Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 KAPAS EIS 10

Ifa Usun Paipel A Tongeni Álisiei?

Ifa Usun Paipel A Tongeni Álisiei?

PWATA A LAMOT?

Paipel a apasa pwe “ekewe Toropwe mi Pin meinisin ra pop seni . . . Kot.” (2 Timoty 3:16) Ika mi pwúng ena, iwe Paipel a tongeni awora emmwen mi lamot ngonuk.

MET KOPWE FÉRI?

Anchangei mwo ei: David a fetál lón eú sóópw lepwin nge a fókkun kiroch, iwe ese tongeni kúna ewe al. Ese chúen silei ia a nóm ie. A fen mworukoló me riki ngeni efóch al.

Ika en David, met kopwele féri?

KAÚLÓ ME EKIEKI!

Ka tongeni féri eú me lein ekkeei mettóch:

  1. Tingor álillis.

  2. Néúnéú tengki.

  3. Sópweló chék le fetál me áneánei pwe neman kopwap kúna ewe al.

A ffat pwe ena nampa 3 ese fókkun álilliséch.

Ena nampa 2 a múrinné seni nampa 1. Ewe tengki a nóm reom lón unusen óm fetál iwe epwe emmwenuk pwe kopwe kúna ewe al.

A pwal ina usun napanapen án Paipel epwe tongeni álisuk!

Ena puk mi kon terú a tongeni

  • emmwenuk lón osukosuken manawom

  • álisuk le sileeló pwisin en me emúrinnéló manawom

  • áiti ngonuk ifa usun kopwe eáni eú manaw mi echipwér

 PÉLÚWEN EKKEWE KAPAS EIS MI FÓKKUN LAMOT LÓN MANAWACH

Seni chék lekúkkúnúch sia kan kakkapas eis.

  • Pwata mi araw fán láng?

  • Met ekkewe fúú ra ffér seni?

Mwirin sia poputá le kapas eis usun met a kan fiffis wóón fénúfan.

Ifa usun ika pélúwer kewe ra fen nónnóm lón Paipel?

Chómmóng aramas ra erá pwe ewe Paipel a masou ren tutulap me pwóróusen lóóm pwe ese chúen lamot ngeni ikenái are a kon weires án emén epwe weweiti. Nge mi pwúng ena usun ewe Paipel, are fen met aramas ra rong usun ewe Paipel ina met a osukosuker? Ika eli ese fen pwúng met ra silei seni aramas?

Áwewe chék, aramas ra ekieki pwe Paipel a erá pwe Kot a nemeni ei fénúfan. Epwe ifa usun an epwe pwúng ena? Ei fénúfan a mmen osukosuk! A uren weires me riáfféú, semmwen me máló, mwelele me feiengaw watte. Itá emén Kot mi tong epwe tongeni efisi ekkena mettóch?

Ka mochen silei pélúwan? Neman kopwe máirú ren met ewe Paipel a apasa usun ié a nemeni ei fénúfan!

Neman ka fen kúna pwe ekkewe kapasen fén lón ei puk ra lóngólóng wóón Paipel. Chón Pwáraatá Jiowa ra lúkú pwe Paipel ina eú puk mi alúkúlúk le emmweni aramas. Pokiten a “pop seni . . . Kot, ra aüchea fän iten afalafala ewe kapas mi let, ra amiritikich, ra apwüngükich.” (2 Timoty 3:16, 17) Kopwe kúna feiéch ika kopwe etittina ena puk mi mak seni lóóm, nge a chúen aúchea lón ei fansoun!