Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 78

Yezu Onolaleya Muttaka wa Omwene

Yezu Onolaleya Muttaka wa Omwene

Yezu mumaleliye obatiziwa, oroma olaleya dhahi: ‘Omwene wa Mulugu oli vakuvi.’ Anamafwara aye andowa na iyene mmittetteni dha Judeya na Galileya. Yezu mwiyeleliye o Nazareti, ovolowa musinagoga, ofugula rolu ya Izaiya ohengesa na nzu nokuwa eraga: ‘Yehova oddivaha muya waye wokoddela, wi ddiwodhe olaleya muttaka wapama.’ Mazuya aba atapulela eni? Atapulela wila masiki attu vamoonani Yezu bagakosa matikiniho, iyene wadhele olaleya muttaka wapama. Noona wahapanga attu anvuruwana dhahi: ‘Ddabuno mazu a nivuhulo ntti ahakwanihedheya.’

Nomala Yezu odhowa ottaddani na Galileya, ohafwanya anamasunza aye ali anamattadda. Oawoba eraga: ‘Muddifware, vowi miyo ddinere owirani anamattadda a attu.’ Alivoya baba: Pedro, André, Tiago na Joau. Momaguva-mwene attiya milaba dhawa, anfwara Yezu. Adhowaga mirudda dha o Galileya, anlaleya Omwene wa Mulugu. Anlaleya musinagoga, mmamisika, vina mudila. Muttitti wa attu wannafwara wego-ku-wego wadhowani. Miselu dhaloga dha Yezu dhahimwadheyela wuddayi-wene ofiyedha o Síria.

Mudhidhi wakakene Yezu wahavaha anamafwara aye guru yowavulumutxana attu, vina dhowakopolana adomonyo. Mweddiye mwetene bagalaleya, anamafwara otene andowa na iyene. Wahikala vina ayana anfwara Yezu, mazina awa baba: Maria Madalena, Joana, Suzana na ena, amukosela mabasa Yezu na anamafwara aye.

Yezu vamaliliye watxenjerhiha anamafwara aye, oharuma wi alaleye. Vamweddilani Galileya wote attu enjene akala anamafwara vina abatiziwa. Attu enjene anfuna okala anamafwara, noona Yezu wahaladdaniha na mundda wafuna osinangiwa. Iyene wahiloga: ‘Mmulobe Yehova wi arume anamalaba eena aukamihedheni osinangawá.’ Musogorhomwa wahasakula anamafwara 70 waruma  eli-eli wi alaleye dhipaddi dhotene. Awene ahasunziha Omwene wa Mulugu attu a maziza otene. Mwiyeleli anamasunzaya, n’ottaba ahimpanga Yezu dhapadduwile. Ddiabo kawodhile wakoddiha olaleya.

Yezu waharoromeliha anamafwara aye wila masiki iyene ageyelela odhulu, mabasa a olaleya anodhowavi. Ohapanga dhahi: ‘Laleyani muttaka wapama elabo yotene. Mwasunzihe attu mazu a Mulugu, mwabatize.’

“Enofuneya wi ddilaleye muthaka wapama mirudda mina, vowi jijene erumeliwemi.”—Luka 4:43