Skip to content

Skip to secondary menu

Skip to table of contents

Anamoona a Yehova

Etxuwabo

Txini Ennisunziha Bibilia?

 KAPITULU TANU

Yobolo—Nvaho Munddimuwa wa Mulugu

Yobolo—Nvaho Munddimuwa wa Mulugu

1, 2. (a) Mvaho onukalela dhavi wa ttima enddimuwa? (b) Sabwaya jani yobolo mvaho wa Mulugu wa ttima vaddiddi?

MVAHO gani munddimuwa vaddiddi wakelilege weyo? Wila mvaho okale wa makamaka kunfanyela okala wa muttengo munddiwa vaddiddi. Mvaho onkaana ttima enddimuwa ogawuzivela obe ogakwanihedha efunelo mwigumini mwawo.

2 Mivaho dhotene dhinivahile Mulugu, ohikalawo mmodha bahi onfunetxa iyo vaddiddi ottiya mivaho dhiina. Obu mvaho munddimuwa vaddiddi wa nlogo notene na attu. Ninga munasunzelihu kapitulu eji, Yehova ohimuruma mwanaye, Yezu Kristu onivuna wi nikalewo na mukalakala. (Kengesa Mateu 20:28.) Mwa omuruma Yezu velaboni ya vati wi anikamihedhe, ejo mwebaribari entonyihedha wi Yehova ononikwela.

YOBOLO TXINI?

3. Attu ankwela eni?

3 Yobolo mukalelo olabihedhi Mulugu wi afurule nlogo na attu mu ottegani vina mu okwani. (Éfeso 1:7) Wila ninonelemo sabwa yafuneyetxa yobolo, ninofanyela oziwa yapadduwile vyaka matxikwi na matxikwi mundduni mmunddani mwa Edeni. Ababi ehu oroma, Adamu na Eva, aahittega. Sabwa ya ottega wawa, awene ahikwa. Anawa vina anokwa sabwa ya orava ottega wa Adamu na Eva.—Koona Yowenjedha 9.

4. Adamu wali ani, txini yavahiwiye?

 4 Yehova mwamuttanddeliye mulobwana woroma, Adamu, iyene wahinvaha elobo ya ttima vaddiddi. Wahinvaha egumi yowakwana. Iyene wahikaana maningo vamodha na mubuwelo woligana. Txipo iyene kagakalile muredda, kagoluvalile, vina kagakwile. Mulugu wali ninga babi waye, sabwani ddi iyene wamuttanddile. (Luka 3:38) Mudhidhi wotene Yehova wanloga na Adamu. Mulugu wannimwaddela deretu ejile yafuniwana iyene vina wahinvaha mabasa oziva okosawa.—Wita 1:28-30; 2:16, 17.

5. Mazu anloga wi Adamu ottanddiwe “woladdana na Mulugu” antapulela eni?

5 Mulugu wamukosile Adamu “woladdana na iyene.” (Wita 1:27) Yehova wahimuttandda na mikalelo dholigana na dhaye, ninga okwela, zelu, oligana, vamodha na guru. Iyene wahinvaha ofuru wa osakula. Adamu kaali ninga makina ankosa esasanyedhiwani. Noona iyene wanwodha osakula okosa elobo yaderetu obe yabure. Adamu kosakula omwiwelela Mulugu, agahikalawo na mukalakala mParaizu.

6. Adamu muttiyeliye onvuruwana Mulugu oyeleeli eni? Ejo ennipatta dhavi?

6 Mudhidhi ottiyile Adamu onvuruwana Mulugu nanda battongeliwa okwa, wahiyelela dhilobo dhinjidhene. Wahiyelela vina wandana waye na Yehova, egumi yowakwana, vamodha na Paraizu. (Wita 3:17-19) Adamu na Eva kanvuruwanile Mulugu, mwa dhahene awene kana njeedhelo viina. Sabwa ya ejile ekosile Adamu, “ovolotxa othega mwilaboni; othegawá ototelamo okwa, ddabuno okwa onomuthidda muthu-muthu, vowi etene athega.” (Roma 5:12) Adamu na Eva vattegilani, ‘ahiviguliha’ anyene  vamodha na iyo, dhahene nili adhari a ottega na okwa. (Roma 7:14) Kito iyo nihikaana njeedhelo? Ndde, nihikaana.

7, 8. Yobolo txini?

7 Yobolo txini? Yobolo entaganyiheya na dhilobo bili dhamakamaka. Yoroma, yobolo muttengo ompitxiwa wila obololewe muttu obe muttengo onoboleliwana elobo. Yanawili, yobolo bu muttengo onakwanela opitxela elobo-elobovi.

8 Kavo muttu agawodhile opitxa muttengo munddimuwa vaddiddi wakosile Adamu vattegiliye nanda banitotela okwa. Mbwenye Yehova ovaha mukalelo wa ovuna ottega vamodha na okwa. Ndoweni nisunze ttima vina yopurelamo ya yobolo.

MUKALELO WAPERHEKILE YEHOVA YOBOLO

9. Yobolo egapitxiwe dhavi?

9 Kavo muttu wa iyo agawodhile wobolela egumi yowakwana. Sabwaya jani? Sabwani iyo notene nili attegi. (Masalmo 49:7, 8) Yafuneya yali yobolo ya ttima yoligana na ejile yayeleliwe. Noona bigakuweliwa ‘yobolo yakakene.’ (1 Timóteo 2:6) Yobolo yanfanyela okana ttima yoligana na egumi yayeleli Adamu.

10. Yehova waperhekile dhavi yobolo?

10 Yehova waperhekile dhavi yobolo? Iyene wahimuruma velaboni ya vati mwanaye wokweleya. Mwana oddu, Yezu, yottandda yaye yoroma. (1 Joau 4:9, 10) Yezu na ofuna wahittiya murala waye odhulu wakaliye na Babe. (Filipi 2:7) Yehova wahimwaliha egumi ya Yezu odhulu wi akale velaboni ya vati, Yezu obaaliwe woligana, noona kaana yottega.—Luka 1:35.

Yehova wahimperheka Mwana waye wa nammodha ninga yobolo wa iyo

11. Mulobwana mmodha owodhile dhavi okala yobolo ya attu otene?

 11 Adamu vattiyeliye wiwelela, iyene vamodha na attu otene ahiyelela egumi yowakwana. Ogahikala mulobwana mwina agawodhile wobolela egumi eji yayeleli ana otene a Adamu? Ndde. (Kengesa Roma 5:19.) Yezu, txipo kattegile, ohivaha egumi yaye yowakwana ninga yobolo. (1 Korinto 15:45) Egumi yaye yowakwana egahittiddihedhiwa mabasa wi avunele okwa wa ana otene a Adamu.—1 Korinto 15:21, 22.

12. Yafuneyela eni wi Yezu oone goi dhahene?

12 Bibilia onotapulela goi yavilelile Yezu ahinatti okwa. Iyene wahiwasuliwa na muwasulo woopa vaddiddi, otomeyiwa vapingirhizini, vina ohivilela okwa wa otabuwa. (Joau 19:1, 16-18, 30) Yafuneyela eni wi Yezu oone goi dhahene? Satana wahiloga wi kawo muttu agakanilevi nroromelo wa Mulugu agehiwaga. Yezu wahitonyihedha wi muttu wowakwana podi okalavi wororomeleya wa Yehova masiki va matabuwoni opitta. Yehova wahagalala vaddiddi sabwa ya Yezu!—Gano 27:11; koona Yowenjedha 15.

13. Yobolo yapitxiwe dhavi?

13 Yobolo yapitxiwe dhavi? Yezu wahinperhekela Babe ttima ya mukutto wa egumi yaye. Siku 14 na Nisani mweri wa ayuda yaka ya 33, Yehova wahattiya amwiddani a Yezu ompa. (Ahebreu 10:10) Mukweli Yezu, siku nanoraru,Yehova wahinvenyiha mu okwani, kanvenyihile ninga muttu womaningoni mbwenye womuyani. Mumalelani, vadhowiliye odhulu wali Babe wahiperheka vamentoni va Mulugu ttima ya egumi yaye yowakwana ninga yobolo. (Ahebreu 9:24) Yobolo ehimala opitxiwa, noona nihikaana gari  ya woboliwa muttegani vina mu okwani.—Kengesa Roma 3:23, 24.

ONAPURELEMO DHAVI YOBOLO

14, 15. Txini enfanyela iyo okosa wi nileveleliwe dhottega dhehu?

14 Nimala opurelamo mvaho munddimuwa wa Yehova. Ndoweni noone mukalelo onapurelemo iyo yobolo ovanene vina musogorho.

15 Dhottega dhehu dhinoleveleliwa. Mudhidhi wotene enorutxa okosa ejile eli yaderetu. Mudhidhi mwinjene ninokosaga dhilobo dhihinfanyela. (Kolosi 1:13, 14) Kito ninaleveleliwe dhavi? Nigakosa elobo yabure, na oviyeviha ninofanyela okumbirha nlevelelo wa Yehova. Ninofanyela vina okaana nroromelo wi dhottega dhehu dhinele oleveleliwa.—1 Joau 1:8, 9.

16. Ninfanyela okosa eni wi nikaane mubuwelo wotxena?

16 Ninokaana mubuwelo wotxena. Akala mubuwelo wehu ononaddela wi nihikosa elobo yabure, ejo enonisumela nivyonaga wi kanina ttima vina njeedhelo. Mbwenye kaninfanyela onyimuwa. Iyo nigadidela okumbirha nlevelelo wa Yehova, iyene onele oniwa vina onele onilevelela. (Ahebreu 9:13, 14) Yehova onfuna wi niloge na iyene elobo-elobovi ya makattamiho ehu vina wobana ona iyo. (Ahebreu 4:14-16) Ninga yopurelamo iyo ninokaana murenddele na Mulugu.

17. Mareeliho gani anwodheya sabwa ya Yezu onikwela?

17 Nihikaana njeedhelo na egumi ya mukalakala. ‘Yottega entotela okwa; Yehova onnittambiriha mvaho oli egumi yohimala, modhela Yezu Kristu nabuya wehu.’ (Roma 6:23) Vowi Yezu ohikwa sabwa yehu, iyo podi okalawo namukalakala vina ohagalala  na egumi yowakwana. (Ovuhulela 21:3, 4) Kito ninfanyela okosa eni wi nittanbirhe mareliho aba?

ONELE WAKELA YOBOLO?

18. Ninziwa dhavi yawila Yehova ononikwela?

18 Kobuwela ohagalala onkaana weyo ogattambirha mvaho wokoddela vaddiddi. Yobolo mvaho munddimuwa vaddiddi opitta mivaho dhotene, vina ninomutamaalela Mulugu na murima wehu wotene. Joau 3:16 ononaddela wi “Mulugu owakwela athu vaddiddi ofiyedha walevela Nammodha waye, wi animuroromela ahirimele, athidde egumi yohimala.” Ndde, Yehova ononikwela vaddiddi mpaka onivaha mwanaye wokweleya, Yezu. Iyo ninoziwa vina wi Yezu ononikwela sabwani na ofuna oniperhekela egumi yaye. (Joau 15:13) Mvaho wa yobolo onofanyela wuvaha ebaribari yawila Yehova na Mwanaye anowukwela vaddiddi.—Galásia 2:20.

Ninga musunzile iyo mwaha wa Yehova, iyo ninokala amarho aye vina okwela wehu wa iyene onowunuwavi

19, 20. (a) Onawodhe dhavi okala marho wa Yehova? (b) Vina onawodhe dhavi olagiha wi ohirumeela mukutto wa yobolo ya Yezu?

19 Ninga musunzeli weyo mwaha wa okwela onddimuwa ona Mulugu, onawodhe dhavi okala marho waye? Omukwela muttu ohinimuziwa weyo enorutxa. Joau 17:3 onloga wi ninofanyela omuziwa Yehova. Ogakosa ejuwene, okwela ona weyo wa iyene onowunuwa vaddiddi, weyo onofanyela omuhagalaliha, mwa dhahene onodha okala marho waye. Kadhowagavi bugasunza mwaha wa Yehova modhela omusunza Bibilia.—1 Joau 5:3.

20 Kaakela mukutto wa yobolo ya Yezu. Bibilia onloga wi “Ole onimurumeela mwana ofwanya egumi yohimala.” (Joau 3:36) Eji entapulela eni? Entapulela okosaga ejile erumiwehu na Yezu. (Joau 13:15) Kaninfanyela ologa bahi wi ninomuroromela  Yezu. Wi nirumeele yobolo, ninofanyela okosa elobo eniwanana na nroromelo nehu. Tiago 2:26, ninowengesa: “nroromelo nihinna merelo thokwa.”

21, 22. (a) Ninfanyelela eni odhowa omattangani vyaka dhotene? (b) Txini enaloge iyo mu kapituluni 6 na 7?

21 Kadhowa omattangani a wubuwela okwa wa Kristu. Otxiguwo obule Yezu ahinatti okwa, iyene wahiloga wi ninofanyela wubuwelaga okwa waye. Aba mattanga ankosaga iyo vyaka dhotene ankuweliwa wubuwela okwa wa Yezu obe “siarhi ya nabuya.” (1 Korinto 11:20; Mateu 26:26-28) Yezu onfuna wi nubuwelege yawila iyene operheka egumi yaye yowakwana wi anobolelena. Iyene wahiloga: “Eraganiví muddubuwelaga.” (Kengesa Luka 22:19.) Ogadhowa woona mattanga a okwa wa Yezu, weyo onolagiha wi onowubuwela wi yobolo mvaho munddimuwa vaddiddi vina Yehova vamodha na Yezu anonikwela vaddiddi.—Koona Yowenjedha 16.

22 Yobolo mvaho wa vawoka ottambirhile iyo. (2 Korinto 9:14, 15) Attu matxikwi na matxikwi akwile anopurelamo mwaha wa mvaho obu wa makamaka. Kapitulu 6 na 7 ninele ologa mukaleloya.