Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 31

Josuwé na Akadda Gabaón

Josuwé na Akadda Gabaón

Muselu wa ogujuliwa wa Jerikó omwadheyela malogo otene ali mu Kana. Amwene otene agumanela odhowa owana na akadda Izrayel. Mbwenye akadda Gabaón aana yubuwelo yottiyana. Awene ahabala masala, adhowa onfwanya Josuwé; amukumbirha: ‘Ngani, iyo nimbudduwa wolapela-wene. Nihiwa dhotene dhuwireleni Yehova mw’Ijipitu vina na mittette dha Mowab. Nilibeleleni wi kamunanipe, nanda iyo ninele okala adhari enyu.’

Josuwé oharumelana, ohilibela wi kagapile. Mvirele malabo mararu, iyene ohizinddiyela wila aweneya akala vakuvi. Adhela elabo y’o Kana. Josuwé oavuza akadda Gabaón: ‘Muzivaleleni?’ Awene amwakula: ‘Iyo neela wova! Nihiziwa wila nyuwo munwana na guru dha Yehova Mulugu wenyu. Apa ninouttiddani myeddo, kamunipe.’ Josuwé ohittiddelavi dhalibeliye nanda kaapile.

Vahinavira malabo menjene, amwene atanu a akadda Kana ahatugumaniha anyakoddo awa wi arabe koddo na akadda Gabaón. Josuwé na anyakoddo aye mwiwelani, ahedda omattiyu wantero  wi aavune akadda Gabaón. Membesene ahiroma owana koddo. Akadda Kana ahiroma ottawela dhipaddi dhotene. Wego-ku-wego wattawelani, Yehova wela watwana malugu. Nomala Josuwé omuloba Yehova wi emetxe nzuwa. Iyene wamulobeleni Yehova wi akose elobo ehinereyaga? Eji yalagiha wi Josuwé wannimukuluvela Yehova. Mwebaribari, nzuwa nahimela siku nantero, mpaka aIzrayel watolotxa amwene na anyakoddoya otene a akadda Kana.

“Ologa wenyu okalege ‘ndde’, akala pumwenemo; okalege ‘nne’, akala munokodda. Dhina dhinenjedhedhinyu, dhindha wa muya wabure.”—Mateu 5:37