Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 16

Job Wali Ani?

Job Wali Ani?

Elabo ya Uz wahikala mulobwana wamwebedha Yehova. Nzina naye wali Job. Iyene wali muttu worela vaddiddi vina wahikaana murala munddimuwa. Iyene wahikaana oderetu, wanakamihedha ayelegi, amamukwela, vina ana apawi. Koddi vowila wankosa dhetene dhaderetu kuloga wila kagafwanyiwe masoso?

Job kaziwa ejuwene, mbwenye Satana Ddiabo wannimwang’ana vaddiddi. Yehova onvuza Satana dhahi: ‘Ohimoona mwimeleli waga Job? Mwilaboni mwetemwene kamo muttu woligana na iyene. Ddwaderetu vina onovuruwana dhinlogimi.’ Satana ohakula: ‘Pumwenemo, Job onowiwelelani-wene. Nyuwo munombarela, munomureliha. Muhinvaha dhinama na vilabo dhapama. Mugamwaka dhetedhenedha, onottiya ouwebedhani.’ Yehova omwakula: ‘Karoma omweha dhawene ninga mulogeliwe. Mbwenye kumpe.’ Yehova omuttiyeleni Satana wi amwehe Job? Sabwa iyene wahiziwa wila Job wali wororomeleya.

Satana ohiroma omweha Job na mapadduwo awinjiva. Voroma, Satama oharuma attu akuweliwa Asabeu wi eye mabila a Job. Vanawili, mabila otene a Job ahizwa na motto. Attu eena akuweliwa Akaldeya ahiya kamelo dha Job. Anamalaba ang’anela dhinamadha ahipiwa. Musogorhomwa Job ohaddeliwa mpaganyo wabure. Anaye kumi amotteliwa numba otene ahikwa. Dhotene eso dhannimpa mmirimani, masiki dhawene kattiyile omwebedha Yehova.

Satana wafuna wila Job atabuwevi nona, iyene  ohimugwihedha eredda yopa vaddiddi. Job kaziwa yapadduwela dhetedhene esi. Job wela omulabavi Yehova. Yehova wahona dhetene esi, nanda waziveliwa sabwani Job kamunyanyali.

Nomala Satana oharuma alobwana araru wi amwehe Job. Aboya amwaddela Job: ‘Weyo ohinvitela Mulugu dhottega dhawo. Oddu onutabutxa ddi Mulugu.’ Job ohawaddela: ‘Miyo kaddimwireli Mulugu elobo yabure.’ Iyene wobuwela ninga wali Yehova watota masosoya nona wahiloga wila Mulugu wanziwa dhetene.

Muzombwe dhahi wakuweliwa Eliyú wela ovuruwana makaniya. Mmaleliye ohawakula dhahi: ‘Nyuwo mwetene dhilogilenyu sabure. Yehova ddi munddimuwa. Iyene kanira-wene yabure. Iyene onowona dhetene vina onofuna wakamihedha anfwanyiwa masoso.’

Nomala Yehova ologa na Job. Omvuza dhahi: ‘Weyo wali wuvi miyo baddigasasanya elabo na erimu? Onlogela ni wi miyo kaddinoonawo? Weyo kunziwa dhinlogiwe, vina kunziwa empadduwela masoso ninga aba.’ Job mooneliye wila ohivonya, ologa dhahi: ‘Ddihivonya. Ddinowiwaga attu bagaulogani, apa ovano ddiuziwani. Kayivo elobo enuyimani. Ddileveleleni dhilogilemi kadhikalile.’

Mvirele masoso, Yehova omwiyihedha Job dhetedhene dhaniye, onvaha egumi yapama bamwenjedhedha dhaniye. Job okalawo vyaka dhinjene. Yehova omureliha Job sabwa ya onvuruwana mwa dhetene. Weyo onele omutagiha Job, bugavilela masiki ogafwanyiwa masoso masosovi?

“Nyuwo muhiwa ologiwaga ovilela onddimuwa wa Job, muhiwa edhile omuthuva Nabuya.”—Tiago 5:11