Skip to content

Skip to table of contents

Anamoona a Yehova

Select language Etxuwabo

 EPADDI 6

Mukalelo Ontxinja Nyenye Matelo

Mukalelo Ontxinja Nyenye Matelo

‘Ana tti nruriho na Yehova.’Masalmo 127:3

Obaliwa wa nyenye podi okala elobo yohagalaliha na mudhidhi wakakene yolemela. Ninga ababi aswa, nyuwo txino podi otikina mwa woona wi mudhidhi mwinjene ommala na omulela nyenye. Ojombeliwa wa tturho vamodha na osadduwa wa dhubuwelo podi ototela onyimuwa ovugulaga wandana wenyu. Weyo na mwadhiyo obe mamunawo munofanyeela okosa masasanyedho wi mmulele mwanenyu vina muttiddelaga matelo enyu. Gano dha Bibilia dhinawukamihedheni dhavi wi muwodhe okwaranya magudulano ninga abuwene?

 1 KANONELAMO MAKALELO ANTXINJA AIMA EGUMI YAWO

TXINI ENLOGA BIBILIA: “Okwela onovilela vina onowakoddelela murima attu.” Vina, okwela ‘kumtameletxa dhofuna dha omwinya, kumnyanyuwa.’ (1 Akadda Korinto 13:4, 5) Ninga mambali wa musunzi, txino moonelo wawo podi okala wa omuzuzumeletxa nyenye. Noona, mamunawo podi woona ninga onopwaziwa, kudduwale wi iyene onoveda vina otanaaliwa. Na ovilela vamodha na oderetu, weyo podi omukamihedha iyene mamunawo woona wi onokweliwa vina onotanaliwa na mukalelo wakakene na mwanenyu.

‘Nyuwo amamuni . . . mudhowevi mukalaga na awene mowiwanana na eziwelo.’ (1 Pedro 3:7) Ononelemo wi mwadhiyo onele ononga guru dhinji modheela omulela mwanenyu. Iyene ohikaana muttorho muswa vina podi okala wonyaguleya, wolema, obe wonyimuwa. Na mudhidhi mwina iyene podi okala wonyonyeya na weyo, mbwenye kakala womaalene sabwani “ovilela onopitta guru.” (Gano dh’olelana 16:32) Kalagiha etanaalelo, vina kanvahe nlibiho ninfuna iyene.Gano dh’olelana 14:29.

TXINI ENFANYEELA WEYO OKOSA:

  • Ababi: Kakamihedheni awadhinyu watanaala aninyu, masiki na mattiyu. Ovahe maddile mudhidhi ononga weyo na mabasa meena mwadhahene onowodha ononga mudhidhi na mwadhiyo vina na nyenye wawo

  • Amai: Mamuno agavivelela wukamihedha omulela nyenye, karumeela nikamihedho naye. Akala iyene kankosa mabasaya deretu, kumusadeye, mbwenye na oderetu omusunzihe

 2 KAVADDIHA OMARHO WENYU

TXINI ENLOGA BIBILIA: ‘Obili anokala muttu mmodha.’ (Wita 2:24) Masiki bunavi muttu muswa vamuralani vawo, kobuwela wi weyo na mwadhiyo vina na mamunawo muli “muttu mmodha.” Kakosa guru dhinji wi ovaddihe wiwanana wenyu.

Ateliwi, katamaalelani nikamihedho na amamunenyu vina nlibiho nawa. Mazu awo a otamaalela podi okala ‘murobwe.’ (Gano dh’olelana 12:18) Amamuni, kalogani na awadhinyu wi munowakwela vaddiddi vina munowavaha ttima. Kamurihe iyene modheela mukalelo onatanaala iyene anamudhi.Gano dh’olelana 31:10, 28.

‘Kakalewo ontamela okala mukumbela vaye; muttu-muttu àzuzumele akwaye’. (1 Akadda Korinto 10:24) Dila dhotene katamela omukosela mwadhiyo obe mamunawo eli yofanyeela. Ninga atelani katamelani mudhidhi wi mulogege vamodha, mutamaalelagana vina muvuruwanegena muttu na mukwe. Kukaane nrima modheela ogonihana vamateloni. Katanalela dhofuna dha mwadhiyo obe dha mamunawo. Bibilia onloga wi: ‘Kamukoddanege muttu na mukwe mukanege etanaalelo yakakene muttu na mukwe.’ (1 Akadda Korinto 7:3-5) Mwadhahene kasekeserhani makaniya nyuwo eeli mwanyene. Ovilela wenyu na wiwelela onele olibiha wiwanana wenyu.

TXINI ENFANYEELA WEYO OKOSA:

  • Kudduwale oveda mudhidhi wokala vamodha

  • Kakosa elobo txilobo enimukosiha mwadhiyo obe mamuno woona wi onokweliwa, ninga okosa mulebo mug’onovi obe onvaha elo eg’onovi ninga nvaho

 3 OMUSUNZIHE NYENYE WAWO

TXINI ENLOGA BIBILIA: ‘Weyo ohiziwa malebo okoddela aromilena weyo voyimani, anuvaha ononelamo wa ovuneya.’ (2 Timóteo 3:15) Okose masasanyedho mwa esile dhinfanyeela weyo omusunzihana mwanawo. Iyene ohikaana ewodhelo yotikiniha ya osunza, masiki ahinatti abaaliwa. Mudhidhi onkaliye mbani, nyenyawo onowodha ozinddiyela lizu nawo na ottaba wawo. Kamwengesele ahinabaliwa. Masiki akala iyeneya kanwodha ononelamo esile dhinengesiwe, esuwene dhinele onvaha yopurelamo nsaka ninonuwe iyene.

Nyenye wawo kayo mima vaddiddi wohiwodha wiwa makani awo modheela Mulugu. Kamuttiye wi ewe malobelo awo wa Yehova. (Olibiha 11:19) Mudhidhi onlobela nyuwo vamodha, kalogani modheela dhilobo dhikosile Mulugu. (Masalmo 78:3, 4) Mwanawo agonuwaga, iyene onele owodha wona okwela wawo wa Yehova iyene vina onela osunza omukwela.

XINI ENFANYEELA WEYO OKOSA:

  • Olobelege makamaka wi okaane eziwelo wi omuswagihena mwanawo

  • Wiyelele mazu amakamaka wa anawo mwadhahene iyene onela osunza momaguva