Skip to content

Skip to secondary menu

Skip to table of contents

Anamoona a Yehova

Etxuwabo

Miselu Dhapama Dha Mulugu!

 NSUNZO 10

Ozinddiyele Dhavi Webedha Watxibarene?

Ozinddiyele Dhavi Webedha Watxibarene?

1. Oli mutugumano mmodha bahi watxibarene?

‘Txenjerhani na anamavuhulela attambi.’ —MATEU 7:15.

Yezu wasunzihile anamafara aye mutugumano mmodha bahi, mutugumano watxibarene. Obu oli ninga dila endowiha wigumini ya mukalakala. Yezu walogile dhahi: ‘Ang’onovi banfanya.’ (Mateu 7:14) Mulugu onrumeela webedha ondela mu Nzuni naye na ebaribari bahi. Anamebedha otene atxibarene bowiwanana mu nroromeloni nimodha.—Kengesa Joau 4:23, 24; 14:6; Éfeso 4:4, 5.

2. Yezu walogile eni mwaha wa Akristu ahili atxibarene?

‘Anologa vamentoni va attu wila awene anomuziwa Mulugu, oku bagamukoodda na merelo’—TITO 1:16.

Yezu wahibaza olaga wila anamavuhulela attambi agahiviriganiha Okristu. Otakuluwa ankala ninga anamebedha atxibarene. Miparha dhawa dhinologa wila Akristu. Mbwenye weyo onowodha wazinddiyela attu aba na ejile elani txibarene. Na mukalelo gani? Akristu atxibarene ambudduwa mwari mwa anamebedha atxibarene bahi, ba abene ana mikalelo na meeddelo akalile.—Kengesa Mateu 7:13-23.

3. Wazinddiyele dhavi anamebedha atxibarene?

Koona mitonyo esi mitanu dhintonya:

  • Anamebedha atxibarene anomuriha Bibilia ninga Nzu na Mulugu. Anokosela guru okalawo modheela magano a Bibilia. Noona mutugumano watxibarene onottiyana na obule ondela mwa dhubuwelo dha omuttu. (Mateu 15:7-9) Anamebedha atxibarene kankalela olaleyavi, anokosa esile dhinlaleyani.—Kengesa Joau 17:17; 2 Timóteo 3:16, 17.

  •   Anamafara atxibarene a Yezu anorhemeza nzina na Mulugu, Yehova. Yezu wahirhemeza nzina na Mulugu modheela ovuwiha. Wahakamiha attu omuziwa Mulugu nanda wahasunziha olobelaga wila nzina na Mulugu nikoddelihiwe. (Mateu 6:9) Wenewo onkala weyo, mutugumano gani onvuwiha nzina na Mulugu?—Kengesa Joau 17:26; Roma 10:13, 14.

  • Akristu atxibarene anolaleya Omwene wa Mulugu. Mulugu wahimuruma Yezu wila alaleye miselu dhapama dha Omwene. Omwene wa Mulugu tti njeedhelo nimodha bahi na nlogo na attu. Yezu wela olaleyavi Omwene obu mpaka siku nikwiliye. (Luka 4:43; 8:1; 23:42, 43) Wahiloga wila anamafara aye agahilaleya Omwene obu. Akala muttu onowufiyedha bagaloga dha Omwene wa Mulugu, muttu oddo txino ddwa mutugumano gani?—Kengesa Mateu 24:14.

  • Anamafara atxibarene a Yezu kankosa epaddi ya elabo ejino yotabala. Onowodha wazinddiyela sabwani kankosa epaddi ya politika obe magudulano a attu. (Joau 17:16; 18:36) Mowenjedha, kantagiha merelo na dhimanya dhabure dha elabo ejino, esene dhinvoreya.—Kengesa Tiago 4:4.

  • Akristu atxibarene anokwelana vopitta muttu na mukwaye. Mu Nzuni na Mulugu, anosunza oriha maziza otene. Masiki mitugumano dhihili dhatxibarene vankamihedhetxani vaddiddivene koddo dhinrabiwa na dhilabo, anamebedha atxibarene anokoodda okosa ejuwene. (Mikeya 4:1-3) Mbwenye anolabihedha kakamwe mudhidhi na mazanga awa wila aakamihena vina aalibihena attu akwawa.—Kengesa Joau 13:34, 35; 1 Joau 4:20.

4. Onowodha ozinddiyela mutugumano watxibarene?

Mutugumano gani ona masunziho otene andeela mu Nzuni na Mulugu? Mutugumano gani onrhemeza nzina na Mulugu? Mutugumano gani onlaleya Omwene wa Mulugu ninga njeedhelo na nlogo na attu? Nikuru gani na attu ninlagiha okwela banigakoodda oraba koddo? Onoonamo dhavi?—Kengesa 1 Joau 3:10-12.