Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 PWAL EKKÓCH ÁWEWE

Lamoten ewe Ier 1914 lón án Paipel Kewe Oesini

Lamoten ewe Ier 1914 lón án Paipel Kewe Oesini

ARAPAKKAN fáik ier me mwen 1914, ekkewe chón káé Paipel ra arongafeili pwe epwe fis mettóch mi fókkun aúchea lón ena ier. Ikkefa ekkena mettóch me met a ánneta lamoten ewe ier 1914?

 Iei alon Jesus lón Lukas 21:24: “Ekewe chon lükün Israel repwe purätiu Jerusalem tori fansoun än chon lükün Israel nemenem [“fansoun ekkewe muun re Jentail,” TF] a wes.” Jerusalem iolapen ewe mwúún Jus, weween ekkewe king lón tettelin King Tafit ra nemenem seni me lón ena telinimw. (Kölfel 48:1, 2) Iwe nge, ekkena king ra sókkóló me lein sounemenemen ekkewe mwúún lúkún. Pún ra nemenem lón Jerusalem, “än ewe Samol mi Lapalap lenien mot,” usun chón tupuni Jiowa Kot pwisin. (Jeremaia 3:17) Ina minne, Jerusalem a liosuetá án Jiowa nemenem.

Iwe nge, ifa usun me ineet a poputá án “ekewe chon lükün Israel repwe purätiu” án Kot nemenem? A poputá lón 607 B.C.E. lupwen chón Papilon ra okkufu Jerusalem. A péénnúló “än ewe Samol mi Lapalap lenien mot” iwe a ekis kaúló nemenien ekkewe king lón tettelin Tafit. (2 King 25:1-26) Itá ekkewe mwú repwe “purätiu” án Kot nemenem tori feilfeiló chék? Aapw, pún iei alon án Isikiel we oesini usun ewe sáingoon kingen Jerusalem itan Setekia: “Repwe angei senuk filifilin mökürom, pwal ewe mwärin king. . . . Tori epwe war ätewe mine wesewesen an. Iwe, ngang üpwe awisa ngeni meinisin.” (Isikiel 21:26, 27) Ewe nemenemen Tafit a ngeni Kraist Jesus, “ätewe mine wesewesen an.” (Lukas 1:32, 33) Ina minne, ewe fansoun “purätiu” epwe muchúló lupwen Jesus a wiliti King.

Ineet ena mettóch mi fókkun aúchea a fis? Jesus a apasa pwe epwe kaúk nemenemen ekkewe chón Jentail. Taniel sópwun 4 a álisikich le silei ifa úkúkún ttamen ena fansoun. A erá pwe Nepukatnesar ewe kingen Papilon a ttan, nge an ttan eú oesini. A ttana efóch irá mi watte nge a pékúpék. Popun we esap tongeni máár pún a féfé ngeni mechá me kapa. Emén chónláng a apasa: “Epwe fis ngeni lon ükükün fisu ier.”Taniel 4:10-16.

Lón Paipel, fán ekkóch, ekkewe irá ra liosuetá nemenem. (Isikiel 17:22-24; 31:2-5) Ina minne, pékúpékútiwen ena irá lón kapas áwewe, a liosuetá pwe án Kot nemenem, ewe  ekkewe king lón Jerusalem ra tupuni, epwe ekis kaúló. Iwe nge, ena oesini a affata pwe án ekkewe mwú “purätiu” Jerusalem epwe muchúló mwirin “fisu ier.” Ekkena fisu ier esap wesewesan fisu ier, nge ier lón kapasen oesini. Iwe, ifa úkúkún ttamen ekkena fisu ier?

Me ren Pwärätä 12:6, 14, úlúngát esopw ier ra wewe ngeni “engeröü rüwopükü wone rän.” Ina popun, “fisu ier” ra wewe ngeni 1,260 rán fán ruu, weween 2,520 rán. Nge sap minne a úkútiw án ekkewe mwúún Jentail “purätiu” án Kot nemenem lón chék 2,520 rán mwirin turutiwen Jerusalem. Iwe, neman ena oesini epwap pwénútá mwirin och fansoun mi fókkun ttam seni ena. Numperis 14:34 me Isikiel 4:6 ra apasa pwe eú rán a wewe ngeni eú ier ina popun me ren ekkena wokisin ekkewe 2,520 rán ra wewe ngeni 2,520 ier.

 A poputá ekkena 2,520 ier lón October 607 B.C.E., lupwen Jerusalem a taló ren chón Papilon, iwe a úkútiw nemenemen king lón tettelin Tafit. A muchúló ena fansoun lón October 1914. Lón ena ier, a much “fansoun än chon lükün Israel nemenem,” iwe Jesus Kraist a seikitá lón ewe wis King lón láng. *Kölfel 2:1-6; Taniel 7:13, 14.

A fen pwénúetá met Jesus a osuni, pwe mettóch mi fókkun ánenneiruk epwe fis wóón fénúfan, usun choweán maun, lengita, chechchechin fénú me málapalap, pwe repwe esissillatá an wiseni wisen King lón láng. (Mateus 24:3-8; Lukas 21:11) Ekkena mettóch ra ánnetaéchú pwe lón 1914, a poputá nemenemen án Kot we Mwú lón láng nge pwal poputáán “ekewe ränin lesopolan” ei ótót mi ngaw.2 Timoty 3:1-5.

^ par. 4 Seni October 607 B.C.E. ngeni October 1 B.C.E., epwe 606 ier. Met a tapw mwirin 1 B.C.E.? 0 B.C.E.? Aapw, epwe 1 C.E. Iwe, seni October 1 B.C.E. ngeni October 1914 C.E., epwe 1,914 ier. Ika sipwe apachafengeni 606 ier me 1,914 ier, iwe kapachelaper epwe 2,520 ier. Ren pwóróusen talóón Jerusalem lón 607 B.C.E., ppii ewe itelap “Chronology” lón ewe puk Insight on the Scriptures, férien Chón Pwáraatá Jiowa.