Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Feverero ya 2018

Ottaba—Nvaho Onda wa Mulugu

Ottaba—Nvaho Onda wa Mulugu

ATTU enjene anofuna wagalala. Mbwenye vowi ninkala masaka omariha, attu otene anofanyiwa makattamiho ‘orutxa.’ (2 Timóteo 3:1) Attu ena anoyelela wagalala wawa sabwa yawi anopujiwa, anokala aredda, ahitowa ganyo, obe akweliwa amudhawa. Ena vina anoyelela wagalala sabwa ya wila anopadduweliwa dhilobo dhinakattamiha. Nabaleya vina animulabela Yehova anodhugudheya ofiyedha oyelele wagalala wawa. Akala onopadduweliwa dhilobo ninga esiwene, onawodhe dhavi wiyelela wagagalala waniwena?

Wi nakule nivuzo ntti, vamaromo ninofanyela ononelamo deretu wi wagalala webaribari txini nanda attu ena agumanilena makattamiho, awodhile dhavi ottidelavi wagalala wawa. Ninele wona enaniwodhihe ottiddelavi wagalala wehu.

OWAGALALA TXINI?

Wagalala kahiye oziveliwa. Karoma wubuwela: Mulezeli onoteya vaddiddi. Mbwenye agasisimuwa kanteya, onofiyedha wona wi ohikana makattamiho menjene. Wagalala waye kwamudhidhi mung’onovi, kuloga wi kahiye wagalala webaribari.​—Gano 14:13.

Etanalelo yoziveliwa enda mmirimani, akala ninogumela obe ninojedha ogumela elobo yonittabiha. Okana wagalala webaribari entapulela oziveliwa mwa mpaddi oli wotene nigafwanyiwa elobo yabure obe yaderetu. (1 Tesalónika 1:6) Mwebaribari ninogumanana dhilobo dhinninyagula mbwenye ninokalavi wowagalalene. Motagiha murumiwi Paulo wahivadiwa sabwa ya olaleya miselu dha Yezu. Mbwenye awene ‘avenya mmuttegoni attabaga sabwa Mulugu owavaha ttima y’ososeliwa nzina na Kristu.’ (Merelo 5:41) Wagalala wananina kiyali sabwa yovadiwa mbwenye yokala ororomeleya na Mulugu.

Wagalala kunda woka, enofanyeela okosavo elobo. Ninlogelani dhawene? Ninlogela sabwa yawi, wagalala musapo wa muya wokoddela wa Mulugu. Muya wa Mulugu ononikamihedha wunuwiha ‘makalelo a omuttu oswa,’ entaganyiheya na wagalala. (Éfeso 4:24; Galásia 5:22) Akala nili attu owagalala ninele owodha owanana makattamiho ehu.

NIFWARE DHOTAGIHA ESI

Yehova wafuna wi velaboni ya vati vakoseyege dhilobo dhaderetu ottiya dhilobo dhabure. Masiki attu ena erege dhilobo dhotabala Yehova kattiyile wagalala waye. Bibilia onloga wi: “Mmusanani mwaye munowoneya guru na othaba.” (1 Mapadduwo 16:27) Ottiya ejo, dhilobo dhaderetu dhinkosa adhari aye dhinomuhagalaliha.​—Gano 27:11.

Iyo ninotagiha, mwakamwene ninga munkosela Yehova masiki dhipadduwe dhahajedhelihu. Kanizuzume, nagalale na dhilobo dhaderetu dhina iyo ovanene vina nijedhele n’ofwasa  dhilobo dhattima dha musogorho. *​—Koona yowenjedhedha.

Mbibiliani muhikala dhotagiha dha attu enjene ali owagalala masiki agali mmakattamihoni. Abramu wali wowagalala aziwaga wi egumi yaye yali vangovini sabwa ya attu amutxiga. (Wita 12:10-20; 14:8-16; 16:4, 5; 20:1-18; 21:8, 9) Iyene okosile eni? Sabwa yowubuwela okalawo elabo eswa egalamuleliwe na Muttikitteliwi. (Wita 22:15-18; Ahebreu 11:10) Yezu ohiloga: “Abramu nikolo nenyu wanjyedha n’othaba siku na odha waga.” (Joau 8:56) Iyo ninolagiha wi ninomutagiha Abramu sabwa ya wubuwelaga no’ttaba njedhelo nehu na musogorho.​—Roma 8:21.

Paulo na Sila akana nroromelo noliba vina ahidhowavi owagalala masiki na makattamiyo orutxa agumananani. Motagiha, mmalelani ovadiwa vina ofiyedha ofugeliwa mukambura, “anlobela, amwibelaga jibo Yehova. Awene anwodha ovilela na wagalala sabwa yawi anubuwela nlibelo na Mulugu na musogorho. Oziwa wi atabutxeliwa sabwa yokala anamafwara a Kristu yanavaha wagalala. Iyo ninimutagiha Paulo na Sila, mwa wubuwela mareliho anda sabwa yokala attu ororomeleya.​—Filipi 1:12-14.

Masaka abano vina, dhihikalawo dhotagiha gwe dha abali na arogora anwodha okana wagalala masiki aganavi makattamiho orutxa. Motagiha, Mweri wa Novemburu yaka ya 2013 pevo yamutokora ehigujula numba okwaranya muttengo 1.000 dha Anamoona a Yehova elabo y’o Filipina. George, kwatti y’o Tacloban mbali dhahi numbaye yahigujuwa yotene, iyene ohiloga: “Masiki na esi dhipadduwile abali otene ali owagalala. Enonirutxa ologa mukalelo onagalala iyo.” Nigobuwela esile dhinnikosela Yehova niziwaga omutamalela ninofanya wagalala masiki mmakattamihoni. Elobo gani enivahile Yehova ennikamihedha ofanya wagalala?

ELOBO YINA ENNIVAHA WAGALALA

Wagalala wehu ondela sabwa yokana wandana na Yehova. Iyo ninomuziwa mwene wa wirimu. Iyene ddi babi wehu Mulugu wehu vina ddimukwehu!​—Masalmo 71:17, 18.

Iyo ninowagalala sabwa ya Yehova onivaha egumi na ewodhelo ya otanalela. (Kohelét 3:12, 13) Sabwa yawi ddi iyene onikwekwettile ninononelamo efunelo yaye ya weddihana egumi yehu. (Kolosi 1:9, 10) Noona attu ena kannonelamo ettanddeliwe egumi yehu. Wi nitapulele ottiyana oku wa ononelamo, murumiwi Paulo ohiloga: “‘Kawo mento onile, maru ewale; kawiwo murima wubuwele dhapama dhàkoyele Mulugu animukwela.’ Mulugu oniziwiha iyo dhetenedhà na owodha wa muya.” (1 Korinto 2:9, 10) Ononelamo efunelo ya Mulugu enonivaha wagalala.

Yehova ohinikosela dhilobo dhinjene. Iyene ohikosa elobo efudhile dhotega dhehu. (1 Joau 2:12) Onivaha njedhelo nokalawo mwilaboni eswa, enafiye mohigoneela. (Roma 12:12) Masiki ovanene Yehova ononivaha akwihu annipamgarhaza. (Masalmo 133:1) Iyene vina ononibarela na amwiddani ehu Satana na adomonyo. (Masalmo 91:11) Nigadhowaga banigobuwela mareliho annivaha Mulugu, ninokana wagalala.​—Filipi 4:4.

NIFANYE DHAVI WAGALALA WOHIMALA

Mukristu oli wowagalalene, onwodha dhavi okanavi wagalala ohinmala? Yezu ohiloga: “Othaba onna miyo okale na nyuwo; othaba wenyuwá wakwane.” (Joau 15:11) Ejo entonyihedha wi jowodheya okana wagalala ohinmala. Niladdanihe wagalala oku na motto. Akala  ninofuna wi motto okale woviha vaddiddi nidhowevi banigekavo kuni. Kobuwela: Muya ononikamihedha ofanya wagalala. Noona akala ninofuna okana ottaba nidhowegevi banigakumbirha muya wa Mulugu modhela malobelo. Nidhowegevi banigatanalela dhinloga Bibilia sabwani ovudheliwe na muya wokoddela.​—Masalmo 1:1, 2; Luka 11:13.

Elobo yina enanivahe wagalala onddimuwa ja ozuzumela dhilobo dhinimuhagalaliha Mulugu. (Masalmo 35:27; 112:1) Sabwa yani? Bibilia onologa vina wi ‘Nimurihe Mulugu nifare malamulo aye.’ (Kohelét 12:13) Iyo Nittandeliwe okosa efunelo ya Mulugu. Noona akala ninomulabela Yehova ninele okana wagalala oddimuwa mwigumini mwehu. *—Koona yowenjedhedha.

MARELIHO ANDANA OTTABA

Nigonuwihaga wagalala wehu, ninele woona mareliho meena. Motagiha, Yehova onoziveliwa aganonaga banigamulabela na wagalala masiki nigafanyiwa makattamiho. (Olibiha 16:15; 1 Tesalánika 5:16-18) Vina akala nihikaana wagalala webaribari kanubuwele wi okana dhilobo gwé elobo yamakamaka mwigumini mwehu. Mbwenye nikosele muli-mwetemwene wi nikamihedhe omwene wa Mulugu. (Mateu 13:44) Nigonaga dhopurelamo dha omukosela Yehova mabasa menjene, ottaba onela oninjivela, etanalelo yehu enela oniluluva, vina attu ena anele wagalala.​—Merelo 20:35; Filipi 1:3-5.

Nigakaanavi wagalala kaninabulele vaddiddi. Bibilia onologa: “Murima woteya onkala murobwe onvulumutxa.” (Gano 17:22) Muttu dhahi onziveliwa opepesa okosile masunzo manddimuwa a Nebraska o Estados Unidos osunzile mwaha wa egumi ohiloga elobo eniwanana na Bibilia. Iyene ohiloga: “Akala weyo onowagalala vina onoziveliwa na egumi yawo ovanene, musogorho onele okana egumi yowakwana.

Masiki nikalagawo masaka o’sosa, ninela owodha wagalala nigattambirha muya wokoddela, modheela olobela osunza nzu na Mulugu vina otanaalela. Nagalale na dhilobo dhinnikosela Yehova ovanene vina nigatagiha nroromelo na attu ena na ovilibihedha okosa efunelo ya Mulugu. Venevo ninele weha elebiwe va Masalmo 64:10 enloga: “Muthu wowiwananeyana na Nabuya, onothaba n’okala na iyene.”

^ par. 10 Ndoweni nisekeserhe mukalelo obu wovilela mwari mwa mwana-mutoma ondawo onloga dha ‘musapo wa muya wokoddela.’

^ par. 20 Wi oziwe dhilobo dhina dhindana wagalala, koona kasha ‘ Marhe a Wenjedhedhana Ottaba Wehu.’