Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 KAPAS EIS 6

Ifa Usun Upwe Tongeni Ú Ngeni Etipetipaen Táppi Kewe?

Ifa Usun Upwe Tongeni Ú Ngeni Etipetipaen Táppi Kewe?

PWATA A LAMOT?

Atun ka úppós wóón pwisin óm, kopwe pwisin nemenemenuk nge kese mut ngeni ekkóch repwe nemenuk.

MET KOPWE FÉRI?

Anchangei mwo ei: Atun chienen Brian kewe rúúemén chón sukul ra pwereto ren, a niwokkus. A fen fán ruu lón ei wiik ar sótuni pwe epwe ún suupwa. Iwe iei epwele aúlúngátin.

Ewe áeménún át a erá:

“Pwata ka chék pwal ákkáláemén oo? Iwe etto upwe ápwáár ngonuk chienei en?”

A emwerifét atun a apasa “chienei” me a angei och mettóch me lón pwekitan me eit ngeni Brian.

Brian a kúna pwe ewe át a kamwéch efóch suupwa, iwe a fen lapóló án Brian niwokkus.

Brian a apasa: “Omusaaló, ua fen erenikemi pwe use . . .”

Ewe érúúeménún át a kétá: “Meitena ka nissimwa?”

Brian a pwora le erá: “Aapw aa!”

Iwe, a watá péún wóón afaren Brian me mwéngúnúngún ngeni: “Angei chék.”

Ewe áeménún át a akkana ngeni Brian ewe suupwa me mwéngúnúngún ngeni: “Ausap pwal ii akkaffat. Ese wor emén epwe tongeni silei.”

Ika en Brian, met kopwe féri?

 KAÚLÓ ME EKIEKI!

Itá táppin Brian kewe ra wesewesen ekieki met ra féfféri? Pwisin filier ar repwe ún suupwa? Lap ngeni esap ina filier nge fán chómmóng ra tipetipeló ren ekkewe ekkóch. Ra mochen aramas repwe saniir ina popun ra mut ngeni án ekkewe ekkóch repwe nemeni féfférúr kewe.

Ika ina met a pwal fis ngonuk, iwe ifa usun kopwe sú seni me ú ngeni etipetipaen táppumw kewe?

  1. AMMÓLNOKETÁ

    Paipel a apasa: “Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.” —Än Salomon Fos 22:3.

    Fán chómmóng, ka tongeni esilla ewe sóssót epwele fis. Áwewe chék, ka kúna me towau án chienom kewe chón sukul ún suupwa. Iwe ren óm ammólnoketá me mwen ena sóssót, kopwe mmólnéch le pworacho ngeni.

  2. EKIEKI

    Paipel a apasa: “Öüpwe tümwünüfichi limöchün mwelien letipemi.” —1 Petrus 3:16, Agapé.

    Pwisin eisinuk: ‘Mwirin och fansoun met upwe meefi ika ua chék fitaaló met táppi kewe ra kan féfféri?’ Ewer, eli lón ekis chék fansoun kopwe apwapwaai táppumw kewe. Nge met kopwe meefi mwirin? Ka mochen fangetá minne ka lúkú pokiten chék óm mochen apwapwaai táppumw kana?—Ekistos 23:2.

  3. FILATÁ

    Paipel a apasa: “Eman mi wewemang a lükü mettoch meinisin, nge eman mi mirit a nenengeni ia epwe feila ie.”—Än Salomon Fos 14:15.

    Lesor me pwonóón, sipwe eáni eú kefil me kúna mwirilóón. Paipel a kapas usun ekkewe mwán mi kefiléch, choweán Josef, Hiop me Jesus. A pwal kapas usun Kain, Esau me Jutas, iir kewe mi kefilingaw. Nge en met kopwe féri?

Paipel a apasa: “Kamwöchünük won mine a mürina.” (Rom 12:9) Ika ka fen ekieki sópwongawen met epwe fis me tipeppós le féri minne ka ekieki, kopwe máirú ren mecheresin óm áweweei met ka lúkú iwe kopwe meefi pwapwa.

Kosap lólilen. Ese pwal lamot kopwe afalafal ngeniir. A chék naf óm affata ngeniir pwe AAPW. Are ka tongeni affata pwe kese wiliwilikkis, iwe ka tongeni erá:

  • “Ousap pwal apachaeilong!”

  • “Use kan pwal féfféri ekkena sókkun!”

  • “Usun itá mwa nge ouse silei pwe use kan pwal ikkina?”

Kopwe mwittir apasa aapw fán lúkúlúk. Ika ka féri ena, neman kopwe máirú pwe táppumw kewe repwe mwittir wes le sótunuk!

 MET KOPWE FÉRI ATUN KA KÚNA ESIIT?

Ika ka chék fitaaló etipetipaen táppumw kewe, kopwe usun emén robot are mwesin mi chék mwékút fán nemenien emén

Ifa usun ika táppumw kewe ra esiitok? Ika ra erá: “Met ooo, meitena ka nissimwa?” A fen iei usun án aramas esiit seni lóóm. Met ka tongeni féri? A wor ruu mettóch ka tongeni féri.

  • Ka tongeni tipeeú ngeniir. (“Mi pwúng reom, ngang mi nissimwa!” Mwirin kopwe ekis erá ewe popun.)

  • Ékkú ngeniir ewe sóssót. Ereniir ewe popun kese etiwa me achchúngú ekiekiir. (“Tittipei pwe en mi fen tipachem ina pwata kese úkkún suupwa?”)

Ika táppumw kewe ra chúen ekkesiitok, sú seniir! Chemeni pwe ika a ttam óm nónnóm rer, iwe epwe pwal lapóló weiresin ewe etipetip. Óm sú me ikena ie, a pwáraatá pwe kese mut ngeni ekkewe ekkóch ar repwe nemenuk.

Ewer, epwe chék fiffis etipetip seni chienom kewe. Nge ka tongeni filatá met ka mochen féri, me pwisin nemeni met a fiffis. Ren enletin epwe chék pwisin filiom!—Josua 24:15.