Skip to content

Skip to secondary menu

Skip to table of contents

Anamoona a Yehova

Etxuwabo

Txini Ennisunziha Bibilia?

 KAPITULU KUMI NA TANU NA MODHA

Kasakula Omwebedha Mulugu

Kasakula Omwebedha Mulugu

1, 2. Mavuzo gani anfanyelihu ovikosa, nanda ekalelini yamakamaka?

MODHEELA masunzo awo a Bibilia, ohisunza wi attu enji anologa wi anomwebedha Mulugu, oku asunzihaga obe akosaga dhilobo dhinidda Muluguya. (2 Korinto 6:17) Noona, Yehova ononiruma wila nibudduwe mu relijiau yonyengetta, “Babilónia Munddimuwa.” (Ovuhulela 18:2, 4) Ninakose eni? Muttu muttu wa iyo ohikana yosakula, vina ninofanyela ovivuza nanyene, ‘Ddinofuna omwebedha Mulugu ninga munddifunelana iyene, obe ddinfuna ddimwebedhe na mukalelo onfunemi?’

2 Akala weyo ohimala orabela obe okodda relijiau yonyegetta, ohikosa deretu. Txino mwarimwari muttu podi ohalana mmirimani dhilemelelo dha relijiau yonyegetta. Ndoweni nitanalele merelo na meddelo vina noone ekalelani yamakamaka okaana moonelo wa Yehova mwa makaniya aba.

WEBEDHA DHIGAMUTTU NA AZAMANI

3. (a) Attu eena anrutxeliwani ottiya olabihedha dhosemiwa muwebedhani mwawa? (b) Bibilia onsunziha eni mwa olabihedha dhosemiwa nigamwebedhaga Mulugu?

3 Mwari mwa vyaka, attu eena anolabihedhaga dhigamuttu dhosemiwa obe mwigimanyo mmatakulu mwawa agamulabaga Mulugu. Akala ejo enopadduwa  na weyo, txino onowoona ninga jorutxa omwebedha Mulugu ohilabihedhaga esuwene. Mbwenye kobuwela, Yehova ononisunziha mukalelo waderetu w’omwebedha. Vina Bibilia ononaddela wila Yehova kanfuna wi nilabihedhe dhigamuttu dhosemiwa mu webedhani mwehu.—Kengesa Obudduwa 20:4, 5; Masalmo 115:4-8; Izaiya 42:8; 1 Joau 5:21.

4. (a) Sabwaya jani kaninawebedha azamani? (b) Yehova wakoddihele eni nlogo naye otamela ologa na amarafula?

4 Attu eena anononga mudhidhi mwinji na guru avedaga wahagalaliha azamani. Anofiyedha wawebedha. Mbwenye nihisunza wi abale akwile kannikamihedha obe kannitabutxa. Awene kankala wego-wina na mukalelo mwina. Noona, jowopiha oveda ologa na awene sabwani dhotene dhinkala ninga dhindela wa abale akwile dhinda wa adomonyo. Yehova wahiloga na ana Izrayel wi ahivede ologa na amarafula obe ahikose mabasa a adomonyo.—Olibiha 18:10-12; koona Yowenjedha 26 vina 31.

5. Txini enawukamihedhe ottiya olabihedha dhosemiwa obe azamani ogamwebedhaga Mulugu?

5 Txini enawukamihedhe ottiya olabihedha dhosemiwa obe azamani ogamwebedhaga Mulugu? Onofanyela omwengesa Bibilia, vina otanalelaga nofwaseya mukalelo onoona Yehova dhilobodha eso. Iyene onoona ninga ‘dhonyakuwa,’ obe dhotakala. (Olibiha 27:15) Olobele wa Yehova malabo otene wila awukamihedhe wona dhilobo ninga munoona iyene vina omulabe ninga munfuneliye. (Izaiya 55:9) Okaane ebaribari wi Yehova onele wuvaha guru dhinfuniwe wila onyanyale mebedho onyengetta.

 NINOFANYELA OJA MATTANGA A NATALI?

6. Siku 25 na Dezembro nisakuleliwe eni ninga siku nibaliwe Yezu?

6 Natali mattanga anziweya vaddiddi mwilaboni, nanda attu enji anubuwela ninga siku nibaliwe Yezu. Mbwenye Natali ontaganyiheya na mebedho onyengetta. Encyclopedia dhahi ninologa wi amalabo o’Roma annubuwela mattanga a labo 25 na Dezembro ninga siku na obaliwa wa nzuwa. Asogorheli a relijiau afuna wi amalaboya akale Akristu, masiki Yezu vahibaliwiye labo 25 na Dezembro, awene ahigana oja mattanga obaliwa wa Yezu. (Luka 2:8-12) Anamafara a Yezu kaaja mattanga a Natali. Nivuru dhahi ninologa wi muvireli vyaka 200 dha obaliwa wa Yezu, “kawali muttu waziwile txibarene siku nabaliwiye, nanda attu ang’onovi bahi bafuna oziwa siku nabaliwiye.” (Sacred Origins of Profound Things) Mattanga a Natali aromile vyaka mazana mang’onovi mubaleliwe Yezu.

7. Sabwaya jani Akristu ebaribari kanja mattanga a Natali?

7 Attu enjene ahiziwa maromo a Natali na yeddeloya ya ovaha sagwati, wi mattanga a amalabo. Motagiha, o Inglatera na elabo ya Amerika, wahikala mudhidhi wakoddihiwa oja mattanga a Natali sabwa ya okala elemelelo ya amalabo. Muttu-muttuvi waja mattangaya wansottottiwa. Mbwenye ovano ahiyelela oja mattangaya. Sabwaya jani Akristu ebaribari kanja mattanga a Natali? Sabwa jawi awene anfuna amwagalalihe Mulugu na dhotene dhinkosani.

NINOFANYELA WUBUWELA SIKU NOBALIWA?

8, 9. Sabwaya jani Akristu ooroma kaja mattanga a siku nobaliwa?

8 Mattanga meena anziweya na attu enji, siku nobaliwa. Akristu anofanyela wubuwela siku nobaliwa? Mattanga obaliwa anlogiwa mBibiliani akosiwe na  attu ahamwebedha Yehova. (Wita 40:20; Marko 6:21) Mattanga a siku nobaliwa akoseliwa wi attittimihiwena amilugu onyengetta. Ji sabwaya yoona Akristu ooroma “oja mattanga obaliwa wa muttu-muttuvi ninga dhilemelelo dha amalabo.”—The World Book Encyclopedia.

9 Azamani a akadda Roma na Agrego anrumeela wi muttu agabaliwa onokana muya oninbarela mwigumini mwaye. Nivuru The Lore of Birthdays, ninologa: “Muya obu wahikana singaningo na muttu wabaliwa va siku nabaliwa muttuya oddu.”

10. Sabwaya jani Akristu kanja mattanga a labo nobaliwa?

10 Weyo onoona ninga wi Yehova onorumeela mattanga aniwanana na relijiau yonyengetta? (Izaiya 65:11, 12) Nne, iyene kanrumeela. Noona iyo kaninja mattanga a labo nobaliwa na maferiado meena sabwani aniwanana na relijiau dhonyengetta.

NINOFANYELA OZUZUMELA-WENE?

11. Attu eena anjela eni mattanga a maferiado? Txini enfanyeliwe okosa?

11 Attu eena anodidelavi oja maferiyado na Natali, masiki aziwaga wi yeddelo yabure. Awene anubuwela wi maferiyado mudhidhi waderetu onanina wi akale na amudhi awa. Weyo vina onubuwela dhawene? Kili yabure ononga mudhidhi wi okale na amudhi awo. Yehova namattandda murala, onfuna wi nikaane mandano aderetu. (Éfeso 3:14, 15) Mwadhawene, ninofanyela okaana mandano apama na Yehova ottiya waziveliha amudhi ehu mwa wubuwela mafariyado a relijiau yonyengetta. Noona murumiwi Paulo aloga: “Tamelani enimuzivela Mulugu.”—Éfeso 5:10.

12. Sabwaya jani Yehova kanrumela maferiyado?

 12 Txino attu anubuwela wila kaninfanyela otanalela ondela mattangaya, mbwenye Yehova kanonamo dhawene. Iyene kanrumela maferiyado andela mmebedhoni onyengetta, obe anattittimiha attu obe ezinddiyelo ya elabo. Motagiha, akadda Ejipitu aahikana mattanga menjene àkoselani amilugu onyengetta. Mbudduweli aIzrayeli mw’Ejipitu, ahirava yeddelo ejile ya amalabo bakuwela wi ‘mattanga omuttabela Yehova.’ Mbwenye Yehova wahasottotta sabwa y’okosa ejuwene. (Obudduwa 32:2-10) Namavuhulela Izaiya ohiloga, “kamulige eloene yokwarula!”—Kengesa Izaiya 52:11.

KAKALA WADERETU OGEDDAGA NA ATTU EENA

13. Mavuzo gani ankaniwena ogagana ottiya oja mattanga a feriyado?

13 Vaganiliwe ottiya woona maferiyado, txino weyo ohivikosa mavuzo menji. Ninga motagiha: Dikose eni amarho aga o’mabasani agaddivuza enkoddelimi omuja Natali? Ddikose dhavi muttu agaddivaha sagwatti ya Natali? Dikose eni akala mamunaga obe mwadhaga onoddiwoba labo na feriyado? Txini enakamihedhe anaga ohinyimuleya agahije mattanga a labo nobaliwa obe maferiyado?

14, 15. Onakose eni akala muttu onowukumbirha boa festa obe agawuvaha sagwati?

14 Jamakamaka olabihedha etanalelo yehu wi niziwe enalogihu vina enakosihu mwa makani ninga aba. Motagiha, akala muttu onowukumbirha boa festa, onampwaze. Weyo ologe, “Ddinowutamalela.” Mbwenye muttu mwina agaveda oziwavi, enkoddeliwe wubuwela maferiyado, onofanyela ompanga  na ttotto. Noona, midhidhi dhotene ologe n’oderetu, n’ofasa vina na nriho. Bibilia onologa: “Makani enyu akale ofasa, ozivela zelu, muziwaga omwakula muthu-muthu mumfwanyeleliye.” (Kolosi 4:6) Weyo podi otapulela wi onononga mudhidhi na eena vina onowavaha sagwati mudhidhi mwina ottiya siku na feriyado.

15 Onakose eni muttu agawuvaha sagwati? Bibilia kannaddela dhotene dhinfanyela iyo okosa, mbwenye ononaddela wi ninofanyela olabihedha yubuwelo yaderetu. (1 Timóteo 1:18, 19) Txino namavahaya kanziwa wi kunkosa mattanga. Obe onologa, “Ddinoziwa wi kunkosa mattanga aba, masiki dhawene ddinfuna dduvahe elobo eji.” Txino onogana wakela sagwatiya obe okodda. Mbwenye yogana yotene enakosiwe okaane ekuluvelo wi onokaana yubuwelo yaderetu. Iyo kaninfuna okosa elobo enobanihe omarho wehu na Yehova.

WEYO NA AMUDHAWO

Abale animwebedha Yehova anohagalala

16. Onakose eni amudhawo agafunaga oja mattanga a feriyado?

16 Onakose eni amudhawo agafunaga oja mattanga a feriyado? Kunfanyela wanyanyuwela. Kobuwela, awene anofanyela osakula enfunani okosa. Okale wofaseya vina orihe dhosakula dhawa ninga munfunela weyo wi awene arihe dhawo. (Kengesa Mateu 7:12.) Ki onakose eni akala amudhawo anfuna wila ononge mudhidhi na awene muferiyadoni? Ohinatti osakula yokosa, omulobele Yehova wi awukamihedhe okosa yosakula yaderetu. Otanalele mikalelodha, vina opepesele. Kobuwela wi weyo onofuna omuhagalaliha Yehova malabo otene.

17. Onakose eni enakamihedhe anawo orabela osilila agawonaga eena bali vamattangani a feriyado?

 17 Onakose eni enakamihedhe anawo agawonaga eena bali vamattangani a feriyado? Mudhidhi bu mudhidhi, onofanyela osasanhedhela elobo yavawoka vatakulu. Podi wavaha sagwati. Mbwenye sagwati yamakamaka enavaha weyo anawo bu mudhidhi wawo na wattonyihedha okwela.

KALAGIHA WEBEDHA WA EBARIBARI

18. Ninfanyelela eni woona matugumano a Okristu?

18 Wila nimuhagalalihe Yehova, ninofanyela onyanyala relijiau yonyengetta na dhilemelelodha dha maferiado. N’eji ninofanyela vina olabela webedha wa ebaribari. Namukalelo gani? Mukalelo mmodhaya bwa okala mmatugumanoni a Okristu. (Kengesa Ahebreu 10:24, 25.) Matugumano epaddi yamakamaka ya webedha wa ebaribari. (Masalmo 22:22; 122:1) Ninolibihana nigatugumanaga.—Roma 1:12.

19. Ekalelini yamakamaka wawaddela attu eena ebaribari ya Bibilia esunziliwe?

19 Mukalelo mwina w’osakula webedha wa ebaribari ku ologa na attu eena ebaribari ensunzihu mBibiliani. Attu enji anonyimuwa sabwa ya obure ompadduwa mwilaboni. Txino weyo onowaziwa attu eena anyimuwile. Wawaddele mwaha wa njedhelo nawo naderetu na musogorho. Mudhidhi onona weyo matugumano obe ogalogaga na attu eena ebaribari ya Bibilia, onele woona wi kunkosa epaddi ya relijiau yonyengetta na dhilemelelodha. Kaziwa wi onele ohagalala vina Yehova onele oreliha venjene guru dhawo dha osakula omwebedha iyene bahi na mukalelo wofanyela.—Malakiya 3:10.