Skip to content

Skip to secondary menu

Skip to table of contents

Anamoona a Yehova

Etxuwabo

Miselu Dhapama Dha Mulugu!

 NSUNZO 7

Omwene wa Mulugu Txini?

Omwene wa Mulugu Txini?

1. Omwene wa Mulugu Txini?

Txini enimukosiha Yezu okala Mwene wofanyeela?—MARKO 1:40-42.

Omwene wa Mulugu tti nlamulelo nili odhulu. Nlamulelo ntti ninele ohala vamburoni va malamulelo mena otene vina ninele okosiha ofuna wa Mulugu odhulu na vati. Johagalaliha yawila Mulugu onele olabihedha Omwene obu. Mohigoneela Omwene wa Mulugu onele okosa ofuna wa attu wa okaana nlamulelo naderetu. Omwene obu onele wawiwananiha otene ankala velaboni yavati.—Kengesa Daniyel 2:44; Mateu 6:9, 10; 24:14.

Omwene onofanyeela okaana mwene. Yehova omuttomile Mwana waye, Yezu Kristu wila akale Mwene wa Omwene Waye.—Kengesa Ovuhulela 11:15.

2. Yezu okaleli eni Mwene wofanyeela?

Mwana Mulugu ddi Mwene wofanyeela sabwani Yezu ddwa murima wa nzuzumelo vina wovaddela ejile eli yaderetu. (Joau 1:14) Ohikaana vina ewodhelo ya wakamihana attu sabwani onele olamulela elabo yavati ovenyedha odhulu. Mwamaleliye ovenyihiwa mu okwani, wahiwela odhulu bagajeedha wogilatene omononi woja wa Yehova. (Ahebreu 10:12, 13) Omagomowa, Mulugu bamugilatiha vampaddoni baroma olamulela.—Kengesa Daniyel 7:13, 14.

3. Onalamulele na Yezu bani?

Nikuru nintxemerhiwa ‘akoddeli’ anele olamulela na Yezu odhulu. (Daniyel 7:27) Akoddeli ooroma aasakuliwe, aali arumiwi oororomeleya a Yezu. Mpaka ovanene Yehova onowasakulavi alobwana na ayana anroromeleya ninga akoddeli. Ninga munkosela Yezu, awene anovenyihiwa mu  okwani na maningo a omuyani.—Kengesa Joau 14:1-3; 1 Korinto 15:42-44.

Attu angasi andowa odhulu? Yezu watxemerhi abene ‘nikuru ning’ono.’ (Luka 2:32) Aba anele wakwana muttengo wa 144.000. Anele olamulela elabo yavati vamodha na Yezu.—Kengesa Ovuhulela 14:1.

4. Txini yapadduwile Yezu mwaromeliye olamulela?

Omwene wa Mulugu oromile olamulela yaka ya 1914. * Yoroma yakosile Yezu ninga Mwene, onvokedha Satana na adomonyo aye velaboni yavati. Satana wahiludduwa baroma ototela makattamiho elabo yotene yavati. (Ovuhulela 12:7-10, 12) Ovenya venevale mpaka ovanene masoso a nlogo na attu anottabwavi. Koddo, dala, dhizini na ottekenyeya wa elabo, dhotene esi dhinokosa epaddi ya ‘ezinddiyelo’ entonyihedha wila ovanene Omwene onele osogorhela kakamwe dhilobo dha velaboni yavati.—Kengesa Luka 21:7, 10, 11, 31.

5. Omwene wa Mulugu onkosa eni?

Mabasa a olaleya ankosiwa elabo yotene, Omwene wa Mulugu onogumaniha muttitti munddimuwa wa attu a dhilabo dhotene. Matxikwi na matxikwi a akurumuwi anokala alamuleliwi a Yezu. Omwene wa Mulugu onele wabarela ogatolotxaga elabo ejino yotakala yavati. Noona otene abale anfuna opuramo Omwene wa Mulugu anofanyeela osunza okala alamuleliwi owiwelela a Yezu.—Kengesa Ovuhulela 7:9, 14, 16, 17.

Mwari mwa mudhidhi wa vyaka 1.000, Omwene onele okosa efunelo yoroma ya Mulugu na nlogo na attu. Elabo yotene yavati enele okala paraizu. Omagomelowa, Yezu onele omperhekela Babi waye Omwene. (1 Korinto 15:24-26) Onomuziwa muttu agaziveliwe weyo ompanga mwaha wa Omwene wa Mulugu?—Kengesa Masalmo 37:10, 11, 29.

 

^ par. 6 Koona makuku 217-220 a nivuru Txini Ennisunziha Bibilia? abene ansekeserha mukalelo wattagile nivuhulelo na Bibilia ologa mwaha wa yaka ya 1914.