Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 32

Musogorheli Muswa na Ayana Eli Oliba Murima

Musogorheli Muswa na Ayana Eli Oliba Murima

Josuwé okwile bana vyaka 110 mmaleliye wasogorhela ana Izrayel. Mudhidhene obo okalilewo iyene, ana Izrayel amwebedha Yehova. Mukweli Josuwé, nlogo na Izrayel nihiroma wawebedha amulugu osemiwa ninga akadda Kana. Sabwa yawi ana Izrayel attiya wedda na Mulugu, Muluguya wahirumela wi mwene wa akadda Kana wakuweliwa Jabin atabutxe. Moonelani dhawene ana Izrayel amuloba Yehova. Nomala iyene ohavaha musogorheli muswa, Barak. Ddi iyene agakamihedhi nlogo wi nimwiyelele Yehova.

Debora, namavuhulela wa muyana, omurumela Barak muselu. Museluya wadhilena wa Yehova, waloga dhahi: ‘Kaattukule attu 10.000, wagumane na anyakoddo a Jabin omuretteni wa Kison. Wenewo onele ompemberha Sizera, munddimuwa wa munyakoddo wa Jabin’. Barak omwaddela Debora: ‘Ddinadhowe akala weyo vina onoddifwara.’ Debora ompanga: ‘Miyo vina ddinele odhowa na weyo. Ottiya ejo, kaziwa wi onampe Sizeraya kanakale weyo. Yehova ologile wi onfuna ompa muyana.’

Debora wahinfwara Barak na anyakoddo awa, nanda ahimela va Mwangoni Tabor wi avisasanyedhele owana. Mwiwile Sizera muselu  obu, ohatugumaniha anyakoddo aye, karo dha koddo, odhowa wimela mmuwuloni, mutxiddo mwa mwangoya. Debora omwaddela Barak: ‘Ddabuno tti siku ninovahe Yehova mperhe.’ Barak na attu aye 10.000 atita wi agumane na anyakoddo ovadda a Sizera.

Mmalelani, Nabuya otatamula muneri nikome na Kison. Myuva dha anyakoddo a Sizera dhiroma orobela mmiroveni. Sizeraya moneliye, olupa mmuvani mwaye ottamaga. Barak na anyakoddo aye ahatolotxa anyakoddo a Sizera, oku Sizera battawile. Iyene ottawa, odhowa ovitala mba mwa muyana wakuweliwa Jael. Jael omvaha mukaka wi amwe nomala omukunela. Vowi Sizera wahilema, ogonavo. Venevo, Jael omukomela nyavanga vamusorho. Iyene okwa.

Barak odhowa omutamela Sizera. Jael ohimela otakulu wa musasa waye, omukuwela Barak: ‘Kaviluwani okuno. Ddinfuna ddulagiheni muttu onimutamela nyuwo.’ Barak ovolowa, omoona Sizera wokwene. Barak na Debora atomola jibo yomwibelana Yehova sabwa ya wavaha mperhe ana Izrayel. Aizrayel avolowa mmurenddeleni mwa vyaka 40.

“Ayana anvuwiha miselu dhapama, ali ninga anyakoddo oliba.”—Masalmo 68:11, Tradução do Novo Mundo