Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 LESEN 5

Met Kot A Tipeni fán Iten Fénúfan?

Met Kot A Tipeni fán Iten Fénúfan?

1. Pwata Kot a fératá fénúfan?

Jiowa a liffang ngeni aramas ewe fénúfan. Ina leeniach. Ina popun, ewe áeúin pean pwúpwúlú, Atam me Efa, rese fférútá pwe repwe aúraló láng, pun Kot a fen fératá chónláng ar repwe nom lón láng. (Hiop 38:4, 7) Nge, Kot a eleenia ewe áeménún mwán lón ewe paratis mi amwarar, itan tánipiin Eten. (Keneses 2:15-17) Jiowa a awora ewe ápilúkúlúkún pwapwaiti manaw esemuch wóón fénúfan ngeni Atam me mwirimwirin kewe repwe uputiw.Álleani Kölfel 37:29; 115:16.

Lepoputáán, ewe tánipiin Eten ina chék ewe kinikin wóón fénúfan a eú paratis. Ewe áeúin pean pwúpwúlú repwe aúraló fénúfan ren néúr kewe. Ekiseló, repwe nemeni unusen fénúfan me ewili ngeni paratis. (Keneses 1:28) Ewe fénúfan esap tongeni taló. Epwe chék ina leenien aramas.Álleani Kölfel 104:5.

2. Pwata esap eú paratis ei fénúfan iei?

Atam me Efa ra álleasolapa Jiowa ina popun a asúroló seni ewe tánipi. Ewe Paratis ese chúen nom, me esor emén a sópwéch le efisisefál. Ewe Paipel a apasa pwe fénúfan “a tolong lepöün ekewe aramasangau.”Hiop 9:24.Álleani Keneses 3:23, 24.

Itá Jiowa a tunaló minne a tipeni fán iten aramas seni lepoputáán? Aapw! I ewe mi lapalap seni meinisin. Ese tongeni sópwongaw. (Aisea 45:18) Epwe apwénúetá met a fen tipeni fán iten aramas.Álleani Kölfel 37:11, 34.

3. Ifa usun epwe fissefál ewe Paratis?

Ewe Paratis epwe fissefál wóón fénúfan atun án Jesus nemenem usun néún Kot King. Lón ewe maun itan Armaketon, Jesus epwe emmweni néún Kot kewe chónláng me nieló meinisin  mi ú ngeni Kot. Mwirin, Jesus epwe kalapusei Satan úkúkún 1,000 ier. Néún Kot kewe aramas repwe manawewu seni ewe kitetter pokiten Jesus epwe emmweniir me túmúnúúr. Repwe pwapwaiti manaw esemuch lón Paratis wóón fénúfan.Álleani Pwärätä 20:1-3; 21:3, 4.

4. Ineet epwe wesiló riáfféú?

Ineet Kot epwe áwesaaló minne mi ngaw wóón fénúfan? Jesus a awora eú ‘esissil’ mi pwári ineet a arapoto ewe sópwólóón. Ika epwe sópwósópwóló met a fiffis lón ei fansoun, a tongeni nieló aramas meinisin me a pwári pwe iei sia nonnom lón “ewe fansoun sopolan” ei ótóten fénúfan.Álleani Mateus 24:3, 7-14, 21, 22.

Atun Jesus epwe nemeni fénúfan úkúkún 1,000 ier seni láng, epwe áwesaaló riáfféú meinisin. (Aisea 9:6, 7; 11:9) Me lúkún án Jesus wiseni ewe wis King, epwe wiseni ewe wis Souasor mi Lap me amóeló tipisin chókkewe mi tongei Kot. Ina popun, Kot epwe áwesaaló semmwen, chinnap me máló ren an néúnéú Jesus.Álleani Aisea 25:8; 33:24.

5. Ié kewe repwe manaw lón Paratis lón mwachkkan?

Lón ewe Leenien Mwich, kopwe chuuri chókkewe mi tongei Kot me mochen káé le apwapwaai i

Aramas mi álleasochisi Kot repwe nonnom lón Paratis. (1 Johannes 2:17) Jesus a tiinaaló chón tapweló mwirin le kútta chókkewe mi tipetekison me asukuler ifa usun repwe ketiw me ren Kot. Lón ei fansoun, Jiowa a ammolnatá fite million aramas fán iten manaw lón Paratis wóón fénúfan lón mwachkkan. (Sefanaia 2:3) Lón Án Chón Pwáraatá Jiowa kewe Leenien Mwich, aramas ra káé le wiliti mwán me fefin pwúpwúlú mi múrinné me sam me in mi múrinné. Sam me in me nau ra káéfengen usun Kot me káé ifa usun ewe pwóróus allim epwe amúrinnéló manawer.Álleani Mika 4:1-4.