Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 LESEN 8

Pwata Kot A Mutatá Minne mi Ngaw me Riáfféú?

Pwata Kot A Mutatá Minne mi Ngaw me Riáfféú?

1. Ifa usun a poputá minne mi ngaw?

Kot a mut ngeni aramas ar repwe nemenem ren och fansoun mi kaúk pwe epwe pwári pwe ar nemenem ese tongeni pwákini án aramas kewe osukosuk

A poputá minne mi ngaw wóón fénúfan atun Satan a eáni ewe áeúin kapas chofona. Satan i emén chónláng mi unuséch me lepoputáán, nge ese chúen “nom won pekin let.” (Johannes 8:44) A ámááraatá an mocheniaiti ewe fel mi chék fich ngeni Kot. Satan a chofona ngeni ewe áeménún fefin, itan Efa, me a etipetipa pwe epwe álleasochisi i, nge esap Kot. Atam a fiti Efa le álleasolapa Kot. Án Atam kefil a efisi riáfféú me máló.Álleani Keneses 3:1-6, 19.

Satan a poputááni eú angangen ú ngeni án Kot pwúngún nemenem atun a etipetipa Efa pwe epwe álleasolapa Kot. Lap ngeni aramas ra fiti Satan lón an ese mochen pwe Kot epwe ewe Sou Nemenem woor. Ina minne, Satan a wiliti “samolun ei fanüfan.”Álleani Johannes 14:30; 1 Johannes 5:19.

2. Itá rese unuséch férien Kot kewe?

Án Kot kewe angang meinisin ra unuséch. Férien Kot kewe chónláng me aramas a wor ar tufich le unusen álleasochisi Kot. (Tuteronomi 32:4, 5) Kot a ngenikich ewe tufichin pwisin filatá le féri lefilen minne mi éch me ngaw lupwen a férikichetá. Ena tufich a awora ngenikich alen ach sipwe pwári ach tong fán iten Kot.Álleani James 1:13-15; 1 Johannes 5:3.

3. Pwata Kot a mutatá riáfféú tori iei?

Jiowa a mut ngeni angangen ú ngeni pwúngún an nemenem ren och fansoun mi kaúk. Pwata? Pwe epwe pwári pwe án Jiowa chék nemenem ina met epwe efeiéchú aramas. (Än Salomon Afalafal 7:29; 8:9) Iwe, a ffatoló ena mettóch mwirin 6,000 ier lón uruwoon  manawen aramas. Sou nemenemen fénúfan ra sópwongaw le áwesaaló maun, ipweri allúk, pwúngúngaw, are samau.Álleani Jeremaia 10:23; Ekistos 9:16.

Án Kot nemenem a sókkóló seni án aramas nemenem pun a efeiéchú ekkewe mi etiwa nemenian. (Aisea 48:17, 18) Ekiseló chék Jiowa epwele asopwaló meinisin án aramas kewe nemenem. Ekkewe chék aramas mi filatá le nom fán án Kot nemenem repwe fénúeni fénúfan.Aisea 11:9; Álleani Taniel 2:44.

4. Met án Kot mosonottam a atufichikich le féri?

Satan a erá pwe esor emén epwe tongeni angang ngeni Jiowa ren an enletin tongei. Ka mochen ánnetatá pwe mi chofona ena pwóróus? Ka tongeni! Án Kot mosonottam a atufichikich meinisin le pwáraatá ika sia peni ewe nemenem me ren Kot are me ren aramas. Sia pwári ach kefil ren napanapen manawach.Álleani Hiop 1:8-12; Än Salomon Fos 27:11.

5. Ifa usun sipwe filatá Kot pwe epwe ach Sou Nemenem?

Ach kewe kefil ra pwári ika sia mochen Kot epwe ach Sou Nemenem

Sia tongeni filatá Kot pwe epwe ach Sou Nemenem ren ach kúkkútta me akkapwénúetá angangen fel mi enlet mi lóngólóng wóón án Kot we Kapas, ewe Paipel. (Johannes 4:23) Sia tongeni ú ngeni Satan pwe esap ach sou nemenem ren ach sisap angolong lón mwékútúkútún politics me maun, usun chék met Jesus a féri.Álleani Johannes 17:14.

Satan a áeá an manaman le alapaaló féffér mi limengaw me efeiengaw. Ekkóch chienach me márárich kewe repwe esiitakich are ú ngenikich atun sise mochen féri ekkena mettóch. (1 Petrus 4:3, 4) Iwe, met sipwe filatá? Itá sipwe filatá le chiechi ngeni chókkewe mi tongei Kot? Itá sipwe álleasochisi an allúk mi mirit mi fiti tong? Ika ewer, sia ánnetatá pwe Satan a kapas chofona ren an erá pwe esor emén epwe álleasochisi Kot pwal mwo nge fán weires.Álleani 1 Korint 6:9, 10; 15:33.

Án Kot tong fán iten aramas a alúkúlúkúkich pwe epwe muchuló minne mi ngaw me riáfféú. Chókkewe mi pwáraatá pwe ra lúkú ena, repwe pwapwaiti manaw wóón fénúfan tori feilfeiló.Álleani Johannes 3:16.