Skip to content

Skip to secondary menu

Skip to table of contents

Anamoona a Yehova

Etxuwabo

Enowodheya Okaana Wagalala Vamuralani Vawo

 EPADDI 5

Onawodhe Dhavi Okaana Murenddele na Anamudhi Awo

Onawodhe Dhavi Okaana Murenddele na Anamudhi Awo

‘Ttukulani meeddelo ehu a . . . ttagaraga, oviyeviha, ofwasa, vina okurumuwa.’Akadda Kolosi 3:12

Matelo anomaga murala muswa. Masiki mudhidhi wotene weyo onokala wakwelagavi vina warihaga anamudhi awo, mwadhiyo obe mamuno muttu wamakamaka wawo velaboni ya vati. Ejo poddi okala yorutxa anamudhi awo orumeela. Mbwenye gano dha Bibilia dhinowodha wukamihedha okala wovipimelela, mwa venevo weyo poddi okaanavi murenddele na anamudhi awo, mudhidhi onlaba weyo na guru wi olibihe omarho wawo na murala muswa.

 1 OKAANE MUKALELO WADERETU NA ANAMUDHAWO

TXINI ENLOGA BIBILIA: “Omurihe babo na mayo.” (Akadda Éfeso 6:2) Mohitanalela wunuwa wawo, weyo mudhidhi wotene onofanyeela wariha vina wattittimiha ababo. Ononelemo wi mamuno obe mwadhiyo, mwana wa mulobwana obe mwana wa muyana, onofanyeela wariha vina watanaala ababe. ‘Okwela kuna nrima,’ txipo kukale wosilidhiwa na omarho ona mwadhiyo obe mamunawo na amudhaye.1 Akadda Korinto 13:4; Akadda Galásia 5:26.

TXINI ENFANYEELA WEYO OKOSA:

  • Orabele ologa mazu onyakuwa, ninga aba “amudhi awo mudhidhi wotene anoddipwaza” obe “Mamayawo txipo kanziveliwana dhinkosa miyo”

  • Kaveda woona dhilobodha na mukalelo ninga onoona mwadhiyo obe mamuno

 2 OKALE WOLIBA EGAWODHEYA

TXINI ENLOGA BIBILIA: “Nona mulobwana onele omuthiya babe na maye, akale na mwadhye obili akale muthu mmodha.” (Wita 2:24) Weyo ogatela obe ogateliwa, amudhi awo podi wubuwela wi awene anodhowavi bagawutanala, vina awene anotamela oziwa meeddelo a vatakulu vawo txino elobo yahafanyeelani okosa.

Jofanyeela wi weyo na mwadhiyo mwiwanane txini enfanyeelela vina ehinfanyeelani oziwa, na okwela muloge na awene. Weyo podi okala vina wonyaala ottiyaga okala wosilidhiwa. (Gano dh’olelana 15:1) Na oviyeviha, okurumuwa, ovilela dhinele wukamihedha omaga omarho waderetu na anamudhi awo vina onele odhowavi “mpiselagane murima mukwelani.”Akadda Éfeso 4:2.

TXINI ENFANYEELA WEYO OKOSA:

  • Akala weyo onozuzumela mukalelo onag’anela anamudhi awo mwigumini mwawo, katanalela ejiya na mamuno obe mwadhiyo na ofwaseya

  • Mwiwanane mudhidhi onasekeserhe nyuwo makaniya