Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 48

Mwana wa Mamukwela Onowiyelela Okalawo

Mwana wa Mamukwela Onowiyelela Okalawo

Valiwo yumwi, Yehova wahimpanga Eliya dhahi: ‘Dhowá o Sarefa. Mamukwela oli wenewo onele ouvaha yoja.’ Mfiyeliye vamusuwo wa sidadi, Eliya omona mamukwela bagaddodda kuni. Eliya omukumbirha manje. Muyana adhowelaga manjeya, Eliya omukuwela, omukumbirha: ‘Kaddidhelena vina yoja.’ Mamukwela omwakula: ‘Kaddina yoja yowuvaha weyo. Ottu ohalilemo na makura mang’onovi ddinfuna ddipiye wi nije miyo na mwanaga.’ Eliya omwakula: ‘Yehova olibela wi ogaddivaha yoja, ottu wawo na makuraya kadhinamale, mpaka vanarubwe muzogwe.’

N’eji, mamukwela odhowa vani-vaye, ompiyela namavuhulela wa Yehova. Epadduwa ninga yalogile Yehova, oja wa mamukwela kumalile mpaka varubwile muzogwe. Mukatte mwekiye ottu na lanta mwali makura dhakala dhodhala-dhene.

 Nomala, mamukwelaya opadduweliwa elobo yawunliha. Mwanaye ofwanyiwa eredda, okwa. Mpadduwele ejiya omunlela Eliya wi amukamihedhe. Eliya omuttukula mwanaya odhowana okwartu. Mfiyeliye, omugunantiha vakuguluni, olobela: ‘Ddinoukumbirhani, Yehova mvenyihení mwana oddu.’ Yehova agamukosilena dhavi mwanaya? Oromana mudhidhi wa wale kavo muttu wavenyilege múkwani. Nanda mamukwela na mwanaye kaali a nlogo na Izrayel.

Masiki dhawene, mwanaya oroma ovuma beyelela okalawo! Eliya omulagiha mamukwelaya: ‘Mmone! Mwanawo ohikalawo.’ Iyene waziveliwa-wene, bamwaddela Eliya: ‘Weyo oli muttu wa Mulugu-wene. Ddiziwile sabwa weyo onloga dhinuruma Mulugu bahi.’

“Mwawone anyakungu: Kanala, kansinanga, kanna nddara, vano Mulugu onowasapela. Nyuwo muli athima opitha balame.”—Luka 12:24