oone matugumano, obe akala ehikosiwa dhawene attu eenaya anoona ninga elobo yohifwanyela okosiwa. Mbwenye kahiyo ejuwene enfuna Yehova na Yezu. Mwa awene, woona wiwanana wehu vamuttuponi apo, elobo yohagalaliha.

8. Ezekiyel waddeliwe muselu gani na Yehova?

8 Wiwanana obe okala mumodhani kahiyo yotikiniha mwa attu a nlogo na Mulugu. Yehova wahimwaddela Ezekiyel wila ejoya egahidha opadduwa. Yehova walogile wi Ezekiyel attukule miri minli, mmodha alebevo nzina na “Judá”, mwinaya nzina na “José” nomala otaganyiha, elagihaga wi awene agali mumodhani. (Kengesa Ezekiyel 37:15-17.) “Mavuzo Ankosa Anamengesa” avuwihiwe mu Mwang’aneli wa Julyu wa 2016, aloga: “Mowiwanana na namavuhulela Ezekiyel, Yehova wahiloga wila nlogo naye nigahiyelela Mwilaboni Yolibeliwa, agahilaba mumodhani ninga nlogo nimodha bahi. Nivuhulo ntti, nanawaddana abale vina animwebedha Mulugu masaka abano omariha alivi mumodhani ninga nlogo nimodha bahi.”

9. Wiwanana walogile Ezekiyel, ononeya dhavi vamuttuponi wa wubuwela okwa wa Yezu?

9 Oromana yaka ya 1919, Yehova onowasakulavi vina onowatugumaniha mumodhani attikitteliwi. Awene ali ninga mwiri walebiwe nzina na “Judá.” Abale owinjivaya anna  njedhelo n’ojavo egumi osanzaya velaboni ya vati, aroma ovitaganyiha na attikitteliwi. Aboya kuloga mwiri walebiwe nzina na “José.” Yehova wahilibela wila agahitaganyiha miri esi minli wila ‘okale mmodha bahi’ mmadani mwaye. (Ezekiyel 37:19) Iyene okosiha wila attikitteliwi vamodha na “mabila mena” akale “thanga” modha. (Joau 10:16; Zakariya 8:23) Ddabuno, makuru aba meeli ali mumodhani bagamwebedha Yehova. Awene anna Mwene mmodha bahi Yezu Kristu, ole walogile na Ezekiyel ninga “Mwimeleli waga David.” (Ezekiyel 37:24, 25) Vyaka dhetene nigadhowa omuttuponi wa Wubuwela Okwa wa Yezu, ninowoona wiwanana na makuru abo meeli ninga mwalogile Ezekiyel. Kito muttu-muttu mwa iyo onakose nni wila nilibihe vina nimetxevi wiwanana wa nlogo na Mulugu?

MUTTU-MUTTU WA IYO ONAWODHE DHAVI OLIBIHA WIWANANA OKO?

10. Ninawodhe dhavi olibiha wiwanana wehu ninga nlogo na Mulugu?

10 Ttarhoya yoroma olibiha wiwanana wehu jivi? Ku olaba notene vina n’oviyeviha. Yezu valiye velaboni ya vati, wahakokomeza anamafwara aye wi akale attu oviyeviha. (Mateu 23:12) Attu a mwilaboni anovyona okala attimaya opitta akwawa. Mbwenye nigakala oviyeviha, ninele wariha abali annisogorhela mmulogoni vina ninele wiwelela malago awa. Nigakosa dhawene  mulogo onele okala mumodhani. Elobo yinaya jowila nigakala woviyeviha, ninele omuhagalaliha Yehova sabwani iyene “onowakodda athu opanela, onowavaha mahala anvyeviha.”—1 Pedro 5:5.

11. Woona mukatte na vinyu enlabihedhiwa va muttuponiva onnikamihedha dhavi okalavi wowiwanana mumodhani?

11 Ttarho yanawili enanikamihedhe olibiha wiwanana wehu jivi? Ku otanaalela ejile entapulela mukatte na vinyu enonihu vamuttuponiva. Otanaalelawa oko nikose labona ntto nihinafiya obe mudhidhene obule. (1 Korinto 11:23-25) Mukatte obule ohina emela, entapulela ningo na Yezu nihina yottega nttuwene niperhekileyi ninga mukutto. Vinyu entapulela nikami naye. Mbwenye ninofanyeela otamela ononelamo kakamwe esidha. Japama wubuwela yawi, mukutto wa yobolo okosile Yezu, ontaganyiheya na merelo meli a okwela. Yehova onivaha Mwanaye, vina Yezu onivaha egumi yaye. Nigobuwela mukwelelo onikwelilani, ejo enele onttukulela wakwela awene. Vina omukwela wehu Yehova onele ontugumaniha mumodhani vina onele onilibiha okalavi owiwanana.

Nigalevelela abali ehu, ninlibiha wiwanana vina okala wehu mumodhani (Koona ddima 12, 13)

12. Emariya yalogile Yezu ya mwene na mwimeleli waye enlagiha dhavi wila Yehova onfuna wi nilevelelanege?

12 Ttarho yaneraru enanikamihedhe olibiha wiwanana wehu jivi? Ku walevelela kakamwene attu eena. Nigakosa dhawene ninolagiha wila ninomutamaalela Yehova onnilevelela dhottega dhehu na mukutto wa mwanaye. Wila alagihe wi olevelela kwamakamaka, Yezu wahiloga emariya ya mwene na mwimeleli waye. Kengesa va Mateu 18:23-34, ogamala ovivuze: ‘Ddinorumela okosa eji esunzihile Yezu veneva? Ddinowakurumuwela vina ddinowiwanana na abali vamodha na arogora otene? Ddinorumeela walevelela anddinyimula?’ Ninoziwa wila dhottega dhina dhiddimuwa opitta dhina. Obe dhottega dhina dhinorutxa olevelelawa makamaka wa iyo attu omaningoni. Mbwenye emariya ya Yezu, ennisunziha wila Yehova onfuna wi nikosege dhawene masiki erutxe. (Kengesa Mateu 18:35.) Yezu olagiha wila Yehova txipo kananilevelele akala iyo kannalevelela abale annittegela, masiki bana sabwaya yowalevelelana. Noona japama wubuwela deretu makaniya aba. Wila nilibihe wiwanana wehu mumodhani, ninofuniwana walevelela akwehu dhahene ninga munisunzihile Yezu.

13. Ninlibiha dhavi wiwanana wehu nigakala mmurenddeleni na abalihu?

13 Nigalevelelana muttu na mukwaye, pavenevo vanlibiha iyo murenddele wehu na akwehuya. Murumiwi Paulo belaga nilabege na ntidi wila nikale mumodhani vina nilibihe murenddele. (Éfeso 4:3) Noona mwari mwa sumana ya wubuwela okwa wa Yezu, obe omattiyu-wene obule katanaala mukalelo onaweddiha weyo akwawo. Ogamala ovivuze: ‘Abale anddiziwa anowoona wila kaddimmaguvela osilidhiwa ddiganyimuliwa? Attuya anowodha oddona wila ddinokosa kukuttu wila ddidhenavo murenddele, vamodha na wiwanana?’ Aba mavuzo amakamaka wi atanaaleliwe.

14. Ninalagihe dhavi yawi ninopiselagana “murima mukwelanani”?

14 Ttarho yanenayi enanikamihedhe olibiha wiwanana wehu jivi? Ku omutagiha Yehova olagihile okwela. (1 Joau 4:8) Iyo txipo kaninaloge: “Ddinowakwela abali otene  mbwenye kaddinziveliwana.” Akala ninubuwela dhawene japama oziwa wila nittiya ovirihamo malago a Paulo anloga “mpiselagane murima mukwelanani.” (Éfeso 4:2) Kobuwela wila Paulo kalogile wi “mpiselagane murima” bahi, walogile wi mukosele “mukwelanani.” Apa vakala ottiyana. Mmulogoni mwehu mukala attu ottiyana-ttiyana, nanda aboya otene ddi Yehova wawobile. (Joau 6:44) Txibarene iyene onowakwela attuya abo. Akala Yehova onowakwela abali na arogora abo, kito ninakoddele nni wakwela? Mwakakene, nakwele dhahene ninga munakwelela Yehova.—1 Joau 4:20, 21.

WUBUWELA OKWA WA YEZU ONAGOME NSAKA GANI?

15. Ninziwa dhavi wila onele okalawo muttupo womariha wa wubuwela okwa wa Yezu?

15 Labo nimodha, ninele woona muttupo womariha wa wubuwela okwa wa Yezu. Ninziwa dhavi esodha? Paulo wahawaddela Akristu ottikitteliwa wila malabo otene anubuwelani okwa wa Yezu, ‘amulaleyege Nabuya mpaka vanadhiye.’ (1 Korinto 11:26) Va nivuhuloni ntti, Yezu wahiloga “odha” waye addagana masaka omariha. Alogaga sabwa ya goyi enddimuwa enadhe iyene belaga: “Enere woneya wirimu ezinddyelo ya Mwana-Muthu; athu a malogo otene anere wunla, anere omona adhaga mmiraboni n’owodha na ovuwa onddimuwa. Iyene onere waruma anju aye, obe parhaza wi àgumanihe asakulileye oromana komo y’elabo mpaka komo yina.” (Mateu 24:29-31) Yezu onfuna “àgumanihe asakulileye” agamala wattukulela odhulu omiraboni, Akristu otene ottikitteliwa. Ejoya enapadduwe omaromelo wa goyi enddimuwa, mbwenye koddo ya Armagedon ehinatti. Mu koddoni ejo, Yezu vamodha na 144.000, anele owana na amwene a elabo, nanda onele wapemberha. (Ovuhulela 17:12-14) Muttupo womariha onakosiwe Yezu ahinatti ‘wagumaniha asakulileye’ onele okala womarihaya-kakamwene.

16. Ninfunela nni wona muttupo wa wubuwela okwa wa Yezu yaka ejino?

16 Kakala womala na wale wila woone muttupo wa Wubuwela okwa wa Yezu labo 31 na Marsu, 2018. Nanda kamukumbirhe Yehova wila okamihedhe okosa kukuttu wila iyo ninga nlogo naye nikale owiwanana mumodhani. (Kengesa Masalmo 133:1.) Labo nimodha, ninele woona muttupo womariha wa wubuwela okwa wa Yezu. Mbwenye labo ntto nihinafiya, nilagihevi wila wiwanana onkanihu vamuttuponi obo, kwa ttima mwa iyo.