Skip to content

Skip to secondary menu

Skip to table of contents

Anamoona a Yehova

Etxuwabo

Txini Ennisunziha Bibilia?

 KAPITULU KUMI NA TANU NA NAI

Kanfiyedhe Yehova

Kanfiyedhe Yehova

1, 2. Ninafanye wuvi nibarelo malabo abano?

KOBUWELA wi onowedda, labo na pevo enddimuwa. Odhulu dhihikalawo mirabo dhoriba, jai dhinong’anima badhigaruma. Momaguva muzogwe onorubwa. Weyo onoveda mburo wottawelawo. Ogafanya mburoya wofanyela vina wowuma enowuzivela vaddiddi!

2 Jijuwene empadduwa ovanene. Elabo enottabwavi. Txino onovivuza, ‘Ddinafanye wuvi nibarelo?’ Munasalmo ohiloga mBibiliani: ‘Ddinele ologa wa Yehova: ‘Nyuwo muli thawela yaga, oliba waga onimuroromelimi.’’ (Masalmo 91:2) Ndde, Yehova onowodha onivuna mwa makattamiho ehu otene ovanene, vina ononivaha njedhelo naderetu na musogorho.

3. Ninamukose dhavi Yehova okala ttawela yehu?

3 Yehova onnibarela dhavi? Iyene ononikamihedha okwaranya makattamiho ankanehu, vina iyene ddowodha-wodha opitta muttu mwina agafunile onikattamiha. Masiki elobo yabure eganipadduwela ovanene, nikaane ekuluvelo wila Yehova onele ogomiha obure wotene musogorho. Bibilia ononilibiha: “Kalaniví mukwelani mwa Mulugu.” (Juda 21) Ninofanyela onfiyedha Yehova wila anikamihedhe mudhidhi wa makattamiho. Kito ninakose dhavi?

KAKULELA OKWELA WA MULUGU

4, 5. Yehova onnitonyihedha dhavi okwela waye?

4 Wi ninfiyedhe Yehova, ninofanyela oziwa mukalelo onnikwela Iyene. Katanalela dhotene  dhinnikosela Yehova. Iyene ohinivaha elabo yokoddela, miri na dhinama dhowinjiva dhoziva woona. Iyene vina ohinivaha oja woziva na manje ottonddorha wi nimwege. Yehova ononisunziha mBibiliani nzina naye, na mikalelo dhaye dhokoddela. Ottiya esuwenevi, iyene ohitonyihedha wi ononikwela vamurumeliye Mwanaye wokweleya Yezu odha velaboni ya vati wila avahedhele egumi yaye wa iyo. (Joau 3:16) Nanda mwaha wa yobolo ejo, nihikana njedhelo naderetu na musogorho.

5 Yehova osasanyedha Omwene modhela Mesiya, olamulela wa wirimu onagomihe makattamiho mohigonela. Omweneya onele okosiha elabo okala paraizu, munakaliwege na murenddele vina ohagalala wa mukalakala. (Masalmo 37:29) Mukalelo mwina onnitonyihedha Yehova okwela, bwa onisunziha mukalelo waderetu wokalawo ovanene. Ononiwoba wi nilobele wa iyene, vowi oli womala-nawale wi avuruwane malobeloya. Yehova onotonyihedha okwela waye wa muttu-muttu wa iyo mowoneya-mwene.

6. Onakulele dhavi okwela wa Yehova?

6 Onakulele dhavi okwela wa Yehova? Kamutonyihedhe wila onotamalela dhotene dhinukosela iyene. Mokubanyiha-mwene, enji ddabuno kantamalela. Yakakene yampadduwa Yezu bali velaboni ya vati. Labo dhahi, Yezu wahavulumutxa alobwana kumi ana maranya, mbwenye mmodha bahi ddimutamaleli. (Luka 17:12-17) Iyo ninfuna nikale ninga oddule omutamaleli Yezu. Mudhidhi wotene ninofanyela omutamalela Yehova.

7. Ninamukwele dhavi Yehova?

7 Iyo vina ninofanyela otonyihedha okwela wehu wa Yehova. Yezu wahiloga na anamafara aye wi anfanyela  omukwela Yehova na murima wawa wotene, na guru dhawa dhotene vina zelu dhawa dhotene. (Kengesa Mateu 22:37.) Ejo entapulela eni?

8, 9. Ninatonyihedhe dhavi wi ninomukwela Yehova?

8 Okala ologavi wi onomukwela Yehova enowakwana? Nne. Akala ninomukwela Yehova na murima wehu wotene, guru na zelu, ninele otonyihedha omukwela na merelo ehu. (Mateu 7:16-20) Bibilia ononisunziha mowoneya-mwene wi akala ninomukwela Mulugu, ninele wiwelela malamulo aye. Ejoya enorutxa? Nne, vowi “malamuloyá a [Yehova] kanlémela.”—Kengesa 1 Joau 5:3.

9 Nigamwiwelelaga Yehova, ninokana egumi yohagalala vina yoziva. (Izaiya 48:17, 18) Koddi txini enanikamihedhe omususelavi Yehova? Nddoweni noone.

KAKALAVI WOFIYEDHEYA NA YEHOVA

10. Onfanyelelani osunzagavi modhela Yehova?

10 Weyo odhile dhavi okala marho wa Yehova? Modhela omusunza Bibilia weyo ohimuziwa Yehova vina ohunuwiha omarho wawo na iyene. Omarho wawo oli ninga motto onfanyela otitedhiwa. Ninga motto onfuna otitedhiwa weyo vina onofanyela osunzagavi modhela Yehova wi omarho wenyu okale woliba.—Gano 2:1-5.

Ninga motto, omukwela wawo Yehova onofanyela otitedhiwa wi onattime

11. Masunzo a Bibilia anopatte dhavi?

11 Ogamusunzagavi Bibilia, onele osunza dhilobo dhinfuna oddiginya murima wawo. Koona mukalelo wonile anamafara eeli a Yezu mudhidhi watapuleliye mavuhulo a Bibilia. Awene aloga: “Kanewa murima wehu oviha mudila, iyene anitapulelaga mazu a Malebo Okoddela?”—Luka 24:32.

12, 13. (a) Txini egapadduwile na omukwela wehu Mulugu? (b) Omukwela wehu Yehova onakalewovi dhavi?

 12 Ninga mwaddiginyeyile mirima dha anamafara vaanonelanimo Malebo, weyo vina wahona yakakene mudhidhi wanoneliwemo Malebo. Eji ewukamihedha omuziwa Yehova vina omukwela. Kugafunile wobaniha omukwela wawo Yehova.—Mateu 24:12.

13 Wi okale marho wa Yehova onofanyela olabagavi wi omarhowa ovadde. Ogasunzagavi modhela iyene vina Yezu, onele wubuwela ejile esunziliwe vina mukalelo onattiddihedhiwe mabasa mwigumini mwawo. (Joau 17:3) Ogamwengesaga obe ogamusunzaga Bibilia, kavivuze: ‘Eji enddisunziha eni modhela Yehova? Ddinfanyelelani omukwela na murima waga vina guru dhaga dhotene?’—1 Timóteo 4:15.

14. Nlobelo ninnikamihedha dhavi olibiha omukwela wehu Yehova?

 14 Weyo ogakaana marho onologana mudhidhi wotene vina eji enolibiha omarho wenyu. Na mukalelo wakakene, nigalogaga na Yehova mudhidhi wotene na nlobelo omukwela wehu onele oliba. (Kengesa 1 Tesalónika 5:17.) Nlobelo mvaho wohagalaliha ondela wa Babi wehu wa wirimu. Ninofanyela ologa dhili mmirimani mwehu na iyene. (Masalmo 62:8) Kaninfanyela wiyelela malobelo akene. Ndde nigamusunzagavi Bibilia vina banigakosa nlobelo nindela mmirimani mehu omukwela wehu Yehova onelege olibavi.

WAWADDELE EENA MWAHA WA YEHOVA

15, 16. Weyo onona dhavi mabasa olaleya?

15 Nigafuna okalavi wofiyedheya na Yehova ninele ofuna ologa na eena modhela nroromelo nehu. Ologa na eena mwaha wa Yehova gari yohagalaliha vaddiddi. (Luka 1:74) Aba mabasa àttiyedhi Yezu Akristu otene ebaribari. Notene ninofanyela olaleya miselu dhapama dha Omwene wa Mulugu. Weyo onokosa ejene?—Mateu 24:14; 28:19, 20.

16 Murumiwi Paulo wahoona mabasa a olaleya ninga ohagalaliha; iyene ologa wi “nifumo.” (2 Korinto 4:7) Wawaddela eena mwaha wa Yehova vina yogana yaye, mabasa a makamaka vaddiddi anfanyeliwe okosa. Obu mukalelo wa weyo omulabela Yehova vina iyene onottittimaha mabasa awo. (Ahebreu 6:10) Olaleya jopureleyamo wa weyo na ole onuvuruwana, modhela wakamihedha eena, vina wamwinyene enele wukosiha onfiyedha Yehova nanda, ottambirha egumi yohimala. (Kengesa 1 Korinto 15:58.) Akalawo mabasa meena onwodha wuhagalaliha opitta olaleya?

17. Olaleya ekalelini mabasa omaguvela?

 17 Malabo abano, olaleya mabasa omaguvela vaddiddi. Iyo ninofanyela “olaleya mwilaboni,” vina ninofanyela “okosa momaguva.” (2 Timóteo 4:2) Attu onofanyela waddeliwa mwaha wa Omwene wa Mulugu. Bibilia onologa: “Siku ninddimuwa na Nabuya nili vakuvi, ninfuna ofiya-wene kanili uddayi.” Omagomo ‘kunagonele!’ (Sofoniya 1:14; Habakuk 2:3) Ndde, ovanene Yehova onele ononga elabo eji ya Satana. Noona ejoya ehinatti opadduwa attu anofanyela oziwa, dhawene panafunani osakula omulabela Yehova.

18. Ninfanyelelani omwebedha Yehova banili na Akristu eena ebaribari?

18 Yehova onfuna wi nimwebedhe iyene banili na Akristu eena ebaribari. Bibilia onologa: “Nubuwelanege wi nilibihe okwela, ottidda mabasa a pama kanitxelele matugumano ehu, ninga eniraga ena; nilibihanege thabwa-thabwa apa vanziwehu wi siku na Nabuya nili vakuvi.” (Ahebreu 10:24, 25) Nigahifanyela okosa mpaka vanwodhelihu wi nihiyelele matugumano. Matugumano anonivaha gari yolibihana vina ovaddihana muttu na mukwaye

19. Sabwaya jani wakwela abali na arogora a Okristu enonikamihedha?

19 Ogadhowaga omatugumanoni onele wafanya amarho aderetu anfuna wukamihedha omwebedha Yehova. Onele wafanya abali na arogora attiyana-ttiyana anziveliwa na weyo ankosa guru dhawa wi amwebedhe Yehova. Dhawene ninga weyo, awene vina bohakwana vina anoddawa. Awene agoddawela walevelele. (Kengesa Kolosi 3:13.) Ozuzumelege woona mikalelo dhaderetu dha abali na arogora awo a Okristu, okosa ejuwene onele wukamihedha okala wofiyedheya na Yehova.

 EGUMI YEBARIBARI

20, 21. ‘Egumi yebaribari txini’?

20 Yehova onfuna wi amarho aye otene akaane egumi yaderetu. Bibilia ononisunziha wi egumi yehu musogorho enele okala yottiyana na eji ena iyo ovanene.

Yehova onfuna wi ojevo ‘egumi yebaribari.’ Weyo onele ojavo?

21 Musogorho iyo ninele okalawo na mukalakala, ottiya okalawo vyaka 70 obe 80. Ninele ohagalala na ‘egumi yohimala’, yowakwana vina murenddele, osanzaya mparaizu wokoddela. Jijene enloga Bibilia ‘egumi yebaribari.’ Yehova ohigana onivaha egumi yebaribari. Mbwenye ninofanyela okosa ovanene enwodhihu wi ‘nifanye egumi yohimala.’—1 Timóteo 6:12, 19.

22. (a) Ninawodhe dhavi ‘okaana egumi yebaribari? (b) Sabwaya jani kunfanyela opanela egumi yohimala?

22 Ninawodhe dhavi ‘ofanya egumi yohimala’? Nigattiddaga ‘mabasa a apama’ vina ‘nigarelaga na mabasa ofanyelela.’ (1 Timóteo 6:18) Entapulela wi ninofanyela ottiddihedha mabasa esile dhinsunzihu mBibiliani. Noona, egumi yebaribari kindela mwa guru dhinkosa iyo naanya. Kaninfanyela opanela egumi yohimala. Obu “nvaho wa mahala” wa Yehova onavahiye adhari aye ororomeleya. (Roma 5:15) Babihu wawirimo onele wattuva adhari aye ororomela nvahoya.

23. Onfanyelelani okosa dhosakula dhaderetu avanene?

23 Kavivuze, ‘Miyo ddinomwebedha Mulugu na mukalelo onrumeliye?’ Akala weyo onofuna okosa masadduwo kakosa mwa mukalelo waderetu. Nigakosa masadduwo otene wi nimwiwelele Yehova onokala ttawela yehu. Iyene onele ovuna nlogo naye nororomeleya mmalaboni aba omariha a elabo eji ya  Satana. Yehova onele okosiha wi nikalewo mparaizu na mukalakala ninga muganeliye. Ndde, weyo podi okaana egumi yebaribairi ogakosa dhosakula dhaderetu ovanene!