Skip to content

Skip to table of contents

Anamoona a Yehova

Select language Etxuwabo

 NSUNZO 68

Elizabeti Okana Mwana

Elizabeti Okana Mwana

Sivirile vyaka 400 dhovenyihedhiwa ngome, namakutta dhahi wakuweliwa Zakariya na mwadhiye Elizabeti, adhowa okala nikome na muttette w’o Jeruzalemi. Mmateloni awa kaana mwana. Labo dhahi naperheka Zakariya mukutto mumparhani, anju Gabrieli wahinfiyedha. Zakariya wattiddiwa wova anju Gabrieli ologane: ‘Nyuwo Zakariya, kamove vowi ddudhelanina muselu wa Yehova. Mwadhinyu Elizabeti onombala mwana, mwanaya mumvahe nzina na Joau. Yehova ddimusakulile Joau wi attidde mabasa avawoka.’ Zakariya omvuza: “Ddinaroromele dhavi esodhá? Miyo na mwadhaga nimala wuluvala.” Anju omwakula: ‘Oddirumilena miselu esi ddi Mulugu. Vawi kamuroromeli mazu aga, oromana ddabuno kamunaloge mpaka vanabaliwe mwanayá.’

Zakariya wagonela vaddiddi omburoni wokoddela-koddela. Mbudduweliye, attu amujedha anfuna oziwelamo yapadduwa. Zakariya kawodha ologa. Iyene waloga na mada. Venevo attuyá anonelamo wila Zakariya wahittambirha muselu wa Mulugu.

Movira wa mudhidhi, Elizabeti wahikaana yari banbala mwana wa mulobwana, ninga mwalogeli anju. Amarho aye vina amudhaye ahidha omoona mwanaya. Awene aziveliwa venjene. Elizabeti bawaddela wila mwanayá ‘nzina naye ddi Joau.’ Amudhaye amwakula eraga: ‘Kavo mmudhawo onkuweliwa Joau. Kamuttiye akale Zakariya, ahalena nzina na babe.’ Nomala Zakariya oleba dhahi: ‘Nzina naye ddi Joau.’ Ovenyana venevo, Zakariya oroma ologa! Elabo yotene ya Judeya mufiya muselu mwaha wa mwanayá, attu aroma otikina. ‘Mwanaya oddo agonuwa onfuna okala nni?’

Zakariya oroma odhaleliwa muya wokoddela. Iyene olibela: ‘Nzina na Yehova nttittimihiwe.’ Iyene wahimuroromeliha mwimeleli waye Abaramu wila  agahimuruma mvuni, Mesiya wi adhe anivune. Nona, Joau ddinakale namavuhulela onsasanyedha ddila ya Mesiyayá.

Elobo yina yavawoka yahinpadduwela mmudhi wa Elizabeti, wakuweliwa Maria. Kapitulu endawo ninele osunza ejoya.

“Eji txibarene athu kanwodha-wene; Mulugu bahi ddihinrutxiwa elo.”—Mateu 19:26