Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 59

Azombwe Anai Amwiwelela Yehova

Azombwe Anai Amwiwelela Yehova

Nabukodonosor mwattukuleliye attu a nlogo na Judá, adhowana o Babilónia, ohapanga anyakoddo aye wi amudhelena azombwe ahiragalile vego, odhala ttotto. Azombweyá abo afuniwana wi asunzihiwe vyaka ttaru. Awene afuna asunzihiwe wi akale anddimuwa a rhuwani o Babilónia. Nabukodonosor omuruma Asfenáz, munddimuwa wa emeleli a orhuwani wi awang’anelege. Aweneyá asunzihiwè elogelo na mulebelo wa akadda Kaldeya. Attomeliwa ovahiwa oja wakakene na mwene. Enaya mwa aba ali Daniyel, Ananiya, Mizayel na Azariya. Asfenáz ohavaha mazina oʼBabilónia, Baltazar, Sídrak, Mizak na Abdenago. Masunzoya aba afunani ovahiwa, agahattiyiha omulaba Yehova?

 Azombwe aba anai, ahimelelavi omwiwelela Yehova. Awene ahiziwa wi kiyali yaderetu oja na mwene sabwani Nlamulo na Yehova nankoddiha oja dhilobo dhokwaruliha. Nona, amwaddela Asfenáz dhahi: ‘Munanivahege dhoja dhinja mwene.’ Asfenás ohawaddela: ‘Mugakodda oja, nanda mwene owonani mbulelaga, iyene onoddipa.’

Venevo Daniyel ohubuwela elobo. Iyene ohawaddela ang’aneli dhahi: ‘Ngafuna munivahege mukwani na manje mwa malabo kumi. Mugamala munittiye vari va azombwe ena anja dhoja dha mwene.’ Ang’aneliya arumela.

Mvireli malabo kumi, Daniyel na akwaye araru, ahifwanyiwana egumi opitta azombwe ena. Yehova wahagalala sabwa awene amwiwelela. Iyene ohinvaha Daniyel mirugu wi anonelegemo maroho.

Mmalelani oshagihiwa, Asfenáz ohattukulela azombweya vamentoni va Nabukodonosor. Mwene ologana, nanda ohona wila Daniyel, Ananiya, Mizayel na Azariya akana eziwelo na mirugu opitta azombwe ena. Iyene ohattukula abaya onai ohadhowana olaba orhuwani waye. Mwene agakana yomukattamiha wavuza awene. Yehova wahavaha eziwelo enddimuwa opitta aziwetxi otene a mwene vina akumbaisaya.

Masiki valani elabo yoweddela, Daniyel, Ananiya, Mizayel na Azariya, kattiyile omwebedha Yehova. Koddi weyo ogakala wolapela na amambali awo onele okosa enfuna Yehova?

“Ahikálewo onupwazela okala muzombwe. Vano wakalele akristu tagiha na mulogelo wawo, na mweddelo, na mukwelelo, na muroromelelo na winanela wawo.”—1 Timóteo 4:12