Skip to content

Skip to secondary menu

Skip to table of contents

Anamoona a Yehova

Etxuwabo

Masunzo a mapadduwo a Mbibiliani

 NSUNZO 1

Mulugu Opaddutxa Elabo Yodhulu na ya Vati

Mulugu Opaddutxa Elabo Yodhulu na ya Vati

Yehova Mulugu ddi muttanddi wehu. Ddi iyene opaddutxile dhetene, dhowoneya na dhohooneya. Ahinatti opaddutxa dhilobo dhinonihu, oromile wapaddutxa angelo matxikwi na matxikwi. Weyo onowaziwa angelo? Angelo attu asasanyile Mulugu anligana na iyene. Iyo kaninawona ninga munkoddelihu omoona Mulugu. Mungelo woroma opaddutxiwa ohidha okala mukamihedhi wa Mulugu. Odduya ohimukamihedha Mulugu osasanya neneri, dhilabo, na dhilobo dhotene dhiliwo. Dhilabodha eso dhisasanyiwe, yinaya ji elabo eji ya vati.

Mwilabonimwa Yehova ohikamo dhinama na attu. Ohikosiha wi nzuwa nobelege elabo ya vati. Osasanya myango, bara na minje.

Nomala txini epadduwile? Yehova ologa: ‘Ddinfuna ddisasanye miri, mani na dhomela dhina.’ Mulogeliye dhawene, dhiroma orukudha milima, mikwani na marhuwa. Mmalelani Yehova opaddutxa dhinama—dhovava, dhohabelela, dhonyongottowa vina dhoburunuwa. Opaddutxa dhinama dhing’ono ninga matxilu obe namarogolo, dhina dhinddimuwa ninga ttebo. Weyo onsililetxa enama gani?

N’ejo Yehova omwaddela mungelo woroma: Ndowe “Nimpaddutxe muthu.” Attu ahittiyana na dhinama. Sabwa attu anowodha osasanya  dhilobo. Awene anologa, anoteya, vina anolobela. Attu anowang’anela elabo na dhinamadha. Weyo onomuziwa mulobwana woroma? Ndowe none epaddi endawo.

“Omaromelo Mulugu opaddutxa elabo y’odhulu na ya vati.”—Wita 1:1