Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

“Ifa I Chék Kot?”

“Ifa I Chék Kot?”

“A CHÉK PIPPIITÁ EI KAPAS EIS: IFA I CHÉK KOT?”​—Ina alon Pope Benedict XVI, atun a ló ren eú leenien fétek me lóóm lón Auschwitz, Poland.

ATUN A FIS WATTEEN OSUKOSUK, KESE KAN EKIEKI, ‘IFA I CHÉK KOT?’ ARE A PIIN FIS OCH METTÓCH MI FÓKKUN ERIÁFFÉÚ LÓN PWISIN MANAWOM MI EFISI ÓM KOPWE EKIEKI IKA KOT A TONGEOK WÓÓN WINIKAPOM?

Eli a léllé meefiom ngeni meefien Sheila seni Merika. A mámmááritá lón eú famili mi fókkun achocho lón lamalam, a erá: “Seni lekúkkúni, ua mochen riri ngeni Kot pokiten i ach we Chón Fératá. Nge, esap fán eú ua meefi pwe ua kkan ngeni i. Ua ekieki pwe a kan nennengeniei, nge seni chék me towau. Use meefi pwe Kot a oputaei, nge use pwal lúkú pwe a áfánniei.” Pwata Sheila a tipemwaramwar ika Kot a tongei? A áweweei: “A chék akkatapw ekkewe osukosuk a fis ngeni ai we famili me usun itá Kot ese fókkun mwo nge álisikem.”

Ese mwáál ka usun chék Sheila le fókkun lúkú pwe mi wor emén Kot mi Unusen Manaman. Nge, neman ka ekieki ika a wesewesen áfánnuk. Ewe mwán mi tuppwél itan Hiop a pwal tipemwaramwar, inaamwo ika a wor an lúkú lón péchékkúlen me tipachemen ewe Chón Fératá. (Hiop 2:3; 9:4) A chék akkatapw ekkewe riáfféú Hiop a kúna me usun itá ese fókkun wor alen an ngaseló. Ina popun a eisini Kot: “Pwota ka aopala mesom seniei o atolongaei lon tettelin chon oputom?”​—Hiop 13:24.

Met ewe Paipel a apasa? Atun a fis watteen osukosuk, itá sipwe tipi ngeni Kot? Mei wor pisekin ánnet mi affata pwe Kot a áfánni aramas me emén me emén leich? Fán iten pwisin emén me emén kich, itá sia tongeni silei ika Kot a áfánnikich, weweitikich, meefieni meefiach, are álisikich ren ach kewe osukosuk?

Lón en lesen mwirin ei, sipwe káé met férien Kot kewe ra áiti ngenikich usun an tong fán itach. (Rom 1:20) Mwirin sipwe etittina met ewe Paipel a pwári ngenikich usun án Kot tong. Atun a lapóló óm “silei i” seni férian kewe me an we Kapas, iwe epwe pwal lallapóló óm núkúnúkú pwe a ‘tongeok.’​—1 Johannes 2:3; 1 Petrus 5:7, Testament Mi Fö.