Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

Ekiseló Chék Kot Epwe Aúkatiw Meinisin Riáfféú

Ekiseló Chék Kot Epwe Aúkatiw Meinisin Riáfféú

“Ai Samol mi Lapalap, ifa ükükün fansoun ai üpwe siö ngonuk pwe kopwe awora om alilis, nge kopwap aüselinga? Ifa ükükün fansoun ai üpwe siö ngonuk fän iten ewe angangen mwänewüs, nge kopwap amanauakem?” (Apakuk 1:2, 3) Ina alon Apakuk, emén mwán mi múrinné mi kúna chen me ren Kot. Itá minne a erá a esissillatá nafangawen an lúkú? Aapw! Kot a alúkúlúkú Apakuk pwe a fen silei ewe fansoun mi kkótóló an epwe aúkatiw riáfféú.​—Apakuk 2:2, 3.

Atun en are emén chienom are chón óm famili oua nóm fán riáfféú, a mecheres óm kopwe ekieki pwe Kot a mmang le awora álillis, pwe itá epwe fen angolong chék me iwe. Nge, ewe Paipel a alúkúlúkúkich: “Ewe Samol esap mang le apwönüetä an pwon usun ekoch ra ekieki, pwe a mosonotam ngenikemi, pun esap mochen pwe eman epwe pöütmwälila, nge a fen mochen pwe meinisin repwe ekieksefäl.”​—2 Petrus 3:9.

INEET KOT EPWE MWÉKÚT?

Ekiseló chék! Jesus a pwári pwe epwe wor eú sókkun táppin aramas repwe kúna fitu esissil epwe fis mi kkóló aúchean nge epwe affata ekkewe ránin lesópwólóón ei ótóten fénúfan. (Mateus 24:3-42) Pwénútáán án Jesus we oesini lón ach ei fansoun a affata pwe epwele fis án Kot epwe angolong lón mwékútúkútún ei fénúfan. *

Nge ifa usun Kot epwe aúkatiw riáfféú meinisin? Atun Jesus a nóm wóón fénúfan, a pwári án Kot manaman le áwesi án aramas kewe riáfféú. Ekieki usun ekkeei pwóróus.

Feiengaw Watte: Atun Jesus me néún kewe aposel ra sáiló lón ewe Nóómun Kalilea, eú mélúmél mi péchékkúl itá epwele akókaaló waar we. Nge Jesus a pwári pwe iir me Seman we ra tongeni nemeni rán, ásepwál, mataw, pwúl me metakkan. (Kolose 1:15, 16) Jesus a chék erá: “‘Kopwe manasösötiu!’ A pwal üreni ekewe no, ‘Oupwe lüala.’” Iwe, met mwirilóón? “Ewe asepwäl a söötiu, a pwal fokun lüala won matau.”​—Markus 4:35-39.

Semmwen: Jesus a silleló ren ewe tufich le echikara chókkewe mi mesechun me pechemá, pwal chókkewe mi riáfféú ren máán kawakaw, rupun pwétúr, are ese lifilifil sókkun semmwen. Jesus a “apöchöküla chokewe meinisin mi samau.”​—Mateus 4:23, 24; 8:16; 11:2-5.

Lengita: Jesus a áeá ewe manaman a angei seni Seman we le alapaaló ewe ekis mwéngé. A mak lón ewe Paipel pwe a wor ruu fansoun lón an angangen afalafal a amwéngééni fitengeréú aramas.​—Mateus 14:14-21; 15:32-38.

Máló: A nóm ren Jiowa ewe manaman le amóeló máló, mi pwá lón ekkewe úlúngát pwóróus mi makketiw lón ewe Paipel usun án Jesus amanawasefáli chókkewe mi máló. Emén me lein chókkewe a amanawasefáliir, a fen máló úkúkún rúáánú rán.​—Markus 5:35-42; Lukas 7:11-16; Johannes 11:3-44.

^ par. 5 Ren pwal och pwóróus usun ekkewe ránin lesópwólóón, ppii sópwun 9 lón ewe puk Met ewe Paipel A Wesewesen Apasa? férien Chón Pwáraatá Jiowa me ese kamé óm kopwe kapiinawu me wóón jw.org.