ESE wor chómmóng pwóróus lón Paipel usun ewe chónláng itan Mikael. Iwe nge, lupwen a mak pwóróusan, i a kan féfféri angang mi lamot. Lón ewe puken Taniel, Mikael a maun ngeni chónláng mi ngaw, lón makkeien Jutas we taropwe, ra áninifengen me Satan, iwe lón ewe puken Pwärätä, a maun ngeni Satan me néún kewe chónláng mi ngaw. Ren an peni án Jiowa nemenem me an fiu ngeni chón oput Jiowa, a ffat pwe manawen Mikael a tipeeú ngeni weween itan we, “Ié A Usun Chék Kot?” Nge ié ena Mikael?

 Fán ekkóch, a wor lap seni eú iten aramas. Áwewe chék, Jakop a pwal iteni Israel me ewe aposel Petrus a pwal iteni Simon. (Keneses 49:1, 2, KG; Mateus 10:2) Iwe, ewe Paipel a áiti ngenikich pwe Jesus Kraist a pwal iteni Mikael, ina itan mwen me mwirin an we manaw wóón fénúfan. Sipwe ppii seni Paipel met popun sia apasa ena.

Meilapen Chónláng. Án Kot we Kapas a apasa pwe Mikael “ewe meilapen chon läng.” (Jutas 9) Nengeni, a apasa pwe Mikael, ewe meilapen chónláng, weween a wor emén chék ena esin chónláng. Pwúngún, ena kapas “meilapen chon läng” a mak lón Paipel fán iten emén chék nge esap fitemén. A pwal mak pwe Jesus a wiseni wisen emén samolun chónláng. Iei alon 1 Tesalonika 4:16 usun ewe Samol Jesus Kraist ewe a manawsefálitá: “Püsin ach Samol epwe feitiu me läng fän mwelian mi leüömong, fän mwelien ewe samolun chon läng.” Iwe, a mak pwe mwelien Jesus a usun mwelien samolun chónláng. Ena wokisin a áiti ngenikich pwe ewe meilapen chónláng Mikael a weneiti Jesus.

Meilapen Soufiu. Ewe Paipel a apasa pwe “Mikael me nöün kewe chon läng ra fiu ngeni ewe trakon . . . me nöün kewe chon läng.” (Pwärätä 12:7) Ina minne, Mikael, i Meilapen eú mwichen chónláng mi tuppwél. Ewe puken Pwärätä a pwal apasa pwe Jesus, i Meilapen eú mwichen chónláng mi tuppwél. (Pwärätä 19:14-16) Ewe aposel Paulus a pwal kapas usun “Samol” Jesus me “nöün kewe chon läng mi pöchökül.” (2 Tesalonika 1:7) Weween, ewe Paipel a kapas usun Mikael me “nöün kewe chon läng” me pwal Jesus me “nöün kewe chon läng.” (Mateus 13:41; 16:27; 24:31; 1 Petrus 3:22) Nge pokiten ese mak lón Paipel pwe a wor ruu mwichen chónláng mi tuppwél lón láng, itá eú fán nemenien Mikael me eú fán nemenien Jesus, iwe a pwúng ach sipwe apasa pwe Mikael a wewe ngeni Jesus Kraist lón wisan we lón láng. *

^ par. 1 Fán iten ekkóch pwóróus mi pwáraatá pwe ewe it Mikael a weneiti néún Kot we, ppii pekin taropwe 393-394 lón ewe puk Insight on the Scriptures Volume 2, férien Chón Pwáraatá Jiowa.