Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

Pwisin Filiom, Manawom lón Mwach!

Pwisin Filiom, Manawom lón Mwach!

KA TONGENI PWISIN FILATÁ EPWE IFA USUN MANAWOM LÓN MWACHKKAN? Ekkóch ra meefi pwe manawer a fen kkótóló seni me lóóm, me ena mettóch a nemeni manawer, nge emén ese tongeni pwisin filatá ika epwe ifa usun manawan. Atun ra sópwongaw le tikeri met ra achocho ngeni, ra meefi pwe epwe chék ina usun. Ra erá: “Esap iei feitiwan me láng pwe upwe tikeri met ei ua achocho ngeni!”

Pokiten a kon chómmóng osukosuk me riáfféú lón ei fénúfan, ekkóch ra meefi letipengaw pokiten ese wor alen ar ngaseló. Eli ekkóch ra sótun ámúrinnééló pwisin manawer, nge maun, atai allúk, feiengaw watte, me semmwen a angawaló án aramas kókkót fansoun meinisin. Ina popun aramas ra kan pwisin eisiniir: ‘Meit ua kon achocho?’

Pwúngún pwe nónnómun manaw a tongeni wesewesen kkúú minne ka akkóta. (Än Salomon Afalafal 9:11) Iwe nge, atun a weneiti manawom lón mwachkkan, ka tongeni pwisin filatá met kopwe féri. Ren enletin, ewe Paipel a pwári pwe manawom lón mwachkkan a lóngólóng wóón minne ka filatá. Ekieki met a erá.

Moses, ewe mi emmweni ewe mwúún Israel lóóm, a ereni ekkewe aramas alon Jiowa ei me mwen chék repwe tolong lón ewe Fénúen Pwon: “Üa anomu mwemi manau me mäla, feiöch me anümamau. Iei mine oupwe filätä manau, pwe ämi me mwirimwirimi kana oupwe manau. Oupwe echeni ewe Samol mi Lapalap ämi we Kot, oupwe aleasochisi alon o fitipacheiti.”​Tuteronomi 30:15, 19, 20.

“Üa anomu mwemi manau me mäla, feiöch me anümamau. Iei mine oupwe filätä manau.”​—Tuteronomi 30:19

Ewer! Kot a seláni ekkewe chón Israel seni ar fétek Isip me a onómu mwer ewe ápilúkúlúkún kúna manaw mi apwapwa me enletin ngaseló lón ewe Fénúen Pwon. Nge ekkena feiéch meinisin rese chék automatic. Ren ar repwe angei ekkena feiéch, a lamot ar repwe “filätä manau.” Ifa usun? Ren ar ‘echeni ewe Samol mi Lapalap ar we Kot, aleasochisi alon o fitipacheiti.’

Lón ach ei fansoun, a nóm mwom eú kefil mi pwal usun ena, me manawom lón ekkan rán repwe feito epwe lóngólóng wóón met ka filatá. Ika ka filatá le tongei Kot, aúseling ngeni, me fitipachei, weween pwe ka filatá manaw, ewe manaw esemuch lón paratis wóón fénúfan. Nge met a kapachelong lón eú me eú ekkena mettóch?

FILATÁ LE TONGEI KOT

Tong ina napanapen Kot we mi lap seni meinisin. Ewe aposel Johannes a makkeei fán emmwenien Kot pwe “Kot chen.” (1 Johannes 4:8) Ina popun, atun emén a eisini Jesus ifa ewe allúk mi lap seni meinisin, a erá: “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum.” (Mateus 22:37) A lamot pwe eú riri mi enlet lefilach me Jiowa Kot epwe lóngólóng wóón tong nge esap wóón niwokkus are ewe esin álleasochis pokiten chék ina wisach. Pwata sipwe filatá le tongei Jiowa?

Án Jiowa tongei aramas a usun án sam me in tongei néúr kewe. Inaamwo ika ekkewe sam me in rese unuséch, nge ra asukula, apéchékkúla, álisi, me apwúngú néúr kewe pokiten ra mochen ar repwe pwapwa me sópwéch. Nge met ekkewe sam me in ra mochen seni néúr kewe? Ra mochen pwe néúr kewe repwe tongeer me aúcheani minne ra ereniir pokiten ra chék mochen met repwe feiéch ren. Iwe ika ina, esap pwe Semach we mi unuséch me tong  lón láng epwe pwal mochen ach sipwe pwári ach enletin aúcheani meinisin minne a fen féri fán itach?

ÁLLEASOCHISI KOT

Ren ach sipwe álleasochisi Kot, mi lamot sipwe silei alon. Ese tufich ach sipwe rong pwisin méngúngúún Kot, nge sia aúseling ngeni ren ach álleani me apwénúetá met a nóm lón an we Kapas, ewe Paipel.​—1 Johannes 5:3.

Fán eú Jesus a erá ei pwe epwe affata lamoten ach sipwe aúseling ngeni alon Kot, a erá: “Aramas resap manau ren mongö chök, pwe ra manau ren iteiten kapas Kot a apasa.” (Mateus 4:4) A mmen lamot ach sipwe mwéngé, nge a kon fen lap lamoten ach sipwe káé usun Kot. Pwata? Ewe king mi tipachem itan Salomon a áweweei: “Mirit a alisi aramas usun chök moni a pwal alisi aramas. Nge iei feiöchün silelap pwe eman mi mirit a tümwünü püsin manauan.” (Än Salomon Afalafal 7:12) Sile me tipachem seni Kot ra tongeni túmúnúkich lón ei fansoun me a álisikich le eáni ekkewe kefil mi múrinné mi emmwenikich ngeni manaw esemuch lón mwachkkan.

FITIPACHEI KOT

Chemeni án Jesus we kapas áwewe lón ewe lesen mwen ei, a erá: “A pwangekükün ewe asam o chökükün ewe al mi ale ngeni manau esemuch. Mi wor ekoch chök aramas mi fetal won.” (Mateus 7:13, 14) Ika sia nónnóm wóón ena sókkun al, ese mwáál epwe fen álilliséch ika epwe wor emén sipwe fitipachei me epwe angangéch le emmwenikich pwe sipwe tongeni tour ngeni ewe ia sia mochen ló ie, weween ewe manaw esemuch. Ina popun a wor popun mi fókkun múrinné ach sipwe pacheéch ngeni Kot. (Kölfel 16:8) Nge ifa usun sipwe féri ena?

A wor chómmóng mettóch mi lamot sipwe féri iteiten rán, me a chómmóng met itá sia mochen féri. Ekkena sókkun mettóch ra tongeni erikaló ekiekich pwe esap wor ach fansoun are ese naf ach fansoun le ekieki usun met Kot a mochen ach sipwe féri. Ina popún ewe Paipel a áchema ngenikich: “Oupwe afälikemi lon mine oua föri. Ousap föri föförün chon tiparoch, nge oupwe föri föförün chon tipachem. Oupwe alomota fansoun manauemi, pun ekei rän ra ngau.” (Efisos 5:15, 16) Sia pacheéch ngeni Kot ren ach akkomwa lón manawach ach riri ngeni I.​—Mateus 6:33.

PWISIN FILIOM

Inaamwo ika kese tongeni féri met epwe siwili minne ka féri me lóóm, nge ka tongeni filatá le féri met epwe álisuk me óm famili le eáni eú manaw mi múrinné lón ekkan rán epwe feito. Ewe Paipel a affata pwe Semach we lón láng, Jiowa Kot a enletin tongekich me a áitikich met a mochen sipwe féri. Nengeni alon ewe soufós Mika ei:

“En aramas, ewe Samol mi Lapalap a aiti ngonuk mine a mürina. Met a mochen pwe kopwe föri? A mochen pwe kopwe föri mine a pwüng o eäni kirikiröch, kopwe pwal tipetekison fän mesen om we Kot.”​Mika 6:8.

Kopwe etiwa án Jiowa etiwetiw le chiechi ngeni I me angei ekkewe feiéch tori feilfeiló chék mi fen mmólnetá ngeni chókkewe mi chiechi ngeni? Pwisin ina filiom!