“Ddunuwile mmuruddani muñgono wa provinsia ya omadhulu,” ohiloga Dauda wa o Serra Leoa. “Siku nimodha, baddili muzombwe, wahitatamuwa kani ya owanela mundda, murala waga na murala mwina. Kadda murala waloga wila munddaya bwaga. Wila kaniya egomihiwe, wahitxemerhiwa mulobwana wa namungu. Namunguya wahinvaha mulobwana mwina supeyo, mumaleliye bamukuneela na guwo yotxena. Venevo mulobwana oddule wali mu guwoni wahiroma ogurumela vina ovihedhiwa. Mwañganeliye mu supeyonimwa, iyene wahikuwa: ‘Ddinomoonamo mulobwana wa kalaba bagaaddamela! Iyene omwabalile kapoti wotxena. Iyene ddolapa vina kalaba, nanda ohikaana dhibwi, oneedda bagulamile vañgono.’

“Iyene wamuloga Bibi wa mulobwana! Mumaleliye wahinyanyuwa nanda bakuwa wila: ‘Akala nyuwo kamunrumeela esi dhinloga miyo, mudhe moone mwanya!’ Txibarene, kavo mwa iyo walibile murima wila akose ejene! Namungu oddule wahimmaaliha modheela omuwazela mataba a masalapitho oovuganyiwa na manje, aathiddeeliye mu ekasini.

“Bagaloga modheela mulobwana wathiddeeli supeyo, ‘Bibi wa mulobwana’ wahiloga yawila munddaya wali wa murala wehu. Iyene wahimpanga bibi waga wa muyana yawila onofanyeela olima munddaya s’ohikubanya. Murala obule mwina wahirumeela othonga oku. Kaniya yahigomihiwa.”

 Dhilobo ninga esi dhinopadduwa vaddiddi Omaddowelo wa Nzuwa wa Afrika. Wenewale, ninga dhipaddi dhiina dha elabo, athu matxikwi na matxikwi anororomela yawila abale akwile anovirela elabo ya muya, wenewo onwodhani wawoona vina opakela egumi ya athu velaboni ya vati. Nroromelo nthi tha ebaribari? Abale akwile ahikalawo txibarene? Akala kawo, ki abale anloga wila awene muya dha abale akwile bani? Oziwa yowakula yatxibarene mwa mavuzo aba kofuneya vaddiddi. Ontapulela egumi obe okwa.