Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 18

Nikupu Ninttidda motto

Nikupu Ninttidda motto

Vahivira vyaka 40 Mizé bali o Midiyan. Wenewo ohitelawo owabala aima. Siku nimodha bagasapiha mabila nikome na Mwango Sinai, ohona elobo yawumiha milomo. Nikupu nela ottidda, s’ozwa! Mizé mwaddameliye wi one, ohiwa lizu nadhela munikupuni nilogaga: “We Mizé! Kuddisusele. Kárula sandalia dhawo; apa valiwe, oli mburo ovisakulele Mulugu.” Munikupuni mpu walimo ddi mungelo wa Yehova, baloga dhamurumile Nabuya.

Sabwa ya wova waniye, Mizé ohikunela omentoni waye. Lizuna nihidhowavi: “Miyo ddihona opujiwa wa nlogo naga [Izrayel].” ‘Nona ddivenya ddidhela wawaka mmadani mwa akadda Ejipitu, ddabuddutxele mwilaboni yaderetu. Apa ddiusakula wi weyo okale namavunaya.’ Mizé watikina vaddiddi!

Mizé ohivuza: ‘Nabuya, ki attuya agaddivuza wi oddirumile bani?’ Mulugu omwakula: ‘Wawaddele wi Yehova, Mulugu wa Abramu, Mulugu wa Izaki, vina Mulugu wa Jakob ddurumile.’ Mizé ovuzavi: ‘Koddi agakodda oddivuruwana ddikose dhavi?’ Yehova ohinvaha Mizé ezinddiyelo yoniha wila iyene agahimukamihedha. Iyene omwaddela Mizé wi avokele mukongozo waye vati. Mukoseliye, mukongozoya osadduwa bukala nowa! Mizé muttiddeliye omwilani wa nowaya, esadduwa jikala mukongoso wili. Yehova omwaddela: ‘Ogakosa matikiniho aba, awene anele wona wi wurumile ddi miyo.’

Mizé odhowanavi: ‘Nabuya, miyo kaddinziwetxa ologa.’ Yehova omuroromeliha: ‘Ddinouwaddela enfuniwe ologa ogafiya, vina mbalawo Aroni onodhowa na weyo.’ Muziweliye wi Yehova wali na iyene, Mizé omwalela wʼEjiptu na muralaye wotene.

“Mugaperhekiwa mmadani mwawa muhiribele murima enfuna nyuwo wakula, vina mwakuleloyá, vowi mudhidhene obo Mulugu onouvahani yowakula.”—Mateu 10:19