Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 PWAL EKKÓCH ÁWEWE

Kot Úlúmén ika Emén Chék?

Kot Úlúmén ika Emén Chék?

ARAMAS mi lúkú ewe afalafal usun Trinitas ra apasa pwe ewe Sam, ewe Nau me ewe Ngún mi fel iir úlúmén Kot lón emén. Ra apasa pwe ekkena úlúmén ra lélléppék, ra unusen manaman me ese wor poputáár. Ina minne, me ren ena afalafal, ewe Sam, ewe Nau me ewe Ngún mi Fel, iir meinisin Kot nge lón chék emén Kot.

Chómmóng mi lúkú ewe Trinitas ra apasa pwe rese tongeni áweweei ena afalafal. Nge ra ekieki pwe ei afalafal a feito seni Paipel. A lamot ach sipwe silei pwe ena kapas “Trinitas” ese mak fán eú lón Paipel. Nge itá Paipel a apéchékkúla ena afalafal usun Trinitas? Ren ach sipwe pélúweni ena kapas eis, sipwe nengeni eú wokisin ra kan nénnéúnéú fán iten ei afalafal.

“EWE KAPAS MI KOT”

Iei alon Johannes 1:1, TF: “Le poputan a wor ewe Kapas o ewe Kapas a nom ren Kot, o ewe Kapas mi Kot.” Lón chék pwal ena sópwun, ewe aposel Johannes a affata pwe “ewe Kapas” a wewe ngeni Jesus. (Johannes 1:14TF) Iwe nge, pokiten a mak pwe ewe Kapas a pwal iteni Kot, ekkóch ra ekieki pwe ewe Nau me ewe Sam, iir emén chék.

Chemeni pwe ekkena wokisin ra mak akkomw lón fósun Krik. Mwirin, chón afféú ra siwili ewe Tesin Krik ngeni fitu sókkun fós. Iwe nge, ekkóch chón afféúni Paipel rese makkeei ei itiitin fós “ewe Kapas mi Kot.” Pwata? Pún ra silei ewe fósun Krik Paipel a akkomw le mak lón, iwe ra kúna pwe mi sókkóló afféún. Ifa usun? A iei usun afféún lón ekkóch néúr kana Paipel: “Ewe Logos [Kapas] a usun chék kot.” (A New Translation of the Bible) “Ewe Kapas emén kot.” (The New Testament in an Improved Version) “Ewe Kapas a nóm ren Kot me a léllé ngeni  napanapan.” (The Translator’s New Testament) Me ren ekkena chón afféú, ewe Kapas, esap i ewe Kot mi Unusen Manaman. Iwe nge, pokiten a tekia wisan me lein férien Jiowa kewe, iwe a mak pwe ewe Kapas “emén kot.” Lón ei itiitin, ewe kapas “kot” a wewe ngeni “emén mi manaman.”

ALAPAALÓ SILEOM

Lape ngeni aramas rese silei fósun Krik ewe Paipel a akkomw le mak lón. Iwe, ifa usun kopwe tongeni silei wesewesen weween alon Johannes we? Ekieki mwo ei kapas áwewe: Emén sense a áwewe ngeni néún kewe chón sukul och pwóróus. Nge a sókkopat weween ena pwóróus me ren ekkena chón sukul. Iwe, ifa usun epwe tongeni ffat ngeniir weween? Repwe tingorei ewe sense pwal ekkóch áweween ena pwóróus. Ese mwáál ar alapaaló sileier epwe álisiir le wewefichiti ena pwóróus. Iwe, pwal ina chék usun, ren óm kopwe tufichin weweiti Johannes 1:1, kopwe tongeni káé ewe puken Johannes Kapas Allim fán iten pwal ekkóch pwóróus ika ié na Jesus. Epwe álisuk pwe epwe pwúng óm weweiti.

Áwewe chék, Johannes a pwal makkeei lón sópwun 1, wokisin 18: “Esap wor eman aramas a küna Kot [ewe mi Unusen Manaman] fän eu.” Iwe nge, aramas ra fen kúna Jesus ewe Nau, pún iei alon Johannes: “Ewe Kapas [Jesus] a wiliti fituk, o a nonnom leich, . . . O am aua fen katol an we ling.” (Johannes 1:14, TF) Iwe, epwe itá ifa usun ewe Nau epwe tongeni eú kinikinin ewe Kot mi Unusen Manaman? Johannes a pwal makkeei pwe ewe Kapas a “nom ren Kot.” Nge epwe itá ifa usun emén epwe tongeni nóm ren emén nge pwal i chék ena emén? Pwal och, lón Johannes 17:3, Jesus a affata pwe a sókko seni Seman we lón láng. A apasa pwe Seman we “ewe eman chök Kot mi let.” Iwe, arapakkan lesópwólóón ewe puken Johannes, a mak: “Ekei manaman ra makketiu,  pwe ämi oupwe lükü pwe Jesus ewe Kraist, ewe Nöün Kot.” (Johannes 20:31) Iwe nengeni, a mak pwe Jesus Néún Kot nge esap i Kot. Ekkena pwóróus lón puken Johannes ra affata ifa usun sipwe weweiti Johannes 1:1. Jesus ewe Kapas, i “emén kot,” weween a tekia wisan nge sap weween pwe a léllé ngeni ewe Kot mi Unusen Manaman.

ÁNNETA PWE EKKEWE PWÓRÓUS RA PWÚNG

Liwiniti mwo ewe kapas áwewe usun ewe sense me néún kewe chón sukul. Sipwe erá pwe ekkóch ra chúen tipemwaramwar, inaamwo ika ewe sense a áwewe ngeniir pwal fitu sókkun áwewe. Met ra tongeni féri? Ra tongeni tingor álillis seni pwal emén sense usun ewe chék pwóróus. Ika ena arúúeménún sense a erá pwe a pwúng alon ewe áeménún, iwe eli lape ngeni ekkena chón sukul resap chúen tipemwaramwar. Iwe, pwal ina chék usun, ika kese kon lien weweiti alon Johannes usun ririin lefilen Jesus me ewe Kot mi Unusen Manaman, iwe ka tongeni kútta pwal och pwóróus seni pwal emén soumakken Paipel. Ren chék áwewe, nengeni mwo makkeien Mateus. A makkeei pwe iei alon Jesus usun sópwólóón ei ótót: “Esap wor eman a silei ewe rän are ewe kulok ekei mettoch repwe fis lon, sap mwo nge ekewe chon läng are ewe Nau, nge ewe Sam echök a silei.” (Mateus 24:36) Ifa usun ekkena kapas ra ánneta pwe esap Jesus ewe Kot mi Unusen Manaman?

Ika pwe Jesus a léllé ngeni ewe Kot mi Unusen Manaman, iwe itá úrúrún silean ewe Sam me ewe Nau repwe chék lélléfengen. Iwe nge, me ren ewe wokisin asan Jesus a apasa pwe mei wor mettóch ewe Sam a silei nge ewe Nau ese silei. Ren ei wewe, ewe Sam me ewe Nau rese tongeni ar repwe lélléfengen. Iwe nge, ekkóch repwe apasa pwe ‘Eli, a ina usun alon Jesus pún ina atun i emén aramas wóón fénúfan.’ Nge ika mi pwúng met ra erá, iwe ifa  usun ewe ngún mi fel? * Ika pwe ewe ngún mi fel wesewesen emén Kot, iwe pwata chék Jesus ese apasa pwe ewe ngún mi fel a silei met ewe Sam a silei?

Atun kopwe sópweló óm káé Paipel, kopwe kúna pwe a chómmóng wokisin repwe áitikich usun ena pwóróus. Ekkena wokisin lón Paipel ra affataéchú pwe Kot esap úlúmén lón emén. Kopwe silei ewe enlet usun ewe Sam, ewe Nau me án Kot we manaman mi fel.Kölfel 90:2; Föför 7:55; Kolose 1:15.

^ par. 1 Lón Paipelin Chuuk, ngún mi fel a wewe ngeni emén. Iwe nge, ewe popun kapas a néúnéú lón fósun Ipru a wewe ngeni “manaman” are “asepwan.” Kot a áeá ei manaman le apwénúetá minne a tipeni. (Ppii ewe pwóróus fachikin Keneses 1:2, KG; Sona 1:4) Ei “asepwan” ese wewe ngeni Kot. Ren enletin a wewe ngeni án Kot we manaman a kan ákkáeá le apwénúetá minne a tipeni.