Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 KAPAS EIS 2

Pwata Ua kon Aúreki Napei me Mesemesei?

Pwata Ua kon Aúreki Napei me Mesemesei?

PWATA A LAMOT?

Mi wor met ra kon lamot seni met ka kúna lón ewe kilaasen oori.

MET KOPWE FÉRI?

Anchangei mwo ei: Atun Julia a oori lón ewe kilaas, a chék kúna kitinnupun. A pwisin ereni: “Mi lamot upwe ekichúchúeiló,” inaamwo ika seman kewe me inan me chiechian kewe ra erá pwe a “fókkun kichúchú.”

Kkanoto chék, a lululó met Julia a ekiekin féri pwe epwe turuseni “mwaren nimu paun.” A ekiekin échúnna anan lón fitu rán . . .

Met kopwe féri ika a léllé meefiemi me Julia?

KAÚLÓ ME EKIEKI!

Óm ekiek usun pwisin en a tongeni usun ngúnúwom lón eú kilaas mi otuputup

Ese wor ngawen óm ekieki usun napom me mesemesom. Ren enletin, ewe Paipel a kapas éch usun fitemén mwán me fefin mi átéch me liéch choweán Sara, Rahel, Apikael, Josef me Tafit. Paipel a apasa pwe ewe fefin itan Apisak, a “fokun liöch.”—1 King 1:4.

Iwe nge, chómmóng kúkkún me sáráfé ra kon aúreki naper me mesemeser. Ena mettóch epwe tongeni aworato watteen osukosuk. Ekieki mwo:

  • Lón eú repot Ión Merika, lap seni esopwun chóchóón nengngin ra erá pwe a lululó pauner, nge ren enletin fitemén chék me leir.

  • Pwal lón eú repot lón Merika, kis seni esopwun chóchóón fefin ra ekieki pwe ra fókkun kitinnup nge ren enletin ra kichúchú!

  • Ekkóch kúkkún me sáráfé mi achocho le ekichúchúúroló, ra eáni ewe samau itan anorexia, weween ra nnouesini mwéngé me repwe tongeni feiengaw ren.

 Kopwe kútta álillis ika a wor esissillan pwe a uruk anorexia are a lululó óm mwon mwéngé. Kopwe fós ngeni semom are inom are ngeni emén watte ka lúkúlúkú. Ewe Paipel a apasa: “Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.”—Än Salomon Fos 17:17.

EWE METTÓCH MI FÓKKUN ÉCH KOPWE TONGENI ÉMÚRINNÉLÓ!

Ren enletin, napanapen emén me lón ina met epwe pwári meséchún are mesengawan. Áwewe chék iei alon Paipel usun Apsalom, néún King Tafit we:

“Esap wor eman me lein chon Israel meinisin a iteföüla ren äteöchün usun Apsalom. Pun seni fän pechen tori won möküran esap wor och terin.”—2 Samuel 14:25.

Nge ena alúwél a fókkun lamalamtekia, kútta pwisin itetekian me rawangaw! Ina popun Paipel a pwári ngawen Apsalom pwe a sáwemmang, ese tuppwél me i chón oput.

Ina minne Paipel a awora ekkeei kapasen fén:

“Pwilitalong ewe manau mi fö.”—Kolose 3:10.

“Ousap eäni fouten lükün. . . . Nge ämi liöch epwe pwä ren mine a nom lon letipemi.”—1 Petrus 3:3, 4.

Ese wor ngawen ach mochen sipwe kkat, nge met a kon lamot lap seni ena, ina napanapach kewe me lón. Mwirilóón, aramas repwe ingeiti napanapom kewe mi múrinné nge esap péchékkúlom are napen inisum! Iei alon emén nengngin itan, Phylicia: “Aramas ra kan mwittir áfánni meséchún emén, nge repwe fen kon chechchemeni napanapom kewe mi múrinné me lón.”

ETITTINA NAPOM ME MESEMESOM

Kese kan menei napom me mesemesom?

Ka fen ekiekin wesen aúkúkú onom are reirei pwe kopwe féréchú met ewe ka ter me wóón?

Ika ka tufichin siwili napom me mesemesom, menni leir kopwe filatá?

  • ANÚWEN ÚNÚCHEI

  • ÚKÚI

  • FÉTÚI

  • PWÉTÚI

  • MÉKÚREI

  • FÉÚN MESEI

Ika ka pélúweni ewer ngeni ekkena ruu kapas eis akkomw, me filatá lap seni ruu ekkena mettóch lón kapas eis úlúngát, iwe kopwe chemeni pwe eli án aramas ekiek usum, ese taitap ngeni óm ekiek ese pwúng usun pwisin en. Neman ka kon chék akkaúreki napom me mesemesom.—1 Samuel 16:7.