1. Itá lamalam meinisin ra múrinné?

A wor aramas mi letip wenechar lón lamalam meinisin. A múrinné ewe pwóróus pwe Kot a kúna ekkena aramas me a áfánniir. Nge solapan pwe aramas ra áeá lamalam ren féffér mi ngaw. (2 Korint 4:3, 4; 11:13-15) Ekkewe repot usun pwóróusen fénúfan ra erá pwe ekkóch lamalam ra angolong lón angangen terrorist, ninniilóón einangen aramas, maun me eriáfféwú me kirikiringaw ngeni ekkewe semirit. A ifa me eletipechoun ena pwóróus ngeni chókkewe mi wesewesen lúkú Kot!Álleani Mateus 24:3-5, 11, 12.

Lamalam mi enlet a elingaaló Kot, nge lamalam chofona a eletipengawa i. A afalafala aramas pwóróus ese pop seni Paipel, kapachelong ekkewe afalafal chofona usun Kot me usun máló. Nge Jiowa a mochen pwe aramas repwe silei ewe enlet usun i.Álleani Än Salomon Afalafal 9:5, 10; 1 Timoty 2:3-5.

2. Met epwe fis ngeni ekkewe lamalam?

Sia pwapwa pwe Kot a oput ekkewe lamalam mi erá pwe ra tongei i, nge ra wesewesen tongei án Satan otot. (James 4:4) Án Kot we Kapas a eita ngeni lamalam chofona meinisin “Papilon mi lapalap.” Papilon, ina ewe telinimw me lóóm, ia lamalam chofona a poputá me ie mwirin ewe Noter, le mwúún Noa we. Ekiseló chék, Kot epwele asopwaló lamalam mi otupu me mi eriáfféwú aramas meinisin.Álleani Pwärätä 17:1, 2, 5, 16, 17; 18:8.

A pwal wor pwóróus mi múrinné. Jiowa ese ménúkaaló chókkewe mi letip wenechar mi nonnom lein ekkewe lamalam chofona wóón unusen fénúfan. A ioni ekkena sókkun aramas ren an asukuler ewe enlet.Álleani Mika 4:2, 5.

 3. Met a lamot chókkewe mi letip wenechar repwe féri?

Lamalam mi enlet a etipeeúfengeni aramas

Jiowa a tongei ekkewe aramas mi mochen silei ewe enlet me mochen féri minne mi pwúng. A fókkun peseer pwe repwe towu seni lamalam chofona. Chókkewe mi tongei Kot ra tipemecheres le féri ekkesiwil lón manawer pwe repwe apwapwaai i.Álleani Pwärätä 18:4.

Le mwúún ekkewe aposel, atun aramas mi letip wenechar ra rongorong ewe pwóróus allim seniir, ra pwapwa le etiwa. Ra káé seni Jiowa ewe sókkun mineféén napanapen manaw, ina ewe sókkun manaw mi wor popun, mi atoto pwapwa me ápilúkúlúk. Ekkena aramas lón fansoun ekkewe aposel ra isetiw leenien áppirú mi múrinné fán itach ikenái, pokiten ra etiwa ewe pwóróus allim ren ar akkomwa Jiowa lón manawer.Álleani 1 Tesalonika 1:8, 9; 2:13.

Jiowa a etiwalong lón an we familien chón fel, chókkewe mi towu seni lamalam chofona. Ika kopwe etiwa án Jiowa etiwetiw mi fiti tong, kopwe wiliti chiechian, eáni eú mineféén familien chón fel ngeni Jiowa iir mi eáni tong, me kúna manaw esemuch.Álleani Markus 10:29, 30; 2 Korint 6:17, 18.

4. Ifa usun Kot epwe atoto pwapwa wóón fénú meinisin?

Kkanotoon kapwúngún lamalam chofona, ina eú kapas allim. Epwe atoto ngaseló seni riáfféú wóón unusen fénúfan. Lamalam chofona esap fókkun chúen otupu me etipefeseni aramasen fénúfan. Chónláng me chón fénúfan meinisin repwe tipeeúfengen lón ar fel ngeni ewe chék Kot mi enlet.Álleani Pwärätä 18:20, 21; 21:3, 4.