Skip to content

Skip to secondary menu

Skip to table of contents

Anamoona a Yehova

Etxuwabo

Enowodheya Okaana Wagalala Vamuralani Vawo

 EPADDI 7

Mukalelo wa Omulelana Mwanawo

Mukalelo wa Omulelana Mwanawo

“Malamulo aba anuvahani miyo ddabuno, alebeye mmirimani mwenyu munere wasunzihaga aninyu.”Olibiha 6:6, 7

Mudhidhi witile Yehova masasanyedho a murala, iyene ohika nlamulo wa ababi wi awag’anelege anawa. (Akadda Kolosi 3:20) Obu bu muttorho wawo ninga ababi walela anenyu wi amukwele Yehova vina okala anddimuwa ofanyeela. (2 Timóteo 1:5; 3:15) Weyo onofanyeela oziwa eli mmurimani mwa mwanawo. Mwebaribari, ntonyihedho nawo ttamakamaka. Mukalelo wamakamaka wa omusunziha mwanawo Nzu na Yehova bwa vamaromo wika mmirimani mwawo.Masalmo 40:8.

 1 KAKALA WOFIYEDHEYA WI ANAWO ALOGEGE NA WEYO

TXINI ENLOGA BIBILIA: “Muthu-muthu ethekele maru wiwa, kaguvele wakula.” (Tiago 1:19) Weyo onofuna wi anawo aloge na weyo na ofuru s’wova. Awene anofanyeela oziwa wi weyo oli womala na wale wi wiwe esile dhinfuna awene ologa. Kavilibihedhe okala vamburoni wa murenddele wi awene afanye mikalelo dha ologa esile dhinubuwelani. (Tiago 3:18) Akala awene onubuwela wi weyo onele okala wosilidhiwa obe onele wattonga, awene mwebaribari kanaloge yamakamaka mwa esile dhinfunani ologa dhili mmurimani mwawa. Kakala wovilela na anawo vina mudhidhi wotene kawaddele wi onowakwela.Mateu 3:17; 1 Korinto 8:1.

TXINI ENFANYEELA WEYO OKOSA:

  • Kakala wofiyedheya mwanawo agafunaga ologa na weyo

  • Ologege na anawo mudhidhi wotene, ottiya vagakala makattamihovi bahi

2 KAVEDA ONONELAMO ELI AWENE

TXINI ENLOGA BIBILIA: ‘Onfwaseyela wiwa nzu onofwanya gari.’ (Gano dh’olelana 16:20) Na mudhidhi mwina weyo onofanyeela otanaalela mazu a anawo wi ononelemo yubuwelo yawa. Mudhidhi mwina azombwe anowenjedha mazu awa obe alogaga dhilobo dhina dhahafunani ologa. “Wakula ohinatti wiwelelamo jabure enovaha manyazo.” (Gano dh’olelana 18:13) Kumaguvelege  okaana rayiva.Gano dh’olelana 19:11.

TXINI ENFANYEELA WEYO OKOSA:

  • Kasasanyedha makaniya kaloga nofwaseya kugaddele, elobo txilobo enloga anawo

  • Kaveda wubuwela mudhidhi waliwe mwana vina txini yakala ninga yamakamaka mwa weyo

 3 KALAGIHANI WIWANANA VASOGORHO VAWA

TXINI ENLOGA BIBILIA: “Mwanaga, ovuruwane malago a babo, kupwaze dhinuwaddela mayo.” (Gano dh’olelana 1:8) Yehova onovaha nlamulelo wa ababi vamodha na amai wi awag’anelena anawa. Onofanyeela wasunziha anawo owuttittimiha vina owiwelela. (Akadda Éfeso 6:1-3) Aima anowodha ozinddiyela akala amambali awa kali ‘owiwanana muyubuweloni.’ (1 Akadda Korinto 1:10) Akala vakala magudulano moheeli, karabela opambihana vamentoni vawa sabwani ejo podi odha oyeviha nttittimiho nawa mwa nyuwo ninga amambali awa.

TXINI ENFANYEELA WEYO OKOSA:

  • Kasekeserhani makaniya vina mufanye mutomaya modheela mikalelo dhowalelana aninyu

  • Akala muhikaana yubuwelo yottiyana modheela mikalelo dhowalelana aninyu, kavedani wona mukalelo wononelamo wa mamuno obe mwadhiyo

 4 KAKAANA MASASANYEDHO

TXINI ONLOGA BIBILIA: ‘Kamulele mwana dila enfanyeela iyene weedda.’ (Gano dh’olelana 22:6) Wi masunzo a mwanawo eddeleye deretu onofanyeela omushagiha vowi mperhe kunda ebewene. Weyo onofanyeela okosa masasanyedho, antaganyiheya na walela anawo. (Masalmo 127:4; Gano dh’olelana 29:17) Olela kuntapulela ososotta, mbwenye olela ondela wa wakamihedha anawo ononelamo malamuloyá. (Gano dh’olelana 28:7) Vina wasunzihe okwelaga Nzu na Yehova wi atanalele maganoya aba. (Masalmo 1:2) Ejo enele wakamihedha wunuwiha etanaalelo yaderetu.Ahebreu 5:14.

TXINI ENFANYEELA WEYO OKOSA:

  • Kakaana ebaribari wi anawo anomoona Mulugu ninga Muttu webaribari onfanyeela awene omukuluvela

  • Kakamihedhe awene osunza ozinddiyela vina orabela dhilobo dhowopiya, ninga Interneti obe dhipano dha mmuruddani. Wasunzihe awene mikalelo dha orabele attu anagoniha aima na mukalelo wonyakuwa

‘Kamulele mwana dila enfanyeela iyene weedda’