Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 33

Ruti na Nowemi

Ruti na Nowemi

Nsaka dhahi naliwo dala mw’Izrayel, muyana dhahi watxemerhiwa Nowemi ovenya omwalela o Mowab na mamunaye vina anawa eli. Musogorhomwa mamunayeya okwa. Anaye ahatela ayana mazina awa baba: Ruti na Orpa ali o’Mowab. Mudhidhi mung’onovi amamunawa vina akwa.

Nowemi vewaliye wi mw’Izrayel dala yahigoma, iyene wafuna eyelele owaniwe. Muleddonimwa, Ruti na Orpa ahinfwara, adhowagavi Nowemi oawaddela dhahi: ‘Nyuwo muli awenya aderetu. Ddinfuna wi muteliwe wili. Keyelelani o Mowab.’ Awenyaye amwakula: ‘Iyo ninowukwelani! Kaninfuna outtiyani.’ Nowemi odidelavi wi awene eyele. Omamalelowa, Orpa ohiyela, Ruti ohala. Muhaleliye Nowemi omwaddela: ‘Orpa onowiyelela owani-waye oli amulugu aye. Weyo vina kanfware.’ Ruti ompanga: ‘Kaddinauttiyeni. Nlogo nenyu ninokala naga, Mulugu wenyu onokala Mulugu waga vina.’ Nowemi wewilemo dhavi mwalogeli Ruti mazu aba?

Ruti na nyezele Nowemi afiya o Jeruzalemi nsaka n’osinanga. Ruti odhowa wurula mbuga wa mundduni mmunddani mwa mulobwana onkuweliwa Boaz, mwana Raabe. Iyene wahiziwa wila Ruti wali mukadda Mowab wedda na Nowemi. Noona, wahapanga anamalaba aye wi attiyege mbuga mundduni, werela Ruti asinangege.

 Mutxiguwonimwa, Nowemi onvuza Ruti: ‘Ddabuno olabile mmunddani mwani?’ Ruti omwakula: ‘Mmunddani mwa mulobwana onkuweliwa Boaz.’ Nowemi omwaddela: ‘Boaz mmudhi wa marafula mamunaga. Olabege mwenemo na anamwali eena. Mwenemo onobareleya.’

Ruti wanlabavi mmunddani mwa Boaz mpaka nsaka na osinanga ogoma. Boaz ohona wila Ruti wali muyana walaba na guru vina wokoddela. Masiku-ene abo, mulobwana agakwa ahiina mwana, wantameliwa mmudhaye bamutela mamukwelaya. N’eji Boaz omutela Ruti. Ambala mwana, anvaha nzina na Obed, musogorhomwa bakala bibi wa mwene David. Amarho a Nowemi asanzaya. Aloga dhahi: ‘Voroma Yehova ohuvaha Ruti, oukaleli muttu wapama, ovano ohubalela mudhulawo. Yehova attittimihiwe.’

‘Akalawo aliba wandana . . . anvolowelana opitta obali.’—Gano 18:24