Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 PWAL EKKÓCH ÁWEWE

Met Weween ewe Ránin Kapwúng?

Met Weween ewe Ránin Kapwúng?

MET óm ekiek usun ewe Ránin Kapwúng? Chómmóng ra ekieki pwe fite billion aramas repwe útá mwen án Kot we leenien motun nemenem, iwe repwe kapwúng emén me emén mwen mesan. Ra pwal ekieki pwe ekkóch repwe kúna manaw lón paratis lón láng nge ekkewe lusun repwe kúna riáfféú esemuch. Iwe nge, mi sókkóló met ewe Paipel a apasa usun ena fansoun. Án Kot we Kapas a apasa pwe esap ina eú fansoun mi eniwokkus nge fen eú fansoun ápilúkúlúkéch me án aramas repwe unuséchsefál.

Lón Pwärätä 20:11, 12 (TF) iei makkeien ewe aposel Johannes usun ewe Ránin Kapwúng: “Iwe, ua kuna eu leenien motun king mi lap mi pwechepwech, o atewe mi momot won; o fonufan me lang ra su seni mwen mesen atewe. Iwe, ese chuen wor leenier. Ua pwal kuna ekkewe aramas mi malo, ir ekkewe mi lap o pwal ir ekkewe mi kis, pwe ra ukkuta mwen mesen ewe leenien motun king. Iwe emon a suuki ekkewe puk. A pwal suuki pwal eu puk, ewe puken manau. Iwe, ekkewe mi malo, ra kuna ar apung ren minne a makketiu lon ekkewe puk, ren minne ra fori.” Ié ei Soukapwúng a fósun me ikeei?

Jiowa Kot, i ewe Soukapwúng mi lapalap fán iten aramas meinisin. Iwe nge, a ewisa ngeni pwal emén an epwe wisen apwúngú aramas. Me ren Föför 17:31, ewe aposel Paulus a apasa pwe Kot a “filätä eu rän epwe apwüngü unusen chon fanüfan meinisin fän pwüng ren eman mwän i a awisa ngeni.” Ei Soukapwúng mi seikitá, ina i Jesus Kraist, ewe mi manawsefál. (Johannes 5:22) Iwe nge, ineet epwe poputá ewe Ránin Kapwúng? Epwe ifa úkúkún ttaman?

Me ren ewe puken Pwärätä, ena Ránin Kapwúng epwe poputá mwirin ewe maun itan Armaketon, lupwen án  Satan ótót wóón fénúfan epwe kataló. * (Pwärätä 16:14, 16; 19:19–20:3) Mwirin Armaketon, Satan me néún kewe chónláng mi ngaw repwe fétek lón ewe pwang mi alóllóól úkúkún engeréú ier. Lón ena atun, ekkewe 144,000 chón álemwir lón láng repwe wisen soukapwúng me pwal “eti Jesus le nemenem lon ükükün engeröü ier.” (Pwärätä 14:1-3; 20:1-4; Rom 8:17) Sap minne ewe Ránin Kapwúng epwe mwoch usun itá nge 24 chék awa. Nge epwe úkúkún engeréú ier ttaman.

Atun ekkena engeréú ier, Jesus Kraist epwe “apwüngü ekewe mi manau me ekewe mi mäla.” (2 Timoty 4:1) Chókkana “mi manau” ra wewe ngeni ewe “mwich mi fokun chocho” mi manawewu seni Armaketon. (Pwärätä 7:9-17) Ewe aposel Johannes a pwal kúna “ekkewe aramas mi malo, . . . ra ukkuta mwen mesen ewe leenien motun” kapwúng. Jesus a fen pwonei pwe “ekewe sotup meinisin repwe rong mwelian o towu seni peiaser” ren ar repwe manawsefálitá. (Johannes 5:28, 29; Föför 24:15) Nge ar kapwúng epwe alóngólóng wóón met?

Me lón kúnaen aposel Johannes we lángipwi, a suuk ekkewe puk, me “ekkewe mi malo, ra kuna ar apung ren minne a makketiu lon ekkewe puk, ren minne ra fori.” (Pwärätä 20:12, TF) A itá mak lón ekkena puk minne aramas ra fen piin féri me lóóm? Aapw, ewe kapwúng esap alóngólóng wóón minne aramas ra féri me mwen ar máló. Pwata sia silei ena? Iei alon Paipel: “Lupwen eman aramas a mäla, a ngasala seni fän nemenien tipis.” (Rom 6:7) Tipisin chókkewe mi manawsefál ra musoló. Ina popun, ese mwáál a mak pwal ekkóch allúkún Kot lón ekkena puk. Ren ar repwe tufichin kúna manaw esemuch, chókkewe mi manawewu seni Armaketon me chókkewe mi manawsefálitá repwe álleasochisi án Kot kewe allúk, pachelong  ekkewe mineféén allúk Jiowa epwe uwawu atun ekkewe engeréú ier. Ina minne, emén me emén epwe kapwúng me ren minne epwe féri atun ewe Ránin Kapwúng.

Ewe Ránin Kapwúng epwe awora ngeni fite billion aramas ewe tufichin ar repwe kerán káé usun letipen Kot me etipeeú ngeni manawer. Weween pwe epwe wor eú watteen angangen asukula aramas. A enlet pwe ‘chon fanüfan repwe kaiö mine a pwüng.’ (Aisea 26:9) Iwe nge, sap minne meinisin repwe etipeeúfengeni manawer ngeni letipen Kot. Iei alon Aisea 26:10: “Iei mwo nge ka eäni ümöümöch ngeni ekewe chon föföringau, nge resap kaiö föförün pwüng. Iwe, lon fanüen chon wenechar ra chök föri mine a ngau, resap ekieki om tekia me om ling, en äm Samol mi Lapalap.” Atun ewe Ránin Kapwúng chókkeei mi ngaw repwe máfóchófóch.

Lemuchúlóón ewe Ránin Kapwúng, aramas repwele unuséch usun chék unuséchún ekkewe popun aramas. (1 Korint 15:24-28) Iwe mwirin, epwe wor eú sáingoon sóssót. Satan epwe musoló seni fétek, iwe epwe mumutá ngeni an epwe sáingooni an otupu aramas. (Pwärätä 20:3, 7-10) Chókkewe rese tupuló ren repwe pwapwaesini pwénúéchútáán ei oesini lón Paipel, a erá: “Ekewe chon pwüng repwe fanüeni ewe fanü o nonom won tori feilfeilachök.” (Kölfel 37:29) Pwúngún, ewe Ránin Kapwúng epwe efeiéchú aramas meinisin mi tuppwél!

^ par. 1 Ren pwóróusen Armaketon, kese mochen ppii pekin taropwe 594-595, 1037-1038 lón ewe puk Insight on the Scriptures, Volume 1 me sópwun 20 lón ewe puk Worship the Only True God, iir me ruu ekkena puk férien Chón Pwáraatá Jiowa.