Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 101

Paulo Onottukuleliwa o Roma

Paulo Onottukuleliwa o Roma

Oleddo wanoraru wa olaleya wa Paulo ogomile o Jeruzalemi. Wenewo ottiddiwa ofugeliwa mukambura. Murohani Yezu ohimwaddela dhahi: ‘Weyo onele ottukuleliwa o Roma walaleye wenewo.’ Paulo ohittukuliwa ovenya o Jeruzalemi badhowiwana o Sesareya, ohimala vyaka bili bali mukambura. Adhowiwagana omuttegoni wa Guvernadoro Festo, Paulo ohiloga dhahi: ‘Muddittiye wi Sézar addittonge o Roma.’ Festo omwakula: “Bahito, weyo ofunilé othongiwa na Sézari, onere odhowawo.” Amwika Paulo mpaporoni adhowana o Roma, Akristu eli, Luka na Aristarku ahimvelela.

Vari vanyaza àfwanyiwa pevo enddimuwa. Attu otene ali mpaporonimwa obuwela wi anele okwa. Apo Paulo ohawaddela: ‘Alobwanani, miyo ddimuroha mungelo oddaddeli wi: “Paulo onove. Weyo onofiya o Roma, nanda athu otene ali na weyo mbarkuni anele ovuluwa.” Nona abali munove! Iyo kaninakwe.’

Pevoya ehimala malabo 14 yobagavi. Vadhidho paromilani wona suwa. Yali suwa y’o Malta. Barku mfwanyeliye mattaka otweya, onyenyeya, nanda otene 276 ali na Paulo avuluwa. Eena ela ohabelela oku enaya attiddela paddaso dha paporoya bagamberhuwa ofiyedha va gombe. Attu o’Malta ahaddoddela kuni bagasela motto wi attu otene otte.

Mvireli vyaka ttaru, anyakoddo amuttukula Paulo adhowana o Roma. Mfiyeliye o Roma, abali a wenewo ahidha wi amone. Paulo mwawoneliye abaliya, ohimutamalela Yehova, ohiliba murima. Masiki dhawene Paulo walivi munyaperhezu, iyene wakala mu numbani yowalugar oku ang’aneliwaga na munyakoddo. Okalamo vyaka bili. Attu agadha omoona iyene wannalaleya asunzihaga mwaha wa Yezu. Paulo vina ohileba makarta ovahedha milogo dhali o Ásia Mung’ono vina o Judeya. Ebaribari jawila Yehova wahimulabihedha Paulo wi alaleye miselu dhapama malogo menjene.

“Mwetemwene ninotamela weddanamo ekalelo ya anamalaba a Mulugu, nivilelaga na ntidi ninddimuwa matabuwo, dhojombeliwa, segedho.”—2 Korinto 6:4