Skip to content

Skip to secondary menu

Skip to table of contents

Anamoona a Yehova

Etxuwabo

Muya Dha Abale Akwile—Dhinowodha Wukamiha Obe Wuputhula? Dhihikalawo Txibarene?

Kamulabe Yehova, Kumulabe Satana

Kamulabe Yehova, Kumulabe Satana

Iyo notene nihikaana yosakula. Obe ninimulaba Yehova obe ninimulaba Satana na adomonyo aye. Kaninwodha okosa dhobiili. Omulaba Yehova elobo ya zelu vaddiddi.

Yehova Ddaderetu

Ninga mumalelihu woona, adomonyo anowiwa oziva na wavoreya vina wanyengetha athu. Yehova kali dhaene. Iyene onokwela nlogo na athu ninga babi munakweliye ana aye. Iyene ddi Namavaha wa “mvaho wotene waderetu vina sagwati yotene yowakwana.” (Tiago 1:17) Iyene kankooddiha nlogo na athu elobo yaderetu, masiki na operheka muthengo munddimuwa.—Efeso 2:4-7.

Yezu, Mwana Mulugu, wahakwela athu modheela ovulumutxa maredda awa

Kobuwela dhilobo dhikosiwe na Yezu velaboni ya vati, Mwana Mulugu. Iyene wahakosiha aliba ohiloga ologa vina wahikunula mento a aliba ohoona. Iyene wahavulumutxa aliba maranya vina aliba otopinya. Iyene wahakopola adomonyo vina wahivulumutxa makalelo otene a maredda. Modheela ewodhelo ya Mulugu, Yezu wahavenyiha abale akwile bakalawo wili.—Mateus 9:32-35; 15:30, 31; Lukas 7:11-15.

Othiya ologa dha othambi wila anipupurutxe, dila dhotene Mulugu onologa ebaribari. Iyene txipo kanamunyengethege muthu.—Olebeliwa 23:19.

 Karabela Merelo Ootakala

Ninga raddangwe onthidda txentxe na omaguva vaddiddi, matxikwi na matxikwi a athu ahithiddiwa na magano abure vina dha othambi. Awene anowawova abale akwile. Awene anowawova adomonyo. Awene anokubanya wulumeliwa, anowova masele, dhithumwa, vina olowiwa. Awene ahimagiwa na esile dhinrumeelani vamodha na magano abure a dha othambi wa Satana Ddiabo. Adhari a Mulugu kamagiwe nne ngafuna na elobo modha mwa esene.

Yehova dda guru vaddiddi opitha Satana. Weyo ogamulaba Yehova, iyene onela wubarela mwa adomonyo. (Tiago 4:7) Dha olowa kadhinalabege. Motagiha, elabo ya Nigeria, anamungu araru owopiya vaddiddi aahimulowa wila ampe Namoona wa Yehova oddwene wakooddile omwala mu sidadi. Dha olowadha mwakooddelani olaba, namunguya mmodha wahova vaddiddi, banfiyedha Namoona oddule, nanda bamuthidda myeddo wila amulevelele.

Akudda Efeso aahiddumeya manivuru awa a masalapitho

Akala adomonyo anowubuddugela, kamutxemerhe Yehova modheela nzina naye nanda iyene onela wubarela. (Vimarya 18:10) Mbwenye wila okaane nibarelo na Mulugu, weyo onofanyeela onyanyala kakamwe elobo elobovi yowiwanana na ologa na muya vina wawebedha adomonyo. Anamebedha a Mulugu a sidadi ya wale ya Efeso aahikosa ejene. Awene aahigumanyedha manivuru awa otene a masalapitho nanda baddumeya. (Merelo 19:19, 20) Adhari a Mulugu a nsaka na ovanene anofanyeela okosa yakakene.  Kanyanyala dhithumwa, dhirisi, piri dha “ovibarelana”, dhitagano dhinlemeziwe, manivuru a masalapitho, vamodha na elobo elobovi yina yowiwanana na merelo a dha muya.

Kalabihedha Webedha wa Ebaribari

Akala weyo onofuna omuhagalaliha Mulugu, okalela onyanyalavi webedha ohili wa ebaribari vina otxeleela okosa dhilobo dhabure kunakwana. Weyo onofanyeela olabihedha webedha wa ebaribari na guru vaddiddi. Bibilia ononilagiha txini enfuneya:

Katugumana omatugumanoni a Okristu.—Aebreo 10:24, 25

Kamusunze Bibilia.—Joau 17:3

Kaalaleyele athu ena.—Mateus 24:14

Kamulobelelege Yehova.—Filipi 4:6, 7

Kabatiziwa.—Merelo 2:41

 Katugumana na Anamoona a Yehova

Satana na adomonyo ahikaana athu velaboni ya vati abene ansunziha vina ankosa dhilobo dhohikala. Mbwenye Yehova ohikaana athu vina. Awene ba Anamoona a Yehova. (Izaia 43:10) Ozugunuwa elabo ya vati, vahikala Anamoona okwaranya miliau mitanu na modha. Otene anotamela okosa dhilobo dhaderetu na guru vaddiddi vina wasunziha athu ebaribari. Mu dhilabo dhinjidha, weyo podi ogumana na awene mu Numba ya Omwene, mwenemwa munowakelani na mada meeli.

Mabasa awa ba wakamiha athu ena omulaba Mulugu. Awene anela omusunza Bibilia na weyo vatakulu vawo, bagokamiha oziwa mukalelo wa omwebedha Yehova na mukalelo wonyaala. Weyo kunapitxele kobiri esene dhinfunani wukosela. Anamoona anoziveliwa osunziha ebaribari sabwani awene anowakwela athu vina anomukwela Yehova Mulugu.

Anamoona a Yehova anela wukamiha weyo omulaba Mulugu