Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 26

Anamareza Kumi na Eeli

Anamareza Kumi na Eeli

Ana Izrayel ahittiya Mwango Sinai, avira mwiddeddereni ya Para wi afiye o Kades. Wenewo Yehova ohimpanga Mizé dhahi: ‘Kasakule alobwana 12 a maziza otene wi adhowe areze o Kana elabo enfunemi ouvahani.’ N’eji Mizé oasakula alobwana 12 ohapanga: ‘Dhowaní o Kana mone akala elaboya ehikaana dhoja. Muzinddiyele akala attuyamo boliba obe bawobana, akala ankala mmisasani obe musidadi.’ Anamareza 12, adhowa o Kana, mwa aboya ahikalamo Kalebe na Josuwé.

Mvireli malabo 40 anamarezaya ahiyela, ahidhana figo misawa na uva. Anamarezaya afiyana mpanganyo obu: ‘Elaboya ekalilevi yaderetu, attuyamo bovadda vina sidadidha dhihikana marhinga.’ Kalebe ohakula: ‘Ninele wapemberha. Ndoweni ovanene.’ Weyo onoziwa yalogela Kalebe dhawene? Iyene na Josuwé amororomela Yehova. Anamareza ena kumi alogile dhahi: ‘Nne! Attuyamo attabwa oliba, ali ninga mikango. Mwafiyedhelihu awene anona ninga mabalaga.’

Aizrayel aahikumuwa. Ahiroma ologa dhahi muttu na mukwaye: ‘Alobwanani, ndoweni nimusakule musogorheli mwina, niiyelele w’Ijipitu. Apa ninfunelani odhowa opiwa?’ Josuwé na Kalebe ahakula:  ‘Kaninvanye Yehova, vina kanijeriheye. Yehova onele onibarela.’ Eji ana Izrayel keweleli. Awene atamela ompa Josuwé na Kalebe!

Yehova agahikosa elobo? Iyene ohimpanga Mizé: ‘Na dhetedhene esi dhawirelimi aIzrayel, mpaka ovanene aweneya kanfunavi oddiwelela. Bahito anele omala vyaka 40 bali mwiddeddereni vina anele okwela mwenemwa. Anawa vina Josuwé, na Kalebe, banafiye mwilabonimwa enfunemi wavaha.’

“Munovela nni, nyuwo athu oyeva nroromelo?”—Mateu 8:26