Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 38

Yehova Onomulibiha Sansau

Yehova Onomulibiha Sansau

Aizrayel enjene amusadduwele Yehova, n’eji Yehova owaperhekela mmadani mwa akadda Filistiya. Mbwenye ahikalawo eddavi na Yehova. Mwa aboya mmodhaya wedda na Yehova wali Manowá. Iyene na mwadhiye kana aima. Siku nimodha Yehova omurumela mwadhi Manowá angelo. Anjuya ompanga dhahi: ‘Weyo onele okana mwana. Ddi iyene onavune Aizrayel mmadani mwa akadda Filistiya. Iyene onokala munazireu.’ Weyo onowaziwa Anazireu? Ali emeleli avawoka a Yehova. Anazireu kattiyiwa ogwadda nttitti.

Mfiyedhi mudhidhiya, awene ahimbala mwana anvaha nzina na Sansau. Munuweliye Yehova omvaha guru. Sansau ompa poddogoma na mada. Siku niina Sansau ohapa yeka Afilistiya 30. Akadda Filistiya annimwidda mpaka omuzondda atamelaga mudhidhi wi ampe. Siku nimodha, Sansau ovenya odhowa ogona o Gaza, Afilistiya mwiwelani, adhowa orija numbaya, erelaga agabudduwa membesi ampe. Mattiyu-ene abale, Sansau ovenya, odhowa vamusuwo oddula musuwoya, olupa varhingani. Ovijela vetturini vaye musuwo, ofiyana omwangoni wa Hebron!

Mwadhawene, akadda Filistiya anfwanya mweddi wa Sansau, Dalila, alogana: ‘Oganaddela vandana Sansau guru dhaye, iyo ninowuvaha kobiri txikwi dha parata. Ninfuna nimmage nimunde gurudhaye.’ Vowi Dalila wanfuna kobiriya, warumela. Voroma Sansau kafunile omwaddela Dalila vadhiyena guru. Dalina ombebedha Sansau mpaka omwaddela vadhaniye guru. ‘Nttitti naga kaninasattiwaga vowi ddili Munazireu.’ Omwaddela: “Ddigegiwa mathithi aga, guru dhaga dhinoddithawa.” Yabure ekosile Sansau jologa elobo yanvaha guru.

Dalila ottamaga odhowa wapanga akadda Filistiya: “Ddabuno omala odditapulela murimaye.” Dalila omugunantiha Sansau vamyeddoni vaye, mpaka ogona, omukuwela muttu mmodha wi adhe  amwige. Apo Dalila okuwa: “Sansau wé Afilistiya anfuna outtidda!” Mvenyeli Sansau, guru dhotene dhimuttawa. Akadda Filistiya amuttidda, ahimburutxamo mento, anfugela mukambura.

Siku nimodha Afilistiya atugumana vamparhani va mulugu wawa Dagon akuwa: “Mulugu wehu oniwodhiha Sansau! Adhoweliwe Sansau nivegena.” Amodhoweliha. Mmalelani amuruma wimela vari-vari va matxikwa a numba mwalani, nanda aroma ombedda. Sansau omuloba Nabuya dhahi: “Eh Nabuya Mulugu ddivaheni guru ddabuno bahi.” Eliganina nttitti na Sansau banimelelimo. Iyene ogurumusula matxikwaya na guru dhotene. Murhingotti wotene omotta, ohapa attu alivo otene, otaganyiha na Sansauya.

“Ddinowodha dhetene na guru dha [ole] onddilibiha.”—Filipi 4:13