Skip to content

Skip to secondary menu

Skip to table of contents

Anamoona a Yehova

Etxuwabo

Miselu Dhapama Dha Mulugu!

 NSUNZO 9

Murala Wawo Osanzaye Dhavi?

Murala Wawo Osanzaye Dhavi?

1. Matelo akaleli eni a makamaka wila murala osanzaye?

Miselu dhapama dhinda wa Yehova, Mulugu wosanzaya oddwene onfuna wila mirala dhisanzaye. (1 Timóteo 1:11) Iyene ohita matelo. Matelo oolebihiwa ba makamaka wila murala osanzaye sabwani anovaha mburo wokuluveleya wa wawunuwiha ana. Akristu anofanyeela oriha malamulo a elabo enkalani mwaha wa olebiha matelo.—Kengesa Luka 2:1, 4, 5.

Mulugu onoona dhavi matelo? Onfuna wila akale owiwanana wa mukalakala wa mulobwana na muyana. Yehova onfuna wila amamuni na awadhiwa aroromelanege. (Ahebreu 13:4) Iyene onokona omwalana. (Malakiya 2:16) Masiki dhaene, onorumeela Akristu omwalana batela obe bateliwa wili akala mulobwana obe muyana onoraruwa.—Kengesa Mateu 19:3-6, 9.

2. Mamuni na muteliwi anfanyeela weeddihana dhavi?

Yehova wapaddutxeli alobwana na ayana wila akamihedhanege vamateloni. (Wita 2:18) Mamuni ninga musorho wa murala, ddina mabasa a osapela murala waye vina osunziha dha Mulugu. Onofanyeela omukwela mwadhiye na mukalelo wa ovimana. Amamuni na ateliwi anofanyeela okwelana vina orihana. Vowi atelani attu ohakwana, jofuneya osunza olevelela sabwani tti nigano na osanzaya vamateloni.—Kengesa Éfeso 4:31, 32; 5:22-25, 33; 1 Pedro 3:7.

 3. Akala kamuna osanzaya munofanyeela ofudha mateloya?

Akala munokaana makattamiho vamateloni venyu, moheeli munofanyeela osunza weeddihana na okwela. (1 Korinto 13:4, 5) Nzu na Mulugu kaninaruma atelani wila attiyane obe avumelane ninga mukalelo wa ogomiha makattamiho ankaletxa vamateloni.—Kengesa 1 Korinto 7:10-13.

4. Nyuwo ana, Mulugu onfuna eni mwa nyuwo?

Yehova onfuna wila musanzaye. Iyene onowuvahani malago akaliletxe a mukalelo wa nyuwo ojavo deretu ozombwe wenyu. Onfuna wila mupuremo zelu ya ababi enyu vina musunze na awene. (Kolosi 3:20) Yehova vina onfuna wila mukaane ohagalala wa omukoselaga dhilobo Mpaddutxi wenyu vina Mwana waye.—Kengesa Kohelét 11:9–12:1; Mateu 19:13-15; 21:1516.

5. Nyuwo ababi, enfuneya txini wila ana enyu asanzaye?

Munofanyeela olaba na guru wila ana enyu akaane yoja, numba na dhabalo. (1 Timóteo 5:8) Mbwenye wila ana enyu asanzaye, munofanyeela vina wasunziha omukwela Mulugu vina osunza mwa iyene. (Éfeso 6:4) Yotagiha yenyu ya omukwela Mulugu enowodha ovolowa kakamwe mmirimani mwa ana enyu. Nsunziho nenyu nigadheelaga mu Nzuni na Mulugu, ninowodha osaddula mubuwelo wa aima enyu na mukalelo wapama.—Kengesa Olibiha 6:4-7; Gano 22:6.

Mugaalibihaga vina mugatamaalelaga ana anopuramo. Enofuneya vina wasaddeya vina walela. Nsunziho ntti notene ninowarabeliha mweeddelo ogatuwihile osanzaya. (Gano 22:15) Masiki vakalilani wofuneya, olelawa txipo kunfanyeela okala wa owali obe na otabala.—Kengesa Kolosi 3:21.

Anamoona a Yehova anoburutxa manivuru gwe anlebeliwa makamaka wakamiha ababi na ana. Manivuru aba andela Mbibiliani.—Kengesa Masalmo 19:7, 11.